តើអ្វីទៅជាផលវិបាកដែលបង្កឡើងដោយការឡើងកម្តៅផែនដី?
ចុះផ្សាយនៅថ្ងៃ៖
ស្តាប់ - ០៤:០៧
នៅក្នុងពេលបច្ចុប្បន្ននេះ សហគមន៍អន្តរជាតិកំពុងតែខ្នះខ្នែងចរចាគ្នា ស្វះស្វែងរកកិច្ចព្រមព្រៀងមួយ នៅក្នុងសន្និសីទក្រុងប៉ារីស ដើម្បីរួមគ្នាទប់ស្កាត់ការឡើងកម្តៅនៃភពផែនដី និងបញ្ចៀសនូវគ្រោះមហន្តរាយដល់មនុស្សជាតិ។ តើអ្វីខ្លះជាផលប៉ះពាល់ដែលអាចបង្កឡើងដោយការឡើងកម្តៅនៃភពផែនដី?
មកទល់នឹងពេលបច្ចុប្បន្ននេះ ថ្វីដ្បិតតែគេនៅមិនទាន់អាចកំណត់បាននូវទំហំ និងវិសាលភាពពិតប្រាកដនៃផលវិបាកដែលបង្កឡើងដោយការឡើងកម្តៅភពផែនដី ក៏ប៉ុន្តែ អ្នកវិទ្យាសាស្រ្តជំនាញខាងអាកាសធាតុភាគច្រើនតែងតែបានអះអាងថា ផលប៉ះពាល់នឹងកើតមានឡើងនៅទូទាំងពិភពលោកទាំងមូល ហើយកើតមានទាំងទៅលើរុក្ខជាតិ សត្វ និងទៅលើមនុស្ស។
ផលប៉ះពាល់ដែលកើតឡើងជាក់ស្តែងជាងគេ គឺការកើនឡើងនៃសីតុណ្ហភាព។ នៅក្នុងរបាយការណ៍ចេញផ្សាយ កាលពីឆ្នាំ២០០៧ ក្រុមអ្នកជំនាញអាកាសធាតុរបស់អ.ស.ប បានព្យាករថា ប្រសិនបើគេមិនរកវិធីទប់ស្កាត់ពីពេលឥឡូវនេះទេ នៅចុងសតវត្សរ៍ទី២១នេះ សីតុណ្ហភាពមធ្យមនៃភពផែនដីនឹងត្រូវកើនឡើង ក្នុងចន្លោះពី ២ ទៅ ៦អង្សា។ នៅក្នុងពេលបច្ចុប្បន្ននេះ សីតុណ្ហភាពមធ្យមនៃភពផែនដីបានកើនឡើងជិត១អង្សារួចទៅហើយ បើធៀបនឹងកាលពីដើមសតវត្សរ៍ទី២០កន្លងទៅ។
គួរបញ្ជាក់ថា ការកើនឡើងសីតុណ្ហភាពមធ្យមនៃភពផែនដី១អង្សាមិនមែនមានន័យថា សីតុណ្ហភាពត្រូវកើនឡើង១អង្សានៅគ្រប់ទីកន្លែងទាំងអស់នោះទេ។ តំបន់ខ្លះសីតុណ្ហភាពកើនឡើង១អង្សា តំបន់ខ្លះ សីតុណ្ហភាពកើនឡើង ១០អង្សា ឬលើសពីនេះ ចំណែកឯតំបន់ខ្លះទៀតសីតុណ្ហភាពអាចត្រូវធ្លាក់ចុះត្រជាក់ជាងពេលមុនក៏មាន។ ហេតុដូច្នេះហើយបានជាគេតែងតែនិយាយអំពី “ការប្រែប្រួលអាកាសធាតុ”។ ការប្រែប្រួលខុសធម្មតានៃសីតុណ្ហភាពនេះ ជាពិសេស ការឡើងកម្តៅ គឺជាការគំរាមកំហែងដ៏ធំមួយ ដល់សុខភាពរបស់មនុស្ស ដូចដែលគេបានឃើញជាក់ស្តែងរួចទៅហើយ កាលពីពេលថ្មីៗនេះ គឺនៅក្នុងប្រទេសឥណ្ឌា និងប៉ាគីស្ថាន ដែលមានមនុស្សរហូតដល់ទៅរាប់ពាន់នាក់ត្រូវស្លាប់ ដោយសារតែអាកាសធាតុក្តៅខ្លាំង។
ផលប៉ះពាល់ដ៏ធំមួយទៀត ដែលអ្នកវិទ្យាសាស្រ្តតែងតែលើកឡើង គឺការកើនឡើងនៃកម្ពស់ទឹកសមុទ្រ ដែលបណ្តាលមកពីបាតុភូតពីររួមបញ្ចូលគ្នា។ ទីមួយ ទឹកគឺជាវត្ថុរាវ ដែលរីកមាឌ នៅពេលឡើងកម្តៅ។ ទីពីរ ការឡើងកម្តៅធ្វើឲ្យផ្ទាំងទឹកកកនៅតំបន់ប៉ូលត្រូវរលាយក្លាយជាទឹកហូរចូលទៅក្នុងទឹកសមុទ្រ។ កត្តាទាំងពីររួមបញ្ចូលគ្នា បង្កឲ្យកម្រិតកម្ពស់ទឹកសមុទ្រនៅទូទាំងពិភពលោកត្រូវកើនឡើង។ នៅពេលនោះប្រទេសដែលនឹងត្រូវប្រឈមមុខនឹងការគំរាមកំហែងខ្លាំងជាងគេ គឺបណ្តាប្រទេសដែលនៅជាប់នឹងសមុទ្រ ជាពិសេស គឺបណ្តាប្រទេសដែលជាកូនកោះ នៅកណ្តាលមហាសមុទ្រ។
យោងតាមការព្យាកររបស់អ្នកវិទ្យាសាស្រ្តជំនាញខាងអាកាសធាតុ ការឡើងកម្តៅនៃភពផែនដីអាចនឹងធ្វើឲ្យកម្រិតកម្ពស់ទឹកសមុទ្រនៅទូទាំងពិភពលោកកើនឡើងប្រមាណជាជិត១ម៉ែត្រ នៅចុងសតវត្សរ៍ទី២១នេះ។ នៅក្នុងពេលបច្ចុប្បន្ននេះ នៅទូទាំងពិភពលោកទាំងមូល មានមនុស្សប្រមាណជា ១០០លាននាក់ កំពុងរស់នៅតាមតំបន់ ដែលអាចទទួលរងការជន់លិច នៅពេលដែលកម្ពស់ទឹកសមុទ្រកើនឡើង១ម៉ែត្រ។
ផលប៉ះពាល់ដ៏ធ្ងន់ធ្ងរមួយទៀតនៃការឡើងកម្តៅផែនដី គឺការប្រែប្រួលខុសប្រក្រតីនៃអាកាសធាតុ ដែលនឹងបង្កឲ្យមានការកើនឡើងនូវបាតុភូតធម្មជាតិប្លែកៗ និងធ្ងន់ធ្ងរ ដូចជា គ្រោះរាំងស្ងួត អគ្គិភ័យ ទឹកជំនន់ ព្យុះសង្ឃារា ។ល។
អ្នកដែលងាយរងគ្រោះជាងគេ ពីផលប៉ះពាល់ដោយការប្រែប្រួលអាកាសធាតុនេះ គឺប្រជាជនដែលរស់នៅតាមបណ្តាប្រទេសក្រីក្រ ដោយសារតែពួកគេភាគច្រើនប្រកបរបរចិញ្ចឹមជីវិតដោយពឹងផ្អែកខ្លាំងលើធម្មជាតិ ហើយម្យ៉ាងទៀត បណ្តាប្រទេសក្រីក្រទាំងនេះមិនមានសមត្ថភាពគ្រប់គ្រាន់ ទាំងខាងផ្នែកហិរញ្ញវត្ថុ និងខាងផ្នែកបច្ចេកវិទ្យា ដើម្បីជួយប្រជាជនក្នុងការទប់ទល់ និងសម្របខ្លួនទៅនឹងការប្រែប្រួលអាកាសធាតុ។
ក្រៅពីបង្កការខូចខាតដល់មនុស្ស ការប្រែប្រួលអាកាសធាតុក៏អាចនឹងបង្កការខូចខាតយ៉ាងធ្ងន់ធ្ងរផងដែរដល់សត្វ និងរុក្ខជាតិមួយចំនួន ដែលត្រូវប្រឈមមុខនឹងការវិនាសផុតពូជ ដោយសារតែមិនអាចសម្របខ្លួនទៅនឹងការប្រែប្រួលលឿនហួសពីប្រក្រតីនៃអាកាសធាតុ។
បើនិយាយជារួមក្នុងផ្នែកសេដ្ឋកិច្ច យោងតាមការសិក្សាធ្វើឡើងដោយរដ្ឋាភិបាលអង់គ្លេស ការប្រែប្រួលអាកាសធាតុអាចនឹងធ្វើឲ្យសេដ្ឋកិច្ចពិភពលោកទាំងមូលត្រូវបាត់បង់កំណើនជាមធ្យម ក្នុងចន្លោះ ពី ៥% ទៅ ២០% ក្នុងមួយឆ្នាំៗ។ ផ្ទុយទៅវិញ កិច្ចខិតខំប្រឹងប្រែងក្នុងការទប់ស្កាត់ការប្រែប្រួលអាកាសធាតុ នឹងត្រូវចំណាយតែប្រមាណជា ១% ប៉ុណ្ណោះ នៃផលិតផលក្នុងស្រុកសរុបគិតជាមធ្យមនៅទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ