យានអវកាសរបស់ទីភ្នាក់ងារ NASA ធ្វើដំណើរទៅដល់កូនភពភ្លុយតុង
យានអវកាស ដែលទីភ្នាក់ងារអវកាស NASA បាញ់បង្ហោះកាលពី៩ឆ្នាំមុន បានធ្វើដំណើរទៅដល់កូនភពភ្លុយតុង ហើយនឹងត្រូវហោះកាត់ជិតបំផុត នៅថ្ងៃអង្គារខាងមុខ។ យានអវកាសនេះនឹងធ្វើការថតរូប ព្រមទាំងសិក្សាលម្អិត អំពីបរិយាកាស និងសណ្ឋានដីរបស់ភ្លុយតុង ដែលជាអតីតភពទី៩ នៃប្រព័ន្ធព្រះអាទិត្យ មុននឹងត្រូវគេបញ្ចុះឋានៈមកនៅត្រឹមជា “កូនភព” កាលពីចុងឆ្នាំ២០០៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
នៅថ្ងៃអង្គារ ទី១៤កក្កដា ប្រមាណជាម៉ោង ១២ថ្ងៃត្រង់ម៉ោងសកល (ត្រូវនឹងម៉ោង ៧ល្ងាចម៉ោងនៅប្រទេសកម្ពុជា) យានអវកាស ដែលមានឈ្មោះថា “New Horizon” នឹងហោះកាត់ ក្នុងរយៈចម្ងាយជិតបំផុត គឺប្រមាណត្រឹមតែ ១ម៉ឺនគីឡូម៉ែត្រប៉ុណ្ណោះ ពីកូនភពភ្លុយតុង ដែលស្ថិតនៅចម្ងាយប្រមាណជិត ៥ពាន់លានគីឡូម៉ែត្រពីភពផែនដី។
នេះគឺជាលើកដំបូងបង្អស់ក្នុងប្រវត្តិសាស្រ្ត ដែលមនុស្សអាចបញ្ជូនយានអវកាសទៅដល់ក្បែរភ្លុយតុង (ត្រូវបានគេរកឃើញដំបូងនៅឆ្នាំ១៩៣០) ក្នុងពេលដែលភពផ្សេងៗទៀត ក្នុងប្រព័ន្ធព្រះអាទិត្យ សុទ្ធតែធ្លាប់មានយានអវកាសហោះកាត់យ៉ាងតិចម្តងរួចមកហើយ។
នៅក្នុងល្បឿនលឿនរហូតដល់ទៅជិត ៥ម៉ឺនគីឡូម៉ែត្រក្នុងមួយម៉ោង យានអវកាស New Horizon អាចបានត្រឹមតែហោះកាត់ភ្លុយតុងប៉ុណ្ណោះ ដោយមិនអាចចុះចត ឬហោះក្នុងតារាវិថីជុំវិញភ្លុយតុងបាននោះទេ។ នេះមានន័យថា យានអវកាស New Horizon នឹងមានឱកាសតែម្តងប៉ុណ្ណោះនៅថ្ងៃអង្គារ ក្នុងការផ្តិតយករូបភាពក្នុងរយៈចម្ងាយជិតបំផុត ដើម្បីឲ្យអ្នកវិទ្យាសាស្រ្តអាចសិក្សាលម្អិតអំពីបរិយាកាស និងសណ្ឋានដីរបស់ភ្លុយតុង។
គួរបញ្ជាក់ថា នៅពេលដែលយានអវកាស New Horizon ត្រូវបានទីភ្នាក់ងារ NASA បាញ់បង្ហោះ នៅថ្ងៃទី១៩ ខែមករា ឆ្នាំ២០០៦ ភ្លុយតុង នៅមានឈ្មោះជាភពទី៩ នៃប្រព័ន្ធព្រះអាទិត្យនៅឡើយ។ ក៏ប៉ុន្តែ នៅខែកញ្ញា ឆ្នាំ២០០៦ សហភាពតារាវិទូអន្តរជាតិ (International Astronomical Union/Union astronomique internationale) បានសម្រេចបញ្ចុះឋានៈភ្លុយតុងឲ្យមកនៅត្រឹម “កូនភព” វិញ ដោយសារតែគេយល់ថា ភ្លុយតុងមានទំហំតូច ពោលគឺ មានទំហំប្រហាក់ប្រហែល ឬតូចជាងកូនភពខ្លះ ដែលគេទើបនឹងរកឃើញក្រោយៗមកទៀត នៅក្នុងប្រព័ន្ធព្រះអាទិត្យ។
ចាប់តាំងពីមានសេចក្តីសម្រេចរបស់សហភាពតារាវិទូអន្តរជាតិ នៅខែកញ្ញា ឆ្នាំ២០០៦នោះមក ប្រព័ន្ធព្រះអាទិត្យ ដែលពីមុនត្រូវបានគេកំណត់ថាមានភពចំនួន៩ ត្រូវបានបន្ថយមកនៅត្រឹម ៨ភពវិញ ហើយសៀវភៅសិក្សាចាស់ៗកាលពីមុនត្រូវក្លាយជាសៀវភៅហួសសម័យ ដែលតម្រូវឲ្យមានការកែប្រែឡើងវិញទាំងអស់។
ក៏ប៉ុន្តែ ភ្លុយតុង បើទោះបីជាត្រូវបានគេបញ្ចុះឋានៈពី “ភព” មកនៅត្រឹមជា “កូនភព” តែគេសង្កេតឃើញថា ចំណាប់អារម្មណ៍របស់អ្នកវិទ្យាសាស្រ្តចំពោះភ្លុយតុងមិនបានថយចុះនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ