អ្នកវិទ្យាសាស្រ្តថាជីវិតលើភពផែនដីកំពុង "ប្រឈមមុខនឹងការវិនាសផុតពូជ"
ភពផែនដីរបស់យើងកំពុងតែបោះជំហានចូលទៅក្នុងដំណាក់កាលនៃការវិវឌ្ឍដែលនាំឲ្យជីវិតមនុស្សសត្វត្រូវវិនាសផុតពូជ។ នេះគឺជាសេចក្តីសន្និដ្ឋានរបស់ក្រុមអ្នកវិទ្យាសាស្រ្តមកពីសកលវិទ្យាល័យល្បីៗរបស់អាមេរិក នៅក្នុងផ្សាយរបាយការណ៍ចេញផ្សាយ កាលពីថ្ងៃសុក្រ។ អ្នកវិទ្យាសាស្រ្តទាំងនេះបានលើកឡើងថា ដំណាក់កាលនៃការវិនាសផុតពូជនេះនឹងមានទំហំធំធេងបំផុត ចាប់តាំងពីការស្លាប់ផុតពូជសត្វឌីណូស័រ កាលពី ៦៥លានឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ក្រុមអ្នកជំនាញមកពីសកលវិទ្យាល័យដ៏ល្បីៗចំនួន ៣ នៅសហរដ្ឋអាមេរិក គឺសកលវិទ្យាល័យ Princeton, Stanford និង Berkeley បានធ្វើការសិក្សាទៅលើអត្រានៃការស្លាប់ផុតពូជនៃប្រភេទសត្វមួយចំនួន ដែលកំពុងកើតមានឡើងនៅក្នុងពេលបច្ចុប្បន្ន ហើយបានរកឃើញថា អត្រានៃការស្លាប់ផុតពូជសត្វនេះមានល្បឿនលឿនជាងធម្មតា រហូតដល់ទៅ ១១៤ដង។
ក្រុមអ្នកវិទ្យាសាស្រ្តបានលើកឡើងថា តាមរយៈការសិក្សានេះ គេអាចធ្វើការសន្និដ្ឋាន “ដោយគ្មានក្តីសង្ស័យ” ថា ពិភពលោកយើងកំពុងតែបោះជំហានចូលក្នុងដំណាក់កាលនៃការវិនាសផុតពូជសត្វទាំងអស់នៅទូទាំងផែនដី ហើយមនុស្សក៏អាចជាអ្នករងគ្រោះមួយដែរ នៅក្នុងហេតុការណ៍នេះ។
គួរបញ្ជាក់ថា បើយោងតាមការសិក្សារបស់អ្នកវិទ្យាសាស្រ្ត នៅក្នុងប្រវត្តិភពផែនដី រយៈពេល ៤ពាន់៥រយលានឆ្នាំកន្លងទៅនេះ ហេតុការណ៍ស្លាប់វិនាសផុតពូជសត្វនៅទូទាំងផែនដី ធ្លាប់បានកើតមានឡើងចំនួន ៥ដងមកហើយ។ ហេតុការណ៍ស្លាប់ផុតពូជធំជាងគេលើកចុងក្រោយបង្អស់ គឺការស្លាប់ផុតពូជសត្វឌីណូស័រ កាលពី ៦៥លានឆ្នាំមុន ដែលគេសង្ស័យថាបណ្តាលមកពីអាចម៍ផ្កាយដ៏ធំសម្បើមមួយ ដែលបានធ្លាក់មកលើភពផែនដី គឺនៅត្រង់ម្តុំប្រទេសម៉ិចស៊ិកបច្ចុប្បន្ន។
ចំណែកឯការស្លាប់ផុតពូជសត្វ ដែលភពផែនដីកំពុងប្រឈមមុខនៅក្នុងពេលបច្ចុប្បន្ននេះ បើយោងតាមរបាយការណ៍ដែលត្រូវបានចុះផ្សាយនៅលើព្រឹត្តិបត្រវិទ្យាសាស្រ្តឈ្មោះ “Science Advances” គឺបណ្តាលមកពីមូលហេតុចម្បងៗមួយចំនួន ដែលមានជាប់ទាក់ទងនឹងសកម្មភាពរបស់មនុស្សខ្លួនឯងផ្ទាល់ រួមមានដូចជា ការប្រែប្រួលអាកាសធាតុ ការបំពុលបរិស្ថាន និងការកាប់បំផ្លាញព្រៃឈើ ជាដើម។
ហេតុដូច្នេះហើយបានជានៅក្នុងរបាយការណ៍នេះ ក្រុមអ្នកវិទ្យាសាស្រ្តបានធ្វើការអំពាវនាវឲ្យមានការចាត់វិធានការជាបន្ទាន់ ដើម្បីអភិរក្សប្រភេទសត្វដែលកំពុងប្រឈមមុខនឹងការស្លាប់ផុតពូជដោយសារការបាត់បង់ព្រៃឈើដែលជាទីជម្រក ការធ្វើអាជីវកម្មសេដ្ឋកិច្ចហួសព្រំដែន និងការប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ