អង្គការសិទ្ធិមនុស្សទាមទារអោយរដ្ឋាភិបាលអាហ្វហ្កានីស្ថានការពារអ្នកកាន់និកាយស្ហ៊ីអ៊ីត
ថ្ងៃអង្គារនេះ អង្គការសិទ្ធិមនុស្សជាច្រើនបានទាមទារអោយរដ្ឋាភិបាលអាហ្វហ្កានីស្ថាន ការពារសុវត្ថិភាពសន្តិសុខសហគមន៍អ្នកកាន់និកាយស្ហ៊ីអ៊ីត ដែលជាផ្ទាំងស៊ីបរបស់ក្រុមភេរវជន។ ការទាមទារនេះធ្វើឡើងក្រោយមានភេរវកម្មនៅវិហារស្ហ៊ីអ៊ីត ក្រុងកាប៊ូល សម្លាប់មនុស្សយ៉ាងហោច២៧នាក់ កាលពីថ្ងៃចន្ទ។
ចុះផ្សាយនៅថ្ងៃ៖
ស្តាប់ - ០១:២៤
កាលពីថ្ងៃចន្ទ ក្រុមជីហាតរដ្ឋអ៊ីស្លាមបានបង្កការវាយប្រហារប្រឆាំងនឹងវិហារស្ហ៊ីអ៊ីតមួយ កន្លែង នៅក្រុងកាប៊ូល អាហ្វហ្កនីស្ថាន សម្លាប់មនុស្សយ៉ាងហោច២៧នាក់។ ស្ត្រីនិងកុមារច្រើននាក់បានរងរបួស។ ភេរវកម្មនេះ កើតឡើងក្នុងពេលសហគមន៍និកាយស្ហ៊ីអ៊ីតកំពុងតែរៀបចំធ្វើពិធីបុណ្យសាសនារបស់ពួកគេ។ គិតសម្រាប់៤ខែមកនេះ នេះជាភេរវកម្មទី៣ហើយធ្វើឡើងប្រឆាំងអ្នកកាន់និកាយស្ហ៊ីអ៊ីត។
អង្គការសិទ្ធិមនុស្សបានទាមទាររដ្ឋាភិបាលអាហ្វហ្កានីស្ថានអោយការពារសហគមន៍និកាយស្ហ៊ីអ៊ីត អោយមានប្រសិទ្ធភាព។ សម្រាប់អង្គការ Human Rights Watch ក្រុមរដ្ឋអ៊ីស្លាមវាយប្រហារអ្នកកាន់និកាយស្ហ៊ីអ៊ីត ធ្វើអោយកន្លែងណាក៏ជាកន្លែងមានគ្រោះថ្នាក់ដែរ។ អង្គការ Amnesty International វិញ បានលើកឡើងថា អាជ្ញាធរអាហ្វហ្កានីស្ថានមានកាតព្វកិច្ចការពារអោយមានប្រសិទ្ធភាព នូវសុវត្ថិភាពអ្នកកាន់សាសនាអ៊ីស្លាមស្ហ៊ីអ៊ីត។
អាជ្ញាធរកំពុងស៊ើបអង្កេតភេរវកម្ម ប្រឆាំងវិហារនិកាយស្ហ៊ីអ៊ីត កាលពីថ្ងៃចន្ទ។ ក្រសួងមហាផ្ទៃប្រាប់ថា បានព្យួរតំណែងមន្ត្រីប៉ូលិសមួយចំនួន ក្រោយភេរវកម្មនេះ។ ថ្ងៃអង្គារម្សិលមិញ ក្រុមមនុស្សដែលបានបញ្ចុះសពជនរងគ្រោះបានបរិហាររដ្ឋាភិបាលថា អសមត្ថភាពការពារសុវត្ថិភាពពួកគេ។
គួររំលឹកថា កាលពីថ្ងៃ១៣តុលាកន្លងទៅ ក្រុមជីហាតរដ្ឋអ៊ីស្លាមបានបង្កភេរវកម្មជាច្រើន ប្រឆាំងអ្នកកាន់និកាយស្ហ៊ីអ៊ីតនៅអាហ្វហ្កានីស្ថាន នៅកាប៊ូល និងនៅក្រុង ម៉ាហ្សា អ៊ីស្ហារីហ្វ ភាគខាងជើង សម្លាប់មនុស្សជាង៣០នាក់។ កាលពីថ្ងៃ២៣កក្កដា ក្រុមរដ្ឋអ៊ីស្លាមបានបង្កភេរវកម្មប្រឆាំងបាតុកម្មសហគមន៍ហាហ្សារ៉ា ធ្វើអោយមនុស្សស្លាប់៨៥នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ