គណៈកម្មាធិការសិទ្ធិមនុស្សកម្ពុជាថាស្ថានភាពសិទ្ធិមនុស្សនៅកម្ពុជាល្អ បើប្រៀបធៀបក្នុងតំបន់
គណៈកម្មាធិការសិទ្ធិមនុស្សកម្ពុជា ដែលជាស្ថាប័នមួយរបស់រដ្ឋាភិបាលបានឲ្យដឹងថា ស្ថានភាពសិទ្ធិមនុស្សក្នុងប្រទេសកម្ពុជាល្អជាងប្រទេសផ្សេងទៀតក្នុងតំបន់ តាមការវាយតម្លៃជាទូទៅ។ នេះបើតាមសមាជិកគណៈកម្មាធិការសិទ្ធិមនុស្សកម្ពុជា នៅថ្ងៃទី២៧ ខែសីហានេះ។ ចំណែកមន្ត្រីអង្គការលីកាដូថា ស្ថានភាពសិទ្ធិមនុស្សនៅកម្ពុជាធ្លាក់ចុះធ្ងន់ធ្ងរប្រៀបធៀននឹងឆ្នាំមុនៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
លោកកត្តា អ៊ន សមាជិកគណៈកម្មាធិការសិទ្ធិមនុស្សកម្ពុជា បានប្រាប់វិទ្យុបារាំងនៅព្រឹកថ្ងៃទី២៧ សីហាថា រយៈពេល៧ខែមកនេះ ស្ថានភាពសិទ្ធិមនុស្សក្នុងប្រទេសកម្ពុជាល្អ ប្រៀបធៀបនឹងប្រទេសជិតខាង។ លោកបញ្ជាក់ថា កម្ពុជាមិនមាន(បញ្ហា)អ្វីជាដុំកំភួនទេ ទោះបីជាមានភាពមិនប្រក្រតីមួយចំនួនបានកើតឡើងក្នុងរយៈពេលកន្លងមក។ ប៉ុន្តែ(ករណី)ទាំងអស់នេះជារឿងតុលាការ ជារឿងព្រហ្មទណ្ឌ ជារឿងបទល្មើស ដែលជារឿងអ្នកនយោបាយវាមិនមែនជារឿងនយោបាយនោះទេ។ លោកបន្ថែមថាវាជារឿងអ្នកនយោបាយប្រព្រឹត្តិបទល្មើស។
កាលពីថ្ងៃទី១៨ សីហា កន្លងទៅនេះអង្គការសិទ្ធិមនុស្សជាតិ និងអន្តរជាតិប្រមាណ១២ ស្ថាប័នបានដាក់លិខិចំហមួយទៅកាន់សមាជិកអចិន្ត្រៃយ៍នៃក្រុមប្រឹក្សាសិទ្ធិមនុស្សអង្គការសហប្រជាជាតិ ដើម្បីឲ្យស្ថាប័នរបស់អង្គការសហប្រជាជាតិមួយនេះ ដោះស្រាយបញ្ហាសិទ្ធិមនុស្សនៅក្នុងប្រទេសកម្ពុជា។ ក្នុងលិខិតចំហនោះអាង្កការទាំង១២ បានដាក់អនុសាសន៍របស់ខ្លួនចំនួន១៣ចំណុច ដើម្បីជំរុញឲ្យរដ្ឋាភិបាលកម្ពុជាកែប្រែសកម្មភាពរបស់ខ្លួនជាបន្ទាន់ ដើម្បីរក្សាកេរ្តិ៍ដំណែលកិច្ចព្រមព្រៀងសន្តិភាពទីក្រុងប៉ារីស។
លោកកត្តា អ៊ន បានលើកឡើងថាការដាក់លិខិតចំហនេះ គឺជាសិទ្ធិសេរីភាពរបស់អង្គការទាំងនោះ ប៉ុន្តែកម្ពុជាគឺជារដ្ឋឯករាជ្យ មានអធិបតេយ្យ ហើយកាតព្វកិច្ចនៃការអន្តរាគមទៅលើរដ្ឋអធិបតេយ្យណាមួយ ជារឿងសម្រេចរបស់ក្រុមប្រឹក្សាសិទ្ធិមនុស្ស ប៉ុន្តែសា្ថនភាពសិទ្ធិមនុស្សនៅកម្ពុជាល្អ។
លោកបណ្ឌិត មាស នី អ្នកវិភាគនយោបាយ និងជាអ្នកឃ្លាំមើលសង្គមបានបញ្ជាក់ថា កម្ពុជានៅមានបញ្ហាច្រើនទាក់ទងនឹងសិទ្ធិមនុស្សនៅកម្ពុជា ដូចជាការបង្រ្កាបទៅលើមហាជន ដែលទាមទាររកយុតិ្តធម៌រឿងដីធ្លី និងការដាក់ទោសសកម្មជនផ្សេងៗជាដើម។ លោកបន្ថែមថារដ្ឋាភិបាលមិនងាយនឹងទទួលយកការរិះគន់ពីខាងក្រៅទេ ប៉ុន្តែបើស្តាប់ពីរបាយការណ៍ស្ថាប័នអន្តរជាតិ ក៏ដូចជាអង្គការសហប្រជាជាតិ បានសម្តែងការព្រួយបារម្ភជាបន្តបន្ទាប់ចំពោះបញ្ហាសិទ្ធិមនុស្សនៅកម្ពុជា។
លោកអំ សំអាតអ្នកគ្រប់គ្រងបច្ចេកទេសស៊ើបអង្កេតនៃអង្គការ លីកាដូបានឲ្យដឹងថា ស្ថានភាពសិទ្ធិមនុស្សនៅកម្ពុជាធ្លាក់ចុះធ្ងន់ធ្ងរ បើប្រៀបធៀបនឹងឆ្នាំមុនៗ ហើយទិដ្ឋភាពបច្ចុប្បន្នមានការបាញ់សម្លាប់អ្នកវិភាគសង្គម អ្នកដែលរិះគន់មួយចំនួនត្រូវបានជាប់បណ្តឹងនៅតុលាការ ហើយមន្ត្រីសិទ្ធិមនុស្សក៏ត្រូវបានជាប់ឃុំ គណបក្សប្រឆាំងក៏ត្រូវបានជាប់ឃុំជាហូរហែ រួមទាំងការឃុំខ្លួនសមាជិកព្រឹទ្ធសភា សមាជិករដ្ឋសភា ដោយមិនទាន់ដក់អភ័យឯកសិទ្ធិជាដើម។ លោកបន្ថែមថាករណីទាំងនេះហើយ ដែលធ្វើឲ្យមានការរិះគន់ពីមតិជាតិ និងអន្តរជាតិ។
គួររំលឹកជូនថាកាលពីខែមិនា កន្លងទៅលោកស្រីរ៉ូណា ស្មីត អ្នករាយការណ៍ពិសេសអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា បានបញ្ជាក់ថា ស្ថានការណ៍នយោបាយដែលរាប់ទាំង ការគំរាមកំហែងជាថ្មី កិច្ចដំណើរការនីតិវិធីរបស់តុលាការ និងសូម្បីតែការវាយដំលើរាងកាយរបស់សមាជិក គណបក្សប្រឆាំង គឺសុទ្ធតែជាការព្រួយបារម្ភ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ