នាឱកាសទស្សនកិច្ចរបស់លោកនាយករដ្ឋមន្ត្រីចិន លី ខឺឈាំង នៅប្រទេសក្រិក សប្តាហ៍នេះ មានកិច្ចព្រមព្រៀង សហប្រត្តិបត្តិការជាច្រើន មានអាទិ៍ ផ្នែកភស្តុភារ ថាមពល ដឹកជញ្ជូនផ្លូវសមុទ្ទ អចលនាទ្រព្យ ការនាំចេញស្រា និងប្រេងអូលីវ ត្រូវចិននិងក្រិកបានចុះកិច្ចព្រមព្រៀងរវាងគ្នា។ មិនតែប៉ុណ្ណោះ អាជ្ញាធរប៉េកាំងបានលើកចិត្តឱ្យក្រុមហ៊ុនសហគ្រាសចិន ចូលរួមចំណែកធ្វើឯកជនភាវូបនីកម្មប្រទេសក្រិកផង។ តាំងពីមានផ្ទុះ វិបត្តិហិរញ្ញវត្ថុមក ជាពិសេសនៅពេលដែលរដ្ឋាភិបាលក្រិកបានដាក់លក់ក្រុមហ៊ុនរដ្ឋឱ្យឯកជនមក ចិនបានសម្រុកចូលធ្វើវិនិយោគនៅក្នុងប្រទេសនេះ និងចង់ដើរតួជាជើងឯក នៅក្នុងប្រទេសដែលជាមាត់ច្រកចូលអឺរ៉ុប។
នៅឆ្នាំ១៩៧២ ចិននិងក្រិក ផ្តោះប្តូរពាណិជ្ជកម្មនឹងគ្នាក្នុងទំហំទឹកប្រាក់ ១លានដុល្លារប៉ុណ្ណោះ។ មកដល់ឆ្នាំ២០១២ ការផ្តោះប្តូរបានកើនឡើង២៥០% ពោលគឺស្មើនឹងប្រមាណ៤ពាន់លានដុល្លារ។ នៅពីរឆ្នាំខាងមុខប្រទេសទាំងពីរសង្ឃឹមពង្រីកទីផ្សារមួយទ្វេជាពីរ។ អំបោះកូតុង ថ្មម៉ាប ស្រា សុទ្ធសឹងជាផលិតផលដែលចិនស្រក់ទឹកមាត់ចង់បានពីក្រិក។ លើសពីនេះទៅទៀត នៅក្នុងវិស័យឧស្សាហកម្មគ្រាន់តែក្នុងរវាងពីឆ្នាំ២០០៦-២០១០ ចិនបានបង្កើនសកម្មភាពវិនិយោគ ជាមួយក្រិក ពីមួយទៅមួយពាន់។
ក្រិកមិនមែនត្រឹមតែមានទីតាំងភូមិសាស្ត្រល្អ ជាច្រកទ្វារសម្រាប់បើកដើរចូលអឺរ៉ុបប៉ុណ្ណោះទេ តែក៏ជាច្រកផ្លូវ អាចនាំចិនឱ្យងាយចូលទៅកាន់តំបន់សមុទ្ទ ខ្មៅ និងតំបន់បាល់កង់។ ទីតាំងដ៏ល្អនេះ ត្រូវបានចិនសំឡឹងចង់បាន និងចង់ក្រសោបយកដើម្បី ធ្វើវិនិយោគបានច្រើនក្នុងវិស័យថាមពល និងដឹកជញ្ជូន។
យើងបានដឹងហើយថា ក្រោយពីឆ្លងកាត់វិបត្តិដ៏ធ្ងន់ធ្ងរ ប្រឈមនឹងការក្ស័យធនយ៉ាងត្រដាបត្រដួសនោះ ក្រិកត្រូវស្ថិតនៅក្រោមសម្ពាធអន្តរជាតិ ជាក់ស្តែងសម្ពាធពីគណៈកម្មការអឺរ៉ុប ពីធនាគារកណ្តាលអឺរ៉ុប និងពីមូលនិធិរូបិយវត្ថុអន្តរជាតិ ដែលទាមទារឱ្យក្រុងគែរធ្វើកំណែទម្រង់។ កាលពីឆ្នាំ២០១២ ក្រិកត្រូវបង្ខំចិត្តធ្វើឯកជនភាវូបនីកម្ម ក្រុមហ៊ុនរដ្ឋក្នុងទ្រង់ទ្រាយធំ ដោយត្រូវលក់ក្រុមហ៊ុនធំៗចំនួន២៨។ លក់ក្រុមហ៊ុនឱ្យឯកជន ដែលចិនចង់បានបំផុត និងចង់ក្លាយជាប្រទេសទីមួយ មានក្រុមហ៊ុនក្នុងប្រទេសក្រិកនេះ។ ចិនត្រូវប្រកួតប្រជែងខ្លាំងជាមួយរុស្ស៊ី ដែលចង់បានក្រុមហ៊ុនផ្លូវដែកដែរ។ ចំណែកក្រិកវិញ ចង់ផ្តល់ក្រុមហ៊ុនទេសចរណ៍ និងសំណង់ទៅឱ្យចិនគ្រប់គ្រង ព្រោះឃើញមានលក្ខណៈប្រកួតប្រជែងខ្លាំង។
ប៉ុន្តែគឺក្នុងវិស័យកំពង់ផែ ដែលចិនបានជោគជ័យខ្លាំង។ តាំងពី ៦ឆ្នាំមកហើយ ដែលកំពង់ផែទីមួយ របស់ក្រិក នៅទីក្រុងអាថែន ធ្វើសមាហរណកម្មជាមួយចិន។ ក្រុមហ៊ុនចិនCosco ដែលជាលើកទីមួយ បានទទួលសិទ្ធិរកស៊ី និងគ្រប់គ្រងកំពង់ផែ ជាមួយកិច្ចសន្យារយៈពេលដ៏វែងមិនធ្លាប់មាន គឺដល់ទៅ៣៥ឆ្នាំ។ ក្រុមហ៊ុនយក្សចិន បានមកតាំងទីនៅក្រិកនេះ ជាផ្លូវការនៅឆ្នាំ២០១០។ ការធ្វើសមាហរណកម្មកំពង់ផែ ពីរ៉ាអ៊ឺស បានទទួលការស្វាគមន៍ និងពេញចិត្តទាំងពីរភាគី ព្រោះថា វត្តមានចិននេះ បានជួយលើកស្ទួយសេដ្ឋកិច្ចតំបន់ផង ទីផ្សារការងារផង ដែលក្រិកទើបងើបពីវិបត្តិត្រូវការបំផុត។ សកម្មភាពកំពង់ផែ ដែលមានបុគ្គលិកសរុប៧៥០នាក់ មានប្រើកម្លាំងពលកម្មចិនតែ ៨នាក់ប៉ុណ្ណោះ ដូច្នេះគេអាចចាត់ទុកថា ជាក្រុមហ៊ុនក្រិកពិតៗ។ ចំណែកខាងចិនវិញ បានចំណេញទាំងប្រាក់ចំណូល ទាំងរូបភាព។ ចិន ត្រូវការចង់បានពាក្យថា "Made in Europe” ដូច្នេះ គេយកផ្នែកណាមួយនៃផលិតផលឱ្យធ្វើនៅអឺរ៉ុប ដើម្បីកុំឱ្យអស់ថ្លៃការងារច្រើន តែបានចំណេញឈ្មោះ ព្រោះចេញពីអឺរ៉ុប ពោលគឺឆ្លើយតបបានទៅនឹងបទដ្ឋានអឺរ៉ុប។
ឥលូវពេលនេះ កំពង់ផែ ក៏មានឈ្មោះក្នុងបញ្ជីត្រូវធ្វើឯកជនភាវូបនីកម្ម។ ក្រុមហ៊ុនកូស្កូ សព្វថ្ងៃមានភាគហ៊ុនសិទ្ធិគ្រប់គ្រងប្រមាណ៦៧% ។ ដោយមានកំពង់ផែក្រុងអាថែនជាគំរូ កំពង់ផែ និងអាកាសយានដ្ឋានតំបន់ ចំនួន១២ទៀត ក៏កំពុងដាក់លក់ឱ្យឯកជនដែរ ព្រោះរដ្ឋាភិបាលក្រិកត្រូវការគោរពកិច្ចសន្យាជាមួយម្ចាស់បំណុល ក្នុងនោះមានពីរកន្លែងដែលលោកនាយករដ្ឋមន្ត្រីចិន លី ខឺឈាំង អមដោយក្រុមអ្នកវិនិយោគគ្រាក់អមដំណើរទៅជាមួយផង។ នេះមិនមែនមានន័យថា ចិនកំពុងសំឡក់ចង់ក្រសោបកំពង់ផែ ក្រិកបន្ថែមទៀតទេឬ ?!
កំពង់ផែ ឧស្សាហកម្មនាវាដឹកជញ្ជូន គឺជាវិស័យដ៏សំខាន់របស់ក្រិក និងមានឈ្មោះបោះសំឡេងនៅលើពិភពលោក។ ក្រិកជាទីផ្សារផលិតនាវាទំនិញដ៏ធំ ជាអ្នកដែលមានបទពិសោធន៍ការងារខ្លាំង បូកផ្សំនឹងចិនពូកែខាងធ្វើពាណិជ្ជកម្មទំនិញ គឺអាចបំពេញគ្នាទៅមកបានយ៉ាងប្រសើរ។ វិបត្តិហិរញ្ញវត្ថុឆ្នាំ២០០៨ និងវិបត្តិប្រាក់បំណុល នៅឆ្នាំ២០១០ បានធ្វើឱ្យឧស្សាហកម្មនាវាដឹកជញ្ជូនក្រិក មានរងគ្រោះយ៉ាងខ្លាំង ប៉ុន្តែវិស័យនេះ បានចាប់រើបឡើងវិញមុនគេគួរឱ្យកត់សម្គាល់ ដែលចិនមិនឱ្យរំលងខាតចោលឡើយ។
ចិនមើលឃើញប្រយោជន៍ពី ក្រិក មិនមែនចាប់ត្រឹមពីក្រិកមានវិបត្តិហិរញ្ញវត្ថុទេ។ តាំងពីឆ្នាំ ២០០៥ មក រដ្ឋាភិបាលស្តាំនិយមក្រិក បានបក់ដៃហៅចិន។ ហើយនៅឆ្នាំ២០០៦ ក្រុមហ៊ុនចិនក៏ផ្តើមចុះទៅក្រិក។ អតីតនាយករដ្ឋមន្ត្រីចិន វេន ជាប៉ាវ បានមកបំពេញទស្សនកិច្ចនៅក្រិកកាលពីឆ្នាំ២០១០ ក្នុងពេលក្រិកធ្លាក់គ្រោះជំពាក់បំណុល ជាមួយនឹងការចុះកិច្ចសន្យាសេដ្ឋកិច្ចជាច្រើន។ ហើយថ្ងៃនេះនាយករដ្ឋមន្ត្រីចិនថ្មី លោក លីខឺឈាំង បានផ្តល់សារៈសំខាន់ថ្មី និងទំនុកចិត្តថ្មីដល់ក្រិក តាមរយៈដំណើរទស្សនកិច្ចដែលមានការចុះហត្ថលេខាព្រមព្រៀផងធ្វើសហប្រតិបត្តិការ តម្លៃ៨៨០០លានដុល្លារ ក្នុងវិស័យហិរញ្ញវត្ថុ នាវាដឹកជញ្ជូន និងការនាំចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ