ប៉េកាំង ថានឹងពិនិត្យជាថ្មីចំពោះយន្តការជ្រើសរើសថ្នាក់ដឹកនាំហុកកុង
រដ្ឋអំណាចចិន ប្រកាសនៅថ្ងៃទី១វិច្ឆិកាថានឹង«ធ្វើឱ្យប្រសើរឡើង»នូវបែបបទយន្តការជ្រើសរើសប្រមុខដឹកនាំហុងកុង។ ចំពោះពាក្យថាការ«ធ្វើឱ្យប្រសើរឡើង»នេះ គេមិនដឹងប្រាកដជាក់ច្បាស់ថា រដ្ឋអំណាចចិននឹងចង់ធ្វើអ្វីឱ្យប្រាកដនោះទេ! តែអាជ្ញាធរចិន គ្រាន់តែបង្ហើបថា «នឹងជំរុញយន្តការប្រជាធិបតេយ្យនៅហុងកុង ប៉ុន្តែហាមដាច់ខាតចំពោះសកម្មភាពទាំងឡាយណា ដែលគំរាមកំហែងដល់សន្តិភាព និងសន្តិសុខផ្ទៃក្នុង»។
ចុះផ្សាយនៅថ្ងៃ៖
ន័យសេចក្តីដែលថា «ជំរុញធ្វើឱ្យប្រសើរឡើង»ចំពោះស្ថានការណ៍ហុងកុង ទាំងផ្លូវនយោបាយនិងផ្លូវច្បាប់ហុងកុងនេះ គឺគេលំបាកនឹងបកស្រាយណាស់ តែបើតាមអ្នកជំនាញកិច្ចការហុងកុង គេសង្ស័យថា រដ្ឋអំណាចចិន ទំនងជាចង់ផ្លាស់ប្តូរក្បាលម៉ាស៊ីនដឹកនាំហុកកុង ពិតមែនហើយ ដើម្បីបន្ធូរ សម្រាលស្ថានការណ៍ដ៏តានតឹង នៅហុងកុង ដែលធ្លាក់ក្នុងវិបត្តិបាតុកម្ម ជាង៤ខែមកនេះ។ ចំណុចនេះ ក៏ត្រូវបានគេសង្ស័យ និងមានរាយការណ៍ដោយកាសែតអង់គ្លេស រួចមកហើយដែរ។
ការជំរុញឱ្យប្រសើរឡើង នៅផ្លូវនយោបាយប្រជាធិបតេយ្យ និងផ្លូវច្បាប់ នៅហុងកុង គឺជាខ្លឹមសារនៃសេចក្តីសម្រេចថ្នាក់កំពូល ចេញពីការិយាល័យនយោបាយរបស់បក្សកុម្មុយនីស្តចិន ដែលមានមេៗដឹកនាំក្នុងរចនាសម្ព័ន្ធកំពូលៗរបស់បក្ស ចំនួន៣៧០នាក់ ជាអ្នកសម្រេច។ ការសម្រេចនេះ គឺបន្ទាប់ពីបានធ្វើកិច្ចប្រជុំបិទទ្វារជិតឈឹង អស់ពេល៤ថ្ងៃនេះ នៅកណ្តាលក្រុងប៉េកាំង។ ក្នុងសេចក្តីថ្លែងជាផ្លូវការ ប្រកាសក្រោយពីអង្គប្រជុំ គឺបញ្ជាក់ថា«ហុងកុងកំពុងជួបសភាពការណ៍ស្មុគស្មាញខ្លាំង ប្រឈមនឹងហានិយភ័យខ្ពស់បំផុតដែលអាចប៉ះពាល់ដល់សន្តិសុខជាតិ ដូច្នេះ ត្រូវពង្រឹកឡើងវិញ ស្មារតីមនសិការជាតិ និងសុឆន្ទៈស្នេហាជាតិ»។
មន្ត្រីជាន់ខ្ពស់ចិន លោក Shen Chunyao អ្នកទទួលបន្ទុកកិច្ចការហុងកុងនិងម៉ាកាវ បានចេញមុខធ្វើសន្និសីទកាសែត ថា «ការជំរុញឱ្យប្រសើរឡើង ចំពោះប្រព័ន្ធផ្លូវច្បាប់ គឺដើម្បីរក្សាសន្តិសុខជាតិ ដែលអនុលោមទៅតាមធម្មនុញ្ញជាមូលដ្ឋានរបស់ហុងកុង។ ហើយទាំងនេះ ចាំបាច់ត្រូវបង្រៀនសង្គមហុងកុងបន្ថែមទៀតនិងបង្រៀនឡើងវិញ ពីប្រវត្តិសាស្ត្រនិងវប្បធម៌ចិន ទៅដល់យុវជនហុងកុង»។ នៅក្នុងន័យនេះ ថ្នាក់ដឹកនាំចិនរូបនេះ ទំនងជាចង់សំដៅដល់ ធម្មនុញ្ញជាមូលដ្ឋានរបស់ហុងកុង មានចែងច្បាស់ហើយថា ហុងកុងជាផ្នែកមួយរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ