អាជ្ញាធរហុងកុងចាប់ផ្តើមបោសសំអាតជំរំបាតុករ
នៅថ្ងៃអង្គារទី ១៨ វិច្ឆិកានេះ អាជ្ញាធរហុងកុងបានបោសសំអាតជំរំសំខាន់របស់ក្រុមអ្នកតវ៉ាគាំទ្រលទ្ធិប្រជាធិបតេយ្យ ដែលជាការចាត់វិធានការដំបូង នៃគំរោងបណ្តេញក្រុមបាតុករ ដែលបានចូលមកកាន់កាប់ផ្លូវសាធារណៈសំខាន់ៗអស់រយៈពេលជាច្រើនសប្តាហ៍មកហើយ។
ចុះផ្សាយនៅថ្ងៃ៖
ប៉ូលីស និងអាជ្ញាសាលាក្រុងហុងកុងជាច្រើននាក់ បានដករបាំងចេញពីខាងក្រៅអគារ CITIC កំពស់៣៣ជាន់ ដែលត្រូវបានក្រុមអ្នកតវ៉ា យកធ្វើជាជំរំអស់រយៈពេលជាច្រើនសប្តាហ៍មកហើយ។ ក៏ប៉ុន្តែ ជម្លោះបានកើតមានឡើង នៅខណៈដែលក្រុមប៉ូលីសបានដករបាំងចេញពីតំបន់នៅជិតៗនោះបន្ថែមទៀត ហើយក្រុមបាតុករក៏បានសែ្រកឡើងថា តំបន់នោះមិនស្ថិតក្រោមបញ្ជាឲ្យរុះរើនោះទេ។
មេដឹកនាំក្រុមបាតុករបានស្រែកតាមឧឃោសនស័ព្ទថា ក្រុមបាតុករមិនអាចទទួលយកទង្វើររបស់អាជ្ញាធរនៅពេលនេះបានទេ។ មេដឹកនាំរូបនេះ បានបន្តថា តុលាការបានបញ្ជាឲ្យដករបាំងដែលនៅជុំវិញអគារ CITIC តែប៉ុណ្ណោះ ហើយតំបន់នៅក្បែរនោះគឺនៅរក្សាសម្រាប់ក្រុមបាតុករដដែល។
ក្រុមបាតុករគាំទ្រលទ្ធិប្រជាធិបតេយ្យបានបោះជំរំលើផ្លូវសាធារណៈសំខាន់ៗចំនួន៣ ក្នុងទីក្រុងហុងកុងចាប់តាំងពីថ្ងៃទី ២៨ កញ្ញាមក ដើម្បីទាមទារឲ្យក្រុងប៉េកាំងផ្តល់ការបោះឆ្នោតជ្រើសរើសមេដឹកនាំដោយសេរីដល់ក្រុងស្វយ័តរបស់ចិនមួយនេះ។
ក្រុងប៉េកាំងបាននិយាយថា ខ្លួននឹងអនុញ្ញាតឲ្យមានការបោះឆ្នោតជាសកល ដើម្បីជ្រើសរើសមេដឹកនាំនៅហុងកុងនៅឆ្នាំ ២០១៧ខាងមុខនេះ ប៉ុន្តែបានទទូចថា រាល់បេក្ខជនដែលឈរឈ្មោះបោះឆ្នោតត្រូវតែត្រួតពិនិត្យដោយក្រុមអ្នកមានភក្តីភាព។
សូមបញ្ជាក់ថា ប្រតិបត្តិការបោសសំអាតនៅថ្ងៃអង្គារនេះ គឺជាប្រតិបត្តិការលើកទី១ ក្នុងចំណោមបទបញ្ជាចំនួន ៣ របស់តុលាការ ស្របទៅតាមបណ្តឹងរបស់ក្រុមហ៊ុនឯកជន និងសមាគមជាច្រើន ក្នុងគោលបំណង ដើម្បីបង្រួញកន្លែងកាន់កាប់របស់ក្រុមបាតុករ។ កន្លែងដែលត្រូវបោសសំអាតជាលើកទីពីរ និងទីបី និងត្រូវធ្វើឡើងជាបន្តទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ