ហុងកុង៖ បាតុករម្នាក់ត្រូវដុតខ្លួន និងម្នាក់ទៀត ត្រូវប៉ូលិសបាញ់ដោយប្រើគ្រាប់ពិត
នៅថ្ងៃច័ន្ទ ទី១១វិច្ឆិកា ប៉ូលិសហុងកុង បានបាញ់កាំភ្លើងប្រើគ្រាប់ពិត ទៅលើបាតុករ។ បើប្រភពពីសមត្ថកិច្ចហុងកុង, បុរសម្នាក់ដែលត្រូវប៉ូលិសបាញ់ ពេលនេះកំពុងត្រូវសង្គ្រោះព្យាបាលនៅមន្ទីរពេទ្យ។ ការប៉ះទង្គិចបង្ហូរឈាមនេះ គឺកើតនៅក្នុងសង្កាត់ សាយ វ៉ាន់ ហូ (Sai Wan Ho) ជាប់ក្បែរនឹងហាងទំនិញមួយកន្លែង ដែលក្រុមបាតុករ បានចោមរោមគ្នាបិតហាង។ មិនយូរប៉ុន្មានពីហេតុការណ៍ គឺមានបាតុករមួយរូបទៀត ត្រូវគេដុតឆេះខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
នេះជារឿងដ៏កម្រដែលប៉ូលីសហុងកុងបាញ់ដោយប្រើគ្រាប់កំាំភ្លើងពិតទៅលើបាតុករ គិតចាប់តាំងពីបាតុកម្មប្រឆាំងរដ្ឋបាលហុងកុង ប្រមាណ៥ខែមកនេះ។ សកម្មភាពនៃការបាញ់ប្រហារនៅព្រឹកថ្ងៃច័ន្ទ ទី១១វិច្ឆិកា ត្រូវគេថតបាន និងបង្ហោះផ្សាយពេញបណ្តាញប្រព័ន្ធទាក់ទងសង្គម។ ក្នុងរូបវីដេអូនោះ គេឃើញប៉ូលិសមួយកំពុងតែចាប់ក្របួចកបុរសម្នាក់ ភ្លាមនោះ យុវជនម្នាក់ទៀត ពាក់ម៉ាស់បិតមុខ និងស្លៀកពាក់ខ្មៅ ដើរចូលមក ទំនងជាសំដៅចង់ប្រុងជួយគ្នារបស់គេ។ ក៏ប៉ុន្តែ រំពេចនោះ រូបគេក៏ត្រូវប៉ូលិសបាញ់ផូង ដួលភ្លាម ដោយគ្រាប់កាំភ្លើងខ្លី។ បើតាមសាក្សីនៅកន្លែងកើតហេតុ គឺគេបានឮស្នូរគ្រាប់កាំភ្លើងផ្ទុះ ចំនួនបីគ្រាប់។ ក្រោយពេលកើតហេតុ បុរសដែលដេកដួលលើដីក្នុងថ្លុកឈាម ត្រូវសមត្ថកិច្ចដឹកយកទៅសង្គ្រោះនឹងមន្ទីរពេទ្យ។ នៅខណៈនេះ គេពុំទាន់ដឹងនៅឡើយ ពីអាការរោគ ថាធ្ងន់ឬស្រាលយ៉ាងណាទេ តែអាជ្ញាធរហុងកុងគ្រាន់តែបង្ហើបប្រាប់កាសែតបារាំងAFP ថា បុរសបាតុករដែលគ្រាប់កាំភ្លើងនោះ មានវ័យ២១ឆ្នាំ។
នៅក្នុងថ្ងៃច័ន្ទ ទី១១វិច្ឆិកាដដែល គឺមានបាតុករមួយរូបទៀត ត្រូវគេដុតឆេះខ្លួន។ តាមវីដេអូដែលគេបង្ហោះផ្សាយ គឺឃើញសកម្មភាពថា បុរសម្នាក់បានចាក់សាំងទៅលើបុរសម្នាក់ទៀត ដែលមានម៉ាស់បិទមុខពណ៌ខ្មៅ ហើយក៏ដុតបណ្តាលឱ្យឆេះភ្លាមឡើង។ ភ្លាមៗ ប៉ូលិសបានចោទប្រកាន់មនុស្សប្រុសម្នាក់ដែលចាកប្រេងសាំងលើបាតុករ ថាជាអ្នកទទួលខុសត្រូវចំពោះហិង្សាដុតខ្លួនមនុស្សបែបនេះ និងចាត់ទុកអំពើនេះ ជាបទល្មើសកុប្បកម្ម។
អំពើហិង្សាទាំងនេះ គឺជាទម្ងន់បន្ថែមទៀត នាំឱ្យគេគិតដល់ការប៉ះទង្គិចគ្នារវាងប៉ូលិសនិងបាតុករ ធ្វើឱ្យបុរសវ័យ២២ឆ្នាំម្នាក់ ធ្លាក់ពីអាគារចំណតឡាន កម្ពស់៥ជាន់ និងដែលទើបតែស្លាប់កាលពីថ្ងៃសុក្រ សប្តាហ៍មុន ក្នុងសង្កាត់សឹងក្វាន់អូ។ គ្រោះថ្នាក់បាត់បង់ជីវិតនេះ កើតឡើងដោយសារតែរូបគេប្រឹងរត់គេចពីការបាញ់ឧស្ម័នបង្ហូរទឹកភ្នែករបស់ប៉ូលីស។
ប្រឈមនឹងអំពើហិង្សាកាន់តែច្រើន បណ្តាលឱ្យពលរដ្ឋហុងកុងខ្លះ មានក្តីព្រួយបារម្ភកាន់តែច្រើន។ នៅម្ខាង ក្រុមបាតុករហុកុងដែលកាន់ស្លាកគាំទ្រប្រជាធិបតេយ្យ គឺពឹតតែប្រឹងស្រែកទាមទារសេរីភាព។ ហើយនៅពីម្ខាងទៀត មានក្រុមបាតុករដែលគាំទ្រក្រុងប៉េកាំង និងមិនចង់ឃើញអំពើហិង្សា ក៏ចេញមុខធ្វើបាតុករច្រើនឡើងៗដែរ។ នៅពេលនេះ សង្គមហុងកុង ហាក់កំពុងតែត្រូវពុះច្រៀក ជាពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ