កម្ពុជាបើកសិក្ខាសាលាថ្នាក់ជាតិដើម្បីជជែកអំពីគម្រោងសាងសង់ទំនប់វារីអគ្គិសនីដនសាហុង
បន្ទាប់ពីរដ្ឋាភិបាលឡាវ បានជូនដំណឹងដល់គណៈកម្មការទន្លេមេគង្គ អំពីការសម្រេចចិត្តរបស់ខ្លួន ស្តីពីគម្រោងសាងសង់ទំនប់វារីអគ្គិសនីដនសាហុង កាលពីចុងខែកញ្ញា ឆ្នាំ២០១៣មក បញ្ហានេះបានក្លាយជាក្តីបារម្ភកាន់តែខ្លាំង។ សិក្ខាសាលាថ្នាក់ជាតិមួយស្តីទាក់ទងនឹងគម្រោងសាងសង់ទំនប់វារីអគ្គិសនី ដនសាហុង នឹងបើកធ្វើនៅថ្ងៃទី ២០ មីនាខាងមុខនេះ នៅមជ្ឈមណ្ឌលវប្បធម៌ភ្នំពេញ កូរ៉េ ក្នុងទីក្រុងភ្នំពេញ។ តំណាងរដ្ឋាភិបាល និងភាគីពាក់ព័ន្ធទាំងឡាយនឹងចូលរួមជជែកអំពីបញ្ហានេះ។
ចុះផ្សាយនៅថ្ងៃ៖
ស្តាប់ - ០២:២៣
សិក្ខាសាលាថ្នាក់ជាតិ ស្តីពី «ការព្រួយបារម្ភចំពោះគម្រោងទំនប់វារីអគ្គិសនី ដនសាហុង» នឹងត្រូវរៀបចំឡើងនៅថ្ងៃទី ២០ មីនា ខាងមុខនេះនៅនៅមជ្ឈមណ្ឌលវប្បធម៌ភ្នំពេញ កូរ៉េ ក្នុងទីក្រុងភ្នំពេញ។ កម្មវិធីនេះ ត្រូវបានរៀបចំឡើងដោយវេទិកានៃអង្គការមិនមែនរដ្ឋាភិបាល ស្តីពីកម្ពុជា សហការជាមួយ និងសម្ព័ន្ធទន្លេកម្ពុជា (RCC) ។
លោក តឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាល ស្តីពីកម្ពុជា បានប្រាប់វិទ្យុបារាំងនៅព្រឹកថ្ងៃអង្គារនេះថា មូលហេតុដែល វេទិកានៃអង្គការមិនមែនរដ្ឋាភិបាល ស្តីពីកម្ពុជា រៀបចំកម្មវិធីសិក្ខាសាលាថ្នាក់ជាតិនេះឡើង ដើម្បីផ្សព្វផ្សាយដល់រដ្ឋាភិបាល និងប្រជាជនទូទៅ ឲ្យបានដឹងពីគម្រោងនៃការសាងសង់ទំនប់វារីអគ្គិសនីដនសាហុង ដែលវានឹងផ្តល់ផលប៉ះពាល់យ៉ាងធ្ងន់ធ្ងរ ដល់ប្រជាជន និងជីវចំរុះ ដែលរស់នៅក្នុងអាងទន្លេមេគង្គ និងជាពិសេសការប្រឈមមុខនឹងការផុតពូជ របស់សត្វផ្សោតកម្ពុជា។
លោក តឹក វណ្ណារ៉ា បានលើកឡើងថា សិក្ខាសាលាថ្នាក់ជាតិនេះ នឹងជួយផ្តល់ជាអនុសាន៍ខ្លះៗ ដល់រដ្ឋាភិបាលកម្ពុជា ដើម្បីធ្វើការសម្រេចចិត្ត នៅក្នុងការប្រជុំក្រុមប្រឹក្សាគណៈកម្មាទន្លេមេគង្គ នៅក្នុងខែមេសាខាងមុខនេះ ក្នុងប្រទេសវៀតណាម ដែលមានកម្ពុជា ថៃ ឡាវ និងវៀតណាមចូលរួម។
សូមបញ្ជាក់ថា កាលពីឆ្នាំ ២០០៦ រដ្ឋាភិបាលឡាវ បានចុះអនុស្សរណៈយោគយល់គ្នាជាមួយក្រុមហ៊ុនសាងសង់ម៉ាឡេស៊ី ឈ្មោះ មេហ្កា ហ្វើស ខបភើរ៉េស៊ិន ប៊ើហេដ ដើម្បីឲ្យក្រុមហ៊ុននេះសិក្សាគម្រោងសាងសង់ទំនប់វារីអគ្គិសនី ដនសាហុង។ នៅចុងខែកញ្ញា ឆ្នាំ២០១៣ រដ្ឋាភិបាលឡាវ បានជូនដំណឹងដល់គណៈកម្មការទន្លេមេគង្គ អំពីការសម្រេចចិត្តរបស់ខ្លួន ដើម្បីធ្វើការរៀបចំគម្រោង និងដាក់ជូនសម្រាប់គោលបំណងនៃការជូនដំណឹងនៅក្រោមនីតិវិធីរបស់ គណៈកម្មការទន្លេមេគង្គ សម្រាប់ការជូនដំណឹង ការពិគ្រោះយោបល់ ។
កាលពីថ្ងៃទី ១១ និង ១២មីនាកន្លងទៅនេះ រដ្ឋាភិបាលឡាវ និងក្រុមហ៊ុនសាងសង់មេហ្កាហ្វើស របស់ប្រទេសម៉ាឡេស៊ី រៀបចំឲ្យមានដំណើរទស្សនកិច្ចផ្លូវការដល់គណៈប្រតិភូពាក់ព័ន្ធនានា ដើម្បីចុះពិនិត្យតំបន់ សាងសង់ទំនប់វារីអគ្គិសនីដនសាហុង ដែលស្ថិតនៅក្នុងស្រុកចំប៉ាសាក់ ខេត្តចំប៉ាសាក់ ប្រទេសឡាវ ដែលមានចម្ងាយប្រមាណ ២គីឡូម៉ែត្រពីព្រំដែនប្រទេសកម្ពុជា ខេត្តស្ទឹងត្រែង។ ក្រោយទស្សនកិច្ចនោះ អង្គការសង្គមស៊ីវិលបានសម្តែងការព្រួយបារម្ភយ៉ាងខ្លាំងនិងនៅតែទទូចឲ្យឡាវបញ្ឈប់គម្រោងសាងសង់នេះជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ