ILO ៖លក្ខខណ្ឌការងារប្រសើរឡើងតែការអនុវត្តច្បាប់របស់សហជីពកម្មករនៅមានកម្រិតទាប
នៅក្នុងរបាយការណ៍តម្លាភាពទី៣របស់ខ្លួនដែលចេញផ្សាយនៅថ្ងៃអង្គារនេះ កម្មវិធីរោងចក្រកាន់តែប្រសើររបស់អង្គការ ILO បានបង្ហាញថា លក្ខខណ្ឌការងារនៅក្នុងរោងចក្រកាត់ដេរមានលក្ខណៈល្អប្រសើរជាងមុន។ ប៉ុន្តែ ការធ្វើកូដកម្ម និងបាតុកម្មរបស់សហជីពកម្មករនៅតែមិនគោរពតាមនីតិវិធីច្បាប់ទាល់តែសោះ។
ចុះផ្សាយនៅថ្ងៃ៖
ស្តាប់ - ០២:១២
របាយការណ៍នេះបានសិក្សាពីលក្ខខណ្ឌការងាររបស់រោងចក្រចំនួន ២៤៨ ដែលស្មើនឹងជិតពាក់កណ្តាលនៃរោងចក្រដែលទទួលបានសិទ្ធិនាំចេញផលិតផលរបស់ខ្លួន។ របាយការណ៍តម្លាភាពលើកទី៣នេះធ្វើឡើងចន្លោះពីខែកក្កដាដល់ខែកញ្ញាឆ្នាំ ២០១៤។
ការសិក្សាបានរកឃើញថា រោងចក្រចំនួនមួយភាគបួនក្នុងចំណោមរោងចក្រចំនួន៩៥ដែលត្រូវបានដាក់បញ្ចូលក្នុងក្រុមរោងចក្រដែលមានបញ្ហាចម្បងៗនោះបានកែលម្អចំណុចចាំបាច់ទាំង២១ដែលគេទាមទារ។ រីឯចំនួនសរុបនៃការរំលោភបំពាននានាក៏បានធ្លាក់ចុះ៣០ភាគរយ។ ចំណែកឯ៤០ភាគរយនៃរោងចក្រដែលត្រូវបានបន្ថែមថ្មីបានគោរពពេញលេញចំពោះច្បាប់ជាមូលដ្ឋានទាំង ២១ចំណុច។
ម្យ៉ាងទៀត ការហ្វឹកហាត់ជម្លៀសចេញពីអាគារពេលមានអាសន្នបានកើនឡើង ខណៈដែលការរើសអើងកម្មករនិយោជិតពីសំណាក់រោងចក្រមានការថយចុះ។ រីឯការផ្តល់ប្រាក់រង្វាន់បន្ថែមដល់កម្មករដែលមានអតីតភាពការងារត្រឹមត្រូវក៏បានកើនឡើងលើសពីមុនដែរ។
លោកស្រី ជាល តាក់កឺ ប្រធានទីប្រឹក្សាបច្ចេកទេសនៃគម្រោងរោងចក្រកាន់តែប្រសើរនៅកម្ពុជាបានថ្លែងថាបញ្ហាជាច្រើនដែលរោងចក្រមិនបានកែប្រែ អស់រយៈពេលជាច្រើនឆ្នាំមកហើយនោះ ឥឡូវនេះបានកែលម្អហើយ។ លោកស្រីបានហៅបញ្ហានេះថាជាការលើកទឹកចិត្តមួយដល់ក្រុមការងាររោងចក្រកាន់តែប្រសើររបស់អង្គការ ILO ។
ផ្ទុយទៅវិញ ការសិក្សាបានរកឃើញថា ការអនុវត្ដច្បាប់របស់សហជីពកម្មករនៅមានកម្រិតទាប។ គ្រប់កូដកម្មទាំងអស់ដែលត្រូវបានរួមបញ្ចូលនៅក្នុងទិន្នន័យតម្លាភាពនៅខែតុលាឆ្នាំ២០១៤នេះ គ្មានកូដកម្មណាមួយដែលបានធ្វើឡើងនៅក្នុងរោងចក្របានគោរពនីតិវិធី និងតម្រូវការរបស់ច្បាប់ទេ។ ប៉ុន្តែ លោក ប៉ាវ ស៊ីណា ប្រធានសហព័ន្ធសហជីពចលនាកម្មករកម្ពុជាបានទម្លាក់កំហុសទៅលើនិយោជក់វិញ។
លោកពន្យល់ថា កូដកម្មខុសច្បាប់បានផ្ទុះឡើងដោយសារតែភាគីរោងចក្របង្កបញ្ហាណា មួយដែលធ្វើឲ្យកម្មករមិនអាចអត់ទ្រាំបាន។ យ៉ាងណាក៏ដោយ មេដឹកនាំសហជីពរូបនេះអះអាងថាសហជីពតែងខិតខំអប់រំកម្មករដែលជាសមាជិករបស់ខ្លួនឲ្យអនុវត្តតាមនីតិវិធីច្បាប់នៅពេលធ្វើកូដកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ