Wikileaks៖ ព្រះរាជិនីថៃជាអ្នកនៅពីក្រោយរដ្ឋប្រហារទំលាក់លោកថាក់ស៊ីន
ក្នុងកំណត់ហេតុសំងាត់ការទូតអាមេរិកចុះផ្សាយដោយវិបសៃត៍ Wikileaks និងយកមកផ្សាយបន្តដោយកាសែតអង់គ្លេស The Guardian អតីតនាយករដ្ឋមន្រ្តីថៃ លោកសាម៉ាក់ ស៊ុនដារាវេទ (Samak Sundaravej) បាននិយាយថា ព្រះអគ្គមហេសីរបស់ព្រះអង្គភូមិបុល ជាបុគ្គលសំខាន់ដែលនំាឲ្យមានរដ្ឋប្រហារឆ្នាំ ២០០៦ និងទំលាក់លោកថាក់ស៊ីនចេញពីតំណែងនាយករដ្ឋមន្រ្តី។ ការបែកខ្ចរខ្ចាយដំណឹងដោយសារWikileaks លើកនេះនឹងអាចជម្រុញឲ្យរដ្ឋាភិបាលថៃធ្វើការបញ្ជាក់ឡើងវិញ ពីជំហរអព្យាក្រិតរបស់ព្រះរាជវាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
បើតាមកាសែតអង់គ្លេស The Guardian ដែលបានដកស្រង់ចំណុចខ្លះនៃកំណត់ទូតអាមេរិក មកចុះផ្សាយបន្ត នៅថ្ងៃពុធនេះ អតីតនាយករដ្ឋមន្រ្តីថៃលោក សាម៉ាក់ ស៊ុនដារាវេទបានជួបនិយាយគ្នាជាមួយមន្រ្តីទូតអាមេរិកប្រចាំក្រុងបាងកក នៅខែតុលា ឆ្នាំ ២០០៨។ ពោលគឺនៅមួយខែក្រោយ ដែលលោក សាម៉ាក់ បានលាលែងចេញពី ប្រធានបក្ស និងលែងធ្វើជានាយករដ្ឋមន្រ្តីថៃ។ លោកបាននិយាយប្រាប់មន្រ្តីទូតអាមេរិកាំងថា លោកជឿថា ព្រះរាជិនីថៃ ស៊ីរីគីត ជាអ្នកជម្រុញឲ្យមានរដ្ឋប្រហារ ទំលាក់លោកនាយករដ្ឋមន្រ្តីថាក់ស៊ីន ស៊ីណាវ៉ាតចេញពីមុខតំណែង។
ក្នុងកិច្ចសន្ទនាមួយដែលត្រូវបានកត់ត្រាក្រោយមកដោយមន្រ្តីទូតអាមេរិកាំង លោកអតីតនាយករដ្ឋមន្រ្តីថៃដែលមាននិន្នាការ គាំទ្រលោកថាក់ស៊ីន បាននិយាយដែរថា ព្រះអគ្គមហេសី ស៊ីរីគីត បានដើរនយោបាយខុសពីព្រះស្វាមីរបស់ព្រះអង្គ។ ព្រះអង្គបានរួមគំនិត និងធ្វើការលួចលាក់ជាមួយលោកប្រេម ទីនស៊ូឡានន្ទដា ប្រធានទីប្រឹក្សាដ៏មានឥទ្ធិពលម្នាក់របស់ព្រះមហាក្សត្រ ដើម្បីគាំទ្រចលនារបស់ពួកអាវលឿង។ ចលនាក្រុមអាវលឿងដែលប្រឆាំងរហូតធ្វើលោកថាក់ស៊ីនខ្ទាតចេញពីតំណែង។
គួរដឹងថា គ្រួសារព្រះរាជវង្សថៃមិនមានសិទ្ធិលូកដៃចូលក្នុងរឿងនយោបាយនោះទេ។ ប៉ុន្តែ ព្រះមហាក្សត្រថៃនៅតែបុគ្គលមានឥទ្ធិពលបំផុត ក្នុងប្រទេស នៅពេលដែលព្រះអង្គមានអំណាចខ្លាំងទៅលើពួកយោធា។
អ្នកនាំពាក្យរបស់ក្រសួងការបរទេសថៃ បាននិយាយដដែលថា ព្រះមហាក្សត្រថៃនៅតែត្រូវតម្កល់ខ្ពស់ជាងគណបក្សនយោបាយ គឺខ្ពស់ជាងរឿងជម្លោះនយោបាយដែលកើតមានកន្លងមក។ ហើយគេមិនត្រូវជឿតាមពួកមនុស្សអាក្រក់ដែលមានបំណងបំផ្លាញព្រះកិត្តិនាមរបស់ព្រះមហាក្សត្រនោះទេ។ អ្នកនាំពាក្យរូបនេះ បានលើកឡើងយ៉ាងដូច្នេះដើម្បីប្រតិកម្មទៅនឹងសំដីរបស់លោកសាម៉ាក់ ដែលត្រូវបានកត់ត្រាក្នុងកំណត់ទូតអាមេរិក។
ក្នុងប្រទេសថៃ គ្រួសាររាជវង្ស និងព្រះមហាក្សត្រជាបុគ្គលដែលមិនអាចប៉ះពាល់បាន។ ការនិយាយប្រមាថ ឬប៉ះពាល់ដល់ព្រះកិត្តិនាមរបស់គ្រួសាររាជវង្សនឹងត្រូវចាត់ទុកជាបទឧក្រិដ្ឋប្រមាថព្រះចេស្តា និងអាចថ្កោលទោសដាក់គុកពី៣ ទៅ ១៥ឆ្នាំ។
លើកនេះការនិយាយចោទប្រកាន់របស់លោកសាម៉ាក់ទៅលើព្រះអគ្គមហេសីរបស់ព្រះមហាក្សត្រ អាចចាត់ទុកជាបទឧក្រិដ្ឋប្រមាថព្រះចេស្តា។ ប៉ុន្តែ ក្នុងករណីរបស់លោកសាម៉ាក់ គេមិនថ្កោលទោសលោកសាម៉ាក់បានឡើយ ដោយហេតុថា អតីតនាយករដ្ឋមន្ត្រីរូបនេះ បានទទួលមរណភាពតាំងតែពីឆ្នាំមុន(ឆ្នាំ ២០០៩)ម្ល៉េះដោយរោគមហារីកថ្លើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ