ស្លាប់យ៉ាងហោច២៣នាក់ ក្នុងអគ្គិភ័យរោងចក្រនៅបង់ក្លាដែស
នៅបង់ក្លាដែស ព្រឹកថ្ងៃសៅរ៍១០សីហានេះ មានមនុស្សយ៉ាងហោច២៣នាក់ បានស្លាប់ និងជាង២០នាក់ទៀតរងរបួស ក្នុងគ្រោះអគ្គិភ័យនៅរោងចក្រផលិតថង់ផ្លាស្ទិកមួយកន្លែង នៅភាគខាងជើងក្រុងដាកា។ ប៉ូលិសបារម្ភថា អាចមានមនុស្សកំពុងជាប់ខ្លួនក្នុងរោងចក្រនៅឡើយ។ គេនៅមិនទាន់ដឹងមូលហេតុពិតប្រាកដនៃអគ្គិភ័យនេះទេ តែវាអាចបង្កឡើងដោយការផ្ទុះឧបករណ៍កំដៅថាមពល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៣
រោងចក្របង់ក្លាដែស ដែលរងអគ្គិភ័យ ថ្ងៃសៅរ៍នេះ មានកម្ពស់៤ជាន់ ស្ថិតនៅក្រុងឧស្សាហកម្មTongi តែប៉ុន្មានគីឡូម៉ែត្រប៉ុណ្ណោះ ពីភាគខាងជើងក្រុងដាកា។ អគ្គិភ័យអាចបង្កឡើង ដោយសារការផ្ទុះឧបករណ៍កំដៅថាមពលរបស់រោងចក្រ។ កម្មករជាង១០០នាក់ កំពុងធ្វើការនៅទីនោះ ក្នុងពេលហេតុការណ៍នេះកើតឡើង។ អគ្គិភ័យបានធ្វើអោយបាក់រលំផ្នែកមួយនៃអគាររោងចក្រ។
ជនរងគ្រោះភាគច្រើនរងការរលាក។ អ្នករងរបួសធ្ងន់ធ្ងរត្រូវគេបញ្ជូនទៅមន្ទីរពេទ្យ នៅក្រុងដាកាជិតនោះ។ យោងតាមប៉ូលិស ការដែលភ្លើងអាចឆេះរាលដាលលឿន នៅរោងចក្រ ដោយសារតែនៅជាន់ក្រោមរោងចក្រ មានស្តុកទុកផលិតផលគីមីជាច្រើន។ រោងចក្រនេះ ផលិតថង់ផ្លាស្ទិក សម្រាប់វេចខ្ចប់ម្ហូបអាហារ។
បង់ក្លាដែសជាប្រទេសនាំចេញផលិតផលវាយនភ័ណ្ឌ លំដាប់ទី២ បន្ទាប់ពីចិន។ ប៉ុន្តែ អគាររោងចក្រនានា នៅបង់ក្លាដែសតែងរងគ្រោះផ្សេងៗ ដូចជាអគ្គិភ័យ រឺការបាក់រលំ ដោយសាររោងចក្រគ្មានស្តង់ដាសន្តិសុខត្រឹមត្រូវ។
កាលពីឆ្នាំ២០១២ អគ្គិភ័យនៅរោងចក្រថាស្រ៊ីន ក្រុងដាកា បានសម្លាប់កម្មករ១១១នាក់។ កម្មករច្រើននាក់ស្លាប់ក្នុងគ្រោះភ្លើង ដោយសាររោងចក្រគ្មានច្រកចេញគ្រប់គ្រាន់។ ក្រោយមកទៀត នៅខែមេសាឆ្នាំ២០១៣ អគារពាណិជ្ជកម្ម រ៉ាណា ផ្លាហ្សា នៅជាយក្រុងដាកា បានរលំបាក់ សម្លាប់មនុស្សជាង១១០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ