តុលាការឥណ្ឌាបរិហារអំពីការបំពុលបរិស្ថានខ្លាំងនៅទីក្រុងញូវដែលី
តុលាការឥណ្ឌាផ្នែកបរិស្ថាន បានបរិហារអំពីភាពអសកម្មរបស់រដ្ឋាភិបាល ដែលបណ្តែតបណ្តោយឱ្យការបំពុលបរិស្ថានតាមទីក្រុងធ្លាក់ដុនដាបកាន់តែខ្លាំងឡើងៗពីមួយថ្ងៃទៅមួយថ្ងៃ ជាពិសេសនៅទីក្រុងញូវដែលី។ ក្រុងញូវដែលី បានក្លាយជាទីក្រុងមួយដែលមានការបំពុលបរិយាកាសយ៉ាងខ្លំាងជាងគេនៅលើលោក ហេតុដូច្នេះហើយបានជាតុលាការឥណ្ឌាបានចេញបញ្ជាឱ្យរដ្ឋាភិបាលដាក់វិធានការបន្ទាន់មួយចំនួនដើម្បីទប់ទល់នឹងការបំពុលបរិស្ថាន។
ចុះផ្សាយនៅថ្ងៃ៖
ស្តាប់ - ០១:៥៨
នៅថ្ងៃពុធម្សិលមិញ តុលាការឥណ្ឌា បានបញ្ជាឲ្យរដ្ឋាភិបាលដាក់វិធានការបន្ទាន់មួយចំនួនដើម្បីទប់ទល់នឹងការបំពុលបរិស្ថាននៅក្រុងញូវដែលី។
វិធានការទាំងនោះ មានជាអាទិ៍៖ ហាមយានយន្តដែលចំណាស់ពី១៥ឆ្នំាឡើងទៅមិនឲ្យបើកបរនៅក្នុងក្រុងញូវដែលី ធ្វើការពិនិត្យបញ្ជាក់ឲ្យបានច្បាស់លាស់កម្រិតជាតិពុលដែលបញ្ចេញតាមរយៈផ្សែងរថយន្តដឹកជញ្ជូនសាធារណៈនិងរៀបចំដាក់ប្រព័ន្ធបន្សុតខ្សល់នៅតាមទីផ្សារសំខាន់ៗក្នុងទីក្រុង។
បន្ទាប់ពីការប្រកាសវិធានការរបស់តុលាការភ្លាម នៅថ្ងៃព្រហស្បតិ៍នេះ អង្គការក្រៅរដ្ឋាភិបាលមួយខាងកិច្ចការពារបរិស្ថាន បានអបអរសាទរចំពោះវិធានការតុលាការ។ យោងតាមអង្គការក្រៅរដ្ឋាភិបាលដដែល "កម្រិតជាតិពុលនៅញូវដែលី ដែលមានប្រជាជនរស់នៅចំនួន១៧លាននាក់ កាន់តែកើនឡើងជាលំដាប់"។ ដូច្នេះ រដ្ឋាភិបាលឥណ្ឌា ត្រូវតែបំពេញកាតព្វកិច្ចស្របច្បាប់មួយរបស់ខ្លួនដើម្បីអនុវត្តន៍វិធានការ តុលាការឲ្យបានមធ្យ័តក្នុងការប្រឈមមុខនឹងបញ្ហានានាដូចជា យានយន្តថ្មីៗប្រមាណ ១០០០ គ្រឿង បើកបរនៅលើផ្លូវថ្នល់ក្នុងមួយថ្ងៃៗ។
រដ្ឋាភិបាលឥណ្ឌា រហូតមកទល់ពេលនេះ ពុំដែលបានធ្វើសេចក្តីសំរេចចិត្តសំខាន់ណាមួយឡើយនៅលើការត្រួតពិនិត្យ បញ្ហាខ្យល់ពុលនៅក្នុងក្រុង ។ ខ្យល់ពុលដែលបណ្តាលមកពីការបញ្ចេញផ្សែងពុលតាមរថយន្ត ឬ ជាតិប្លាស្ទីកក៏ព្រមទាំងសារជាតិពុលដែលកើតចេញពីសម្ភារៈប្រើប្រាស់ផ្សេងៗ នេះជាការលើកឡើងរបស់តុលាការឥណ្ឌា។
ដោយឡែក តាមការសិក្សាមួយរបស់អង្គការ សុខភាពពិភពលោក OMS កាលពីខែឧសភាមុនបានឲ្យដឹងថា៖ ក្នុងចំណោមក្រុងចំនួន១៦០០ ញូវដែលី គឺជារដ្ឋធានីមួយដែលកំរិតជាតិពុលក្នុងបរិស្ថាន កើនឡើងខ្លាំងជាងគេនៅលើលោក។ សារជាតិពុលនេះ អាចជ្រាបចូលក្នុងខ្លួនយើងនិងអាចបណ្តាលឲ្យកើតជាជម្ងឺរលាកទងសួត មហារីកសួត ុឬក៏ជម្ងឺបេះដូងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ