សព្វាវុធនាំចូលក្នុងទឹកដីឥណ្ឌានិងប៉ាគីស្ថានមានការកើនឡើងខ្ពស់
នៅថ្ងៃចន្ទនេះ វិទ្យាស្ថានអន្តរជាតិទទួលបន្ទុកផ្នែកស្រាវជ្រាវសន្តិភាព ក្រុង Stockholm ហៅកាត់ថា SIPRI បានចេញផ្សាយរបាយការណ៍មួយ នៅក្រុងប៉ារីស បង្ហាញថា ការនាំចូលសព្វាវុធក្នុងទឹកដីឥណ្ឌានិងប៉ាគីស្ថាន បានកើនឡើងខ្ពស់ ក្នុងរយៈពេល៥ឆ្នាំចុងក្រោយនេះ។ ប្រទេសចំនួន៥ដែលនាំចូលអាវុធក្នុងស្រុកច្រើនជាងគេ ក្នុងពិភពលោក មានឥណ្ឌា ប៉ាគីស្ថាន ចិន អារ៉ាប៊ី សាអូឌីត និង ប្រទេសអារ៉ាប់រួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
នៅក្រុងប៉ារីស ថ្ងៃចន្ទនេះ វិទ្យាស្ថានអន្តរជាតិស្រាវជ្រាវសន្តិភាព Stockholm ហៅកាត់ថា SIPRI បានចេញរបាយការណ៍បង្ហាញពីការកើនឡើងនៃបរិមាណអាវុធដែលនាំចូលទៅប្រទេសឥណ្ឌា និងប៉ាគីស្ថាន ក្នុងរយៈពេល៥ឆ្នាំចុងក្រោយនេះ។ យោងតាមវិទ្យាស្ថាន SIPRI ក្នុងកំឡុងឆ្នាំ២០០៤ដល់ឆ្នាំ២០០៨ និងពីឆ្នាំ២០០៩ដល់ឆ្នាំ២០១៣ ការនាំចូលអាវុធនៅឥណ្ឌា មានការកើនឡើង១១១ភាគរយ គឺកើនពី៧ភាគរយ ទៅ១៤ភាគរយ គិតសម្រាប់ការនាំចូលអាវុធក្នុងពិភពលោកទាំងមូល។
នៅប៉ាគីស្ថានវិញ អាវុធនាំចូលក្នុងស្រុក ចន្លោះឆ្នាំ២០០៤ដល់ឆ្នាំ២០០៨ និងចន្លោះឆ្នាំ២០០៩ដល់ឆ្នាំ២០១៣ មានការកើនឡើងរហូត១១៩ភាគរយ ហើយគិតសម្រាប់ការនាំចូលអាវុធក្នុងពិភពលោកវិញ ការកើនឡើងនេះ មានពី២ភាគរយ ទៅ៥ភាគរយ។
ក្រៅពីឥណ្ឌា និងប៉ាគីស្ថាន ប្រទេសនាំចូលអាវុធច្រើនជាងគេក្នុងលោក មានចិន អារ៉ាប់រួម និងអារ៉ាប៊ី សាអូឌីត។ ៥ឆ្នាំចុងក្រោយនេះ គិតសម្រាប់ការនាំចូលអាវុធក្នុងពិភពលោក ចិននាំចូលអាវុធក្នុងស្រុក៥ភាគរយ អារ៉ាប៊ីសាអូឌីត និងប្រទេស អារ៉ាប់រួម នាំអាវុធចូលប្រទេសបរិមាណ៤ភាគរយដូចគ្នាដែរ។ ចន្លោះឆ្នាំ២០០៤ដល់ឆ្នាំ២០០៨ និងចន្លោះឆ្នាំ២០០៩ដល់ឆ្នាំ២០១៣ បណ្តាប្រទេសតំបន់ឈូងសមុទ្រពែរស៍ នៅមជ្ឈិមបូព៌ា នាំចូលអាវុធ៥២ភាគរយ នៃការនាំចូលអាវុធក្នុងពិភពលោក។ តំបន់ឈូងសមុទ្រពែរស៍ផ្តោតការវិនិយោគខ្លាំងលើផ្នែកការពារអាកាសនិងមីស៊ីល ហើយតែងបញ្ជាទិញយន្តហោះចំបាំងរបស់អង់គ្លេសនិងអាមេរិក។
ដោយឡែក ចន្លោះឆ្នាំ២០០៩ដល់ឆ្នាំ២០១៣ អាមេរិកនិងរុស្ស៊ី បាននាំអាវុធចេញទៅលក់ច្រើនជាងគេក្នុងពិភពលោក។ សហរដ្ឋអាមេរិកនាំចេញ២៩ភាគរយ នៃបរិមាណអាវុធនាំចេញក្នុងពិភពលោក រុស្ស៊ីវិញ នាំចេញ២៧ភាគរយ។ ឥណ្ឌានាំចូលអាវុធរុស្ស៊ី៧៥ភាគរយ ក្នុងចំណោមបរិមាណអាវុធសរុបនាំចូលក្នុងស្រុក។ អាវុធអាមេរិកនាំចូលឥណ្ឌាមាន៧ភាគរយប៉ុណ្ណោះ ក្នុងបរិមាណអាវុធសរុបនាំចូលប្រទេសនេះ។ គិតពីឆ្នាំ២០០៩ដល់ឆ្នាំ២០១៣ រុស្ស៊ីជាប្រទេសលក់ប្រព័ន្ធអាវុធចំបង អោយដល់ប្រទេសចំនួន៥២លើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ