តើចិនអាចប្រជែងឈ្នះឥណ្ឌាក្នុងការគ្រប់គ្រងមហាសមុទ្រឥណ្ឌាឬទេ?
ចុះផ្សាយនៅថ្ងៃ៖
ស្តាប់ - ០៣:៥៩
កាលពីថ្ងៃចន្ទដើមសប្តាហ៍នេះ កំពង់ផែដ៏ធំមួយ សាងសង់ដោយប្រើហិរញ្ញប្បទានរបស់ចិន ត្រូវបានសម្ពោធដាក់ឲ្យដំណើរការ នៅក្នុងប្រទេសស្រីលង្កា។ កំពង់ផែនេះ គឺជាផ្នែកមួយ នៃយុទ្ធសាស្រ្តរបស់ចិន ក្នុងការឈានទៅប្រជែងជាមួយឥណ្ឌា ដើម្បីគ្រប់គ្រងមហាសមុទ្រឥណ្ឌា។ មហាសមុទ្រឥណ្ឌា ដែលឥណ្ឌាតែងតែចាត់ទុកថាជាដែនឥទ្ធិពលរបស់ខ្លួន ក៏ប៉ុន្តែ ចិន ដែលមានអំណាចកាន់តែរីកធំឡើង ទាំងខាងសេដ្ឋកិច្ច និងខាងយោធា ក៏មានមហិច្ឆតាចង់គ្រប់គ្រងទីតាំងជាយុទ្ធសាស្រ្តនេះដែរ។ ចុងក្រោយទៅ រវាងឥណ្ឌា និងចិន តើនរណានឹងក្លាយជាម្ចាស់នៃមហាសមុទ្រឥណ្ឌា?
មហាសមុទ្រឥណ្ឌា គឺជាទីតាំងយុទ្ធសាស្រ្តដ៏សំខាន់មួយ ទាំងនៅក្នុងភូមិសាស្រ្តនយោបាយអាស៊ី និងពិភពលោក។ កាលពីសម័យសង្រ្គាមត្រជាក់ មហាសមុទ្រឥណ្ឌា គឺជាទីតាំងយុទ្ធសាស្រ្ត ដែលអាមេរិក និងសហភាពសូវៀតប្រជែងគ្នាត្រួតត្រា។ នៅពេលនេះ ក្រោយពីសង្រ្គាមត្រជាក់បញ្ចប់ទៅ គឺដល់វេនយក្សអាស៊ីទាំងពីរ គឺចិន និងឥណ្ឌា ដែលកំពុងតែប្រជែងគ្នាគ្រប់គ្រងមហាសមុទ្រនេះ។
មហាសមុទ្រឥណ្ឌា គឺជាចំណុចកណ្តាលមួយ ភ្ជាប់តំបន់យុទ្ធសាស្រ្តធំៗទាំងបី គឺអឺរ៉ុប ដើមបូព៌ា និងអាស៊ី។ ជាលំហសមុទ្រដ៏សំខាន់ សម្រាប់ការដឹកជញ្ជូនតាមសមុទ្រ ដែលជាសរសៃឈាមនៃសេដ្ឋកិច្ចពិភពលោក។ ជាពិសេស មហាសមុទ្រឥណ្ឌា គឺជាច្រកឆ្លងកាត់ដែលមិនអាចចៀសរួច ក្នុងការដឹកជញ្ជូនធនធានធម្មជាតិ ពីអាហ្វ្រិក និងដើមបូព៌ា មកកាន់ប្រទេសឥណ្ឌា និងចិន។
ការដោះដូរពាណិជ្ជកម្មអន្តរជាតិរបស់ចិនប្រមាណ ២៥% និងការដឹកជញ្ជូនប្រេងរបស់ចិនប្រមាណ ៨០% ត្រូវឆ្លងកាត់មហាសមុទ្រឥណ្ឌា កាត់តាមច្រកសមុទ្រ Malacca (ចន្លោះ ម៉ាឡេស៊ី និងឥណ្ឌូណេស៊ី) ភ្ជាប់ទៅសមុទ្រចិនខាងត្បូង។
មហាសមុទ្រឥណ្ឌា មានឈ្មោះ “ឥណ្ឌា” ហើយត្រូវបានឥណ្ឌាចាត់ទុកថាជាដែនឥទ្ធិពលផ្តាច់មុខរបស់ខ្លួន។ ក៏ប៉ុន្តែ មហិច្ឆតារបស់ចិន កម្លាំងសេដ្ឋកិច្ច និងយោធារបស់ចិន កំពុងតែជាការគំរាមកំហែងដ៏ធំមួយដល់មហិច្ឆតារបស់ឥណ្ឌា ក្នុងការគ្រប់គ្រងមហាសមុទ្រឥណ្ឌានេះ។
ការចំណាយក្នុងវិស័យការពារជាតិចិនបានបន្តកើនឡើងកាន់តែខ្លាំងឥតឈប់ឈរ ជាពិសេស ការចំណាយលើការពង្រីកកងទ័ពជើងទឹក ដូចជា ការសាងសង់នាវាផ្ទុកយន្តហោះ និងនាវាមុជទឹក។ នៅពេលនេះ ចិនកំពុងផ្តោតលើការពង្រឹងវត្តមាន នៅសមុទ្រចិនខាងត្បូង និងសមុទ្រនៅប៉ែកខាងកើត (ទៅខាងកូរ៉េ និងជប៉ុន) ក៏ប៉ុន្តែ បើកម្លាំងរបស់ចិននៅតែបន្តកើនឡើងបែបនេះ មិនយូរមិនឆាប់ ចិនប្រាកដជានឹងបោះជំហានមួយទៀត គឺឈានទៅប្រជែងជាមួយឥណ្ឌា ដល់មហាសមុទ្រឥណ្ឌាតែម្តង។
តាមការពិត នាពេលបច្ចុប្បន្ននេះ ចិនបានប្រុងប្រៀបរៀបជើងព្រួលរួចជាស្រេចទៅហើយ តាមរយៈការដាក់ចេញនូវយុទ្ធសាស្រ្ត ដែលគេឲ្យឈ្មោះថា “Collier de Perles” (ជាភាសាខ្មែរ "ខ្សែ ក គុជខ្យង”) គឺការពង្រឹងវត្តមាននាវារបស់ចិន តាមរយៈការទិញ ជួល ឬសាងសង់កំពង់ផែ នៅតាមប្រទេសមួយចំនួន ចាប់តាំងពីសមុទ្រចិនខាងត្បូង រហូតដល់តំបន់ដើមបូព៌ា។ យុទ្ធសាស្រ្តនេះ មានគោលដៅរក្សាសុវត្ថិភាពនាវាចរណ៍របស់ចិនផង និងជាយុទ្ធសាស្រ្ត ដើម្បីឡោមព័ទ្ធឥណ្ឌាផងដែរ ជាពិសេស តាមរយៈការសាងសង់កំពង់ផែនៅតាមប្រទេសជុំវិញឥណ្ឌា រួមមាន ភូមា បង់ក្លាដែស ស្រីលង្កា និងប៉ាគីស្ថាន។
កំពង់ផែដ៏សម្បើម ដែលចិនផ្តល់លុយ ដើម្បីឲ្យស្រីលង្កាសាងសង់ និងដាក់សម្ពោធ កាលពីថ្ងៃចន្ទ ទី៤ សីហា កន្លងទៅនេះ គឺជាផ្នែកមួយ នៃយុទ្ធសាស្រ្តនេះ។
ប្រឈមមុខនឹងការគំរាមកំហែងរបស់ចិន ឥណ្ឌាក៏កំពុងតែខិតខំពង្រឹងកងទ័ពជើងទឹករបស់ខ្លួនយ៉ាងខ្លាំងដែរ។ កាលពីឆ្នាំ២០០៦ ឥណ្ឌាបានបញ្ជាទិញនាវាផ្ទុកយន្តហោះមួយគ្រឿងពីរុស្ស៊ី។ ក្រៅពីនាវាដែលទិញពីរុស្ស៊ី ឥណ្ឌាកំពុងតែសាងសង់នាវាផ្ទុកយន្តហោះដោយខ្លួនឯងចំនួនពីរគ្រឿងផ្សេងទៀត ដែលគ្រោងនឹងដាក់ឲ្យដំណើរការ នៅឆ្នាំ២០១៤។ នេះមានន័យថា នៅឆ្នាំ២០១៤ កងទ័ពជើងទឹកឥណ្ឌានឹងមាននាវាផ្ទុកយន្តហោះដល់ទៅ ៣គ្រឿង។
ក្រៅពីការសាងសង់នាវាផ្ទុកយន្តហោះ ឥណ្ឌាក៏កំពុងតែផ្តោតខ្លាំងផងដែរលើការទិញ ឬសាងសង់នាវាមុជទឹក យន្តហោះល្បាតដែនសមុទ្រ និងការសាងសង់ប្រព័ន្ធរ៉ាដា នៅតាមបណ្តោយឆ្នេរសមុទ្ររបស់ខ្លួន។ នៅពេលបច្ចុប្បន្ននេះ តាមរយៈសហប្រតិបត្តិការជាមួយបារាំង ឥណ្ឌាកំពុងតែសាងសង់នាវាចម្បាំងចំនួន ៤០គ្រឿង ដែលក្នុងនោះ មាននាវាមុជទឹកចំនួន ៦គ្រឿង។ ហើយក្រោយពីនាវាមុជទឹកនេះត្រូវសាងសង់ចប់សព្វគ្រប់ នៅឆ្នាំ២០១៨ ឥណ្ឌាគ្រោងនឹងចាប់ផ្តើមសាងសង់នាវាមុជទឹកចំនួន ៦គ្រឿងបន្ថែមទៀត។
អ្នកជំនាញខាងយុទ្ធសាស្រ្តទ័ពជាច្រើនយល់ថា នៅក្នុងពេលបច្ចុប្បន្ននេះ ក្នុងការប្រជែងគ្នា នៅមហាសមុទ្រឥណ្ឌា ឥណ្ឌាត្រូវមានប្រៀបលើចិន ពីព្រោះ ម្យ៉ាង កងទ័ពជើងទឹកឥណ្ឌាក៏មានកម្លាំងខ្លាំង ហើយម្យ៉ាងទៀត ឥណ្ឌាមានទីតាំងភូមិសាស្រ្តប្រកបដោយអំណោយផល គឺឥណ្ឌាមានឆ្នេរជាប់នឹងមហាសមុទ្រឥណ្ឌា ខុសពីចិន ដែលនៅនៅតាមនៅឆ្ងាយ។ លើសពីនេះទៅទៀត ឥណ្ឌាអាចមានអាមេរិកជួយពីខាងក្រោយ។ ដូច្នេះ គេយល់ថា យ៉ាងហោចណាស់ ចាប់ពីពេលនេះ រហូតដល់ ២០ឆ្នាំខាងមុខ ចិនទំនងជានៅមិនទាន់មានសមត្ថភាពគ្រប់គ្រាន់ ដើម្បីប្រជែងជាមួយឥណ្ឌា នៅមហាសមុទ្រឥណ្ឌាបាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ