អ្នកទោសឥណ្ឌូណេស៊ីជាង២០០នាក់រត់ចេញពីពន្ធនាគារ ប៉ូលិសក្របួចបានច្រើននាក់មកវិញ
ថ្ងៃសុក្រម្សិលមិញ អ្នកទោសនៅឥណ្ឌូណេស៊ីជាង២០០នាក់ បាននាំគ្នារត់ចេញពីពន្ធនាគារមួយកន្លែង នៅក្រុងPekanbaru ភាគខាងលិចប្រទេស។ ថ្ងៃសៅរ៍នេះ ប៉ូលិសប្រាប់ថា អ្នកទោសដែលចាប់បានមកវិញ រឺក៏អ្នកទោសដែលប្រគល់ខ្លួនមកវិញ សរុបទៅមាន២០៩នាក់ គឺភាគច្រើននៃចំនួនអ្នកទោសដែលបានរត់គេច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១០
ហេតុការណ៍អ្នកទោសជាង២០០នាក់ហែកគុក នៅPekanbaru ភាគខាងលិចឥណ្ឌូណេស៊ី បានកើតឡើង ថ្ងៃសុក្រម្សិលមិញ ពេលអ្នកយាមគុកបើកទ្វារអោយអ្នកទោសចេញទៅសូត្រធម៌។ គេមិនដឹងថា តើមានអ្នកទោសប៉ុន្មាននាក់ ដែលបានរត់គេចម្សិលមិញនេះទេ។ អាចមានពី២០០ទៅ៣០០នាក់។ រូបភាពវីដេអូបង្ហាញអ្នកទោសច្រើនសន្ធឹកសន្ធាប់ អ្នកខ្លះស្លៀកសារុង បានរត់បន្តកន្ទុយគ្នា ចេញតាមទ្វារគុក។
ប៉ូលិសបានខ្នះខ្នែងប្រតិបត្តិការដាក់របាំង ក្នុងទីក្រុង តាមចាប់បានអ្នកទោសភាគច្រើនមកវិញ។ អ្នកទោសប្រាប់ថា ពួកគេរត់ចេញពីគុក នៅPekanbaru ដោយសារតែលក្ខខណ្ឌឃុំអ្នកទោសក្នុងគុកគ្មានភាពមនុស្សធម៌ទាល់តែសោះ។ អ្នកយាមគុកក៏មិនល្អចំពោះពួកគេ។ អ្នកទោសបានទាមទារអោយប្តូរប្រធានយាមពន្ធនាគារនេះចេញ។ ពន្ធនាគារ នៅ Pekanbaru មានអ្នកទោសលើសចំណុះ។ តាមធម្មតា ពន្ធនាគារមួយនេះ អាចដាក់អ្នកទោសបានត្រឹមតែជាង៣០០នាក់ទេ ប៉ុន្តែ ក្នុងគុកនេះ រាប់ទៅគឺមានអ្នកទោសដល់ទៅ១៨៧០នាក់។ អ្នកយាមគុកវិញ មានតែ៦នាក់ប៉ុណ្ណោះ។
ពន្ធនាគារជាច្រើន នៅឥណ្ឌូណេស៊ី ច្រើនផ្ទុកអ្នកទោសហួសចំណុះ ហើយគ្មានលក្ខខណ្ឌអនាម័យត្រឹមត្រូវសម្រាប់អ្នកទោសទេ។ ហេតុការណ៍រត់គេចពីពន្ធនាគារក៏តែងកើតមាន នៅឥណ្ឌូណេស៊ីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ