អ.ស.ប៖ក្រុមជីហាតរដ្ឋអ៊ីស្លាមសម្លាប់ជនស៊ីវិលនិងទាហាននៅមូស៊ូលរាប់សិបនាក់
អង្គការសហប្រជាជាតិបានផ្តល់ដំណឹងនៅថ្ងៃអង្គារនេះថា បានទទួលដំណឹងថា នៅតាមភូមិក្បែរក្រុងមូស៊ូល អ៊ីរ៉ាក់ មានមនុស្សរាប់សិបនាក់ ក្នុងនោះមានប៉ូលិស៥០នាក់ ត្រូវបានក្រុមជីហាតរដ្ឋអ៊ីស្លាមសម្លាប់។ ហេតុការណ៍នេះបានកើតឡើង សប្តាហ៍មុន ខណៈទាហានអ៊ីរ៉ាក់រុលទៅមុខឆ្ពោះទៅកំទេចក្រុមរដ្ឋអ៊ីស្លាមនៅមូស៊ូល។ កងទ័ពអ៊ីរ៉ាក់បានរកឃើញសាកសពមនុស្ស៧០នាក់ នៅភូមិមួយកន្លែងដែរ តែមិនដឹងថា ពួកគេត្រូវបានក្រុមរដ្ឋអ៊ីស្លាមសម្លាប់រឺយ៉ាងណាទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១០
អង្គការសហប្រជាជាតិត្រូវការការស៊ើបអង្កេតបន្ថែមទៀត ដើម្បីគូសបញ្ជាក់អោយបានច្បាស់ពីព័ត៌មានទាក់ទិននឹងអំពើព្រៃផ្សៃរបស់ក្រុមរដ្ឋអ៊ីស្លាម សម្លាប់ប្រជាជននិងប៉ូលិស នៅតាមភូមិជាច្រើនក្បែរក្រុង មូស៊ូល ប្រទេសអ៊ីរ៉ាក់។
យោងតាមអង្គការសហប្រជាជាតិ ចន្លោះថ្ងៃពុធ និងថ្ងៃអាទិត្យសប្តាហ៍កន្លងទៅនេះ ក្រុមភេរវជនរដ្ឋអ៊ីស្លាមបានសម្លាប់ជនស៊ីវិលច្រើននាក់ នៅតាមភូមិផ្សេងៗ ក្បែរក្រុងមូស៊ូល។ នៅភូមិសាហ្វ៊ីណា ខាងត្បូងក្រុងមូស៊ូល ក្រុមភេរវជនបានសម្លាប់ជនស៊ីវិល១៥នាក់ រួច ហើយបោះទំលាក់ទៅក្នុងស្ទឹង ប្រហែលដើម្បីបំភ័យអ្នកភូមិ។
មានជនស៊ីវិល៦នាក់ផ្សេងទៀត ត្រូវបានពួកអង្គការរដ្ឋអ៊ីស្លាមចងភ្ជាប់ទៅនឹងរថយន្ត បើកអូសពួកគេនៅជុំវិញភូមិ ក្រោមលេសថា ពួកគេស្រដៀងនឹងមេកុលសម្ព័ន្ធដែលកំពុងប្រយុទ្ធប្រឆាំងក្រុមរដ្ឋអ៊ីស្លាម។ នៅភូមិរូហ្វីឡា ខាងត្បូងក្រុងមូស៊ូលដែរ ពួករដ្ឋអ៊ីស្លាមបានសម្លាប់ស្ត្រីនិងកុមារីច្រើននាក់ ក្នុងនោះមានក្មេងស្រីម្នាក់ជាជនពិកា។ ប៉ូលិស៥០នាក់ទំនងជាត្រូវបានសម្លាប់កាលពីថ្ងៃអាទិត្យ នៅក្បែរក្រុងមូស៊ូល។
អង្គការសហប្រជាជាតិបានទទួលព័ត៌មានទាំងនេះ ពីជនស៊ីវិល និងខាងរដ្ឋាភិបាលផ្សេងៗ។ តែដើម្បីសុវត្ថិភាពសន្តិសុខពួកគេ អង្គការសហប្រជាជាតិមិនបញ្ចេញអត្តសញ្ញាណពួកគេទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ