នុយក្លេអ៊ែរអ៊ីរ៉ង់ ៖ មហាអំណាច៥+១ និងអ៊ីរ៉ង់ ផ្តើមចរចាស៊ីជម្រៅ
ក្រុមប្រទេសមហាអំណាចទាំង៥ ចិន អាមេរិក បារាំង អង់គ្លេស រុស្ស៊ី បូកនិងអាល្លឺម៉ង់ មានពេល៦ថ្ងៃ សម្រាប់ស្វែងរកកិច្ចព្រមព្រៀង ជាប្រវត្តិសាស្ត្រមួយ ស្តីពីកម្មវិធីនុយក្លេអ៊ែរអ៊ីរ៉ង់។ ប្រមុខការទូតចិន អាមេរិក បារាំង អង់គ្លេស រុស្ស៊ី អាល្លឺម៉ង់ និងតំណាងភាគីអ៊ីរ៉ង់ បានចាប់ផ្តើមបើកកិច្ចពិភាក្សាពេញអង្គជាលើកទីមួយ នៅទីក្រុងវីយ៉ែនប្រទេសអូទ្រីស្ត បន្ទាប់ពីមានជំនួបទ្វេភាគីនៅថ្ងៃអង្គារម្សិលមិញរួច។ ជំនួបប្រជុំនេះត្រូវសម្រេចកម្មវត្ថុឱ្យបានយ៉ាងយូរនៅថ្ងៃទី ២៤ វិច្ឆកាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
អ៊ីរ៉ង់ និងក្រុមប្រទេសមហាអំណាច៥+១ ត្រូវចាប់ផ្តើមនៅថ្ងៃនេះ ពិភាក្សាគ្នាអំពីចំណុចលម្អិតៗ ដើម្បីសម្រេចឱ្យបាននូវកិច្ចព្រមព្រៀងជាប្រវត្តិសាស្ត្រ ក្នុងសំណុំរឿងនុយក្លេអ៊ែរអ៊ីរ៉ង់។ សំណុំរឿងដែលបស្ចឹមលោក បានសង្ស័យតាំងពីឆ្នាំ២០០២មក ថាតេអេរ៉ង់ មានមហិច្ឆតាផលិតអាវុធបរមាណូ ក្រោមរូបភាពអភិវឌ្ឍន៍កម្មវិធីនុយក្លេអ៊ែរស៊ីវិល។
ការចរចានុយក្លេអ៊ែរអ៊ីរ៉ង់ មានលក្ខណៈស្មុគស្មាញបំផុត។ ការចរចាមានសន្ទុះយ៉ាងខ្លាំង ឡើងវិញ តាំងពីជិតមួយឆ្នាំមក តែនៅមិនអាចធានាបានច្បាស់លាស់អំពីលទ្ធផលទៀត។ អ៊ីរ៉ង់ ចង់ឃើញទណ្ឌកម្មធ្ងន់ៗត្រូវដកចេញ ដើម្បីផ្តល់ដណ្តើមដល់សេដ្ឋកិច្ចជាតិ ឯចំណែកក្រុមប្រទេសមហាអំណាចវិញ ទាមទារឱ្យអ៊ីរ៉ង់កំរិតសមត្ថភាពនុយក្លេអ៊ែរ ដែលគ្មានសោះលក្ខណៈយោធា។
ពេលមកដល់ក្រុងវីយ៉ែនភ្លាម ប្រមុខការទូតអ៊ីរ៉ង់ បានសន្យាប្រឹងឱ្យអស់សមត្ថភាពរហូតដល់នៅថ្ងៃចុងក្រោយនៃជំនួបប្រជុំ ព្រោះកិច្ចព្រមព្រៀងអាចកើតជារូបរាងបាន ប្រសិនបើក្រុមប្រទេសមហាអំណាច ជាពិសេសសហរដ្ឋអាមេរិក មិនទាមទារជ្រុលពេក។
លោក ចន ឃែរីប្រមុខការទូតអាមេរិក ក៏ ដូចជាប្រមុខការទូតក្រុមប្រទេសមហាអំណាច៥+១ ផ្សេងទៀត នឹងត្រូវមានវត្តមានក្នុងជំនួបក្រុងវីយ៉ែនសប្តាហ៍នេះដែរ កំពុងបន្តស្ថិតនៅក្នុងក្រុងឡុងដ៍សិន ដោយប្រគល់និងទម្លាក់ភារៈចរចា ទៅឱ្យលោកស្រីអតីតប្រមុខការទូតសហភាពអឺរ៉ុប កាទ្រីន អាស្តុន។ លោក ឃែរី ត្រូវពិគ្រោះជាមួយក្រុមអ្នកចរចា និងសម្រេចជាមួយវ៉ាស៊ីនតោន បន្ទាប់មកត្រូវជួបពិភាក្សាជាមួយសមភាគីបារាំង និងអារ៉ាប៊ីសាអ៊ូឌីត ស្តីពីសំណុំរឿងនុយក្លេអ៊ែរអ៊ីរ៉ង់សិន មុននឹងកំណត់ថ្ងៃទៅចូលរួមប្រជុំជាមួយតំណាងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ