លោក ត្រាំ និងលោក រ៉ូហានី គំរាមគ្នាទៅវិញទៅមក ដោយប្រើពាក្យសម្តីធ្ងន់ៗ
ប្រធានាធិបតីអាមេរិក និងប្រធានាធិបតីអ៊ីរ៉ង់ បានទាស់សម្តីគ្នាខ្លាំង ដែលកំពុងបង្កជាសង្គ្រាមពាក្យសម្តីយ៉ាងក្តៅគកុក។ ថ្ងៃអាទិត្យ ទី២២កក្កដា លោក ដូណាល់ ត្រាំ ថា អ៊ីរ៉ង់នឹងទទួលរងផលលំបាកទុក្ខវេទនាមិនធ្លាប់មាន បើចង់សាកជាមួយអាមេរិក។ នេះជាចម្លើយនឹងការព្រមានរបស់លោក រ៉ូហានី ដែលបានព្រលយពាក្យថា កុំចង់លេងកន្ទុយតោ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
លោក ដូណាល់ ត្រាំ សរសេរតាម Twitter ថា «កុំចង់មកគំរាមកំហែងអាមេរិកឲ្យសោះ បើមិនដូច្នេះទេ អ្នកឯងនឹងទទួលផលវិបាកដែលមិនធ្លាប់មានក្នុងប្រវត្តិសាស្ត្ររបស់ខ្លួន។ យើងអាមេរិក! យើងមិនមែនជាប្រទេសដែលចាំតែឈរស្តាប់ពាក្យសម្តីប្រមាថសម្លាប់ និងការគំរាមកំហែងយ៉ាងហិង្សាបានទេ»។ នេះជាចម្លើយរបស់ប្រមុខរដ្ឋអាមេរិក តបទៅនឹងការព្រមានរបស់ប្រធានាធិបតីអ៊ីរ៉ង់ កាលពីថ្ងៃសៅរ៍ ទី២១កក្កដា កន្លងទៅ។ លោកប្រធានាធិបតីអ៊ីរ៉ង់ ហាស់សាន រ៉ូហានី បានព្រមានតាមកាសែតក្នុងស្រុករបស់ខ្លួនថា «បើអាមេរិកចង់បានសុខសាន្តជាសន្តិភាពជាមួយអ៊ីរ៉ង់ នោះគឺនឹងមានសន្តិភាពគ្រប់គ្នា តែបើអាមេរិកចង់ធ្វើសង្គ្រាមជាមួយអ៊ីរ៉ង់ នេះគឺជាប្រភពនៃសង្គ្រាមគ្រប់ទីកន្លែង។ ហេតុនេះ កុំចង់លេងកន្ទុយតោ»។
សូមជ្រាបថា អាមេរិកនិងអ៊ីរ៉ង់ រឹងរឹតតែឈ្លោះពាក្យសម្តីគ្នាខ្លាំង នៅក្នុងអាណត្តិការងាររបស់លោក ត្រាំ។ អាមេរិក បានសម្រេចដកខ្លួន ដើរចេញពីកិច្ចព្រមព្រៀងរបស់អង្គការសហប្រជាជាតិ ស្តីពីគម្រោងថាមពលនុយក្លែអ៊ែរអ៊ីរ៉ង់។ ហើយកាលពីចុងឆ្នាំ២០១៧កន្លងទៅនេះ គឺនៅពេលដែលមានចលនាបាតុកម្មនៅទូទាំងប្រទេសអ៊ីរ៉ង់, លោកប្រធានាធិបតីអាមេរិក ដូណាល់ ត្រាំ បានប្រកាសជំរុញឲ្យពលរដ្ឋអ៊ីរ៉ង់ក្រោកងើបឈរ នាំគ្នាផ្លាស់ប្តូររបរដឹកនាំអ៊ីរ៉ង់ទៀតផង។ មិនតែប៉ុណ្ណោះ អាមេរិករបស់លោក ត្រាំ បានដាក់ទណ្ឌកម្មសេដ្ឋកិច្ចជាបន្តបន្ទាប់លើកអ៊ីរ៉ង់ ហើយព្រមទាំងបានអំពាវវនាវឲ្យប្រទេសដទៃ ឈប់នាំគ្នា ទិញប្រេងពីអ៊ឺរ៉ង់ថែមទៀត។
ទាំងនេះ គឺជាការមិនអាចទទួលយកបានទាល់តែសោះ សម្រាប់ថ្នាក់ដឹកនាំអ៊ីរ៉ង់។ ហើយកាលពីថ្ងៃសៅរ៍កន្លងទៅដែរ ថ្នាក់ដឹកនាំកំពូលអ៊ីរ៉ង់ បានលើកឡើងថា ការចរចា ឬការចុះហត្ថលេខាអ្វីណាក៏ដោយ ជាមួយអាមេរិក គឺជារឿងមិនបានការឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ