បទឈប់បាញ់មនុស្សធម៌នៅហ្កាហ្សាផុតពេលកំណត់ អ៊ីស្រាអែលបន្តវាយប្រហារក្រុមហាម៉ាស
បទឈប់បាញ់មនុស្សធម៌ ៥ម៉ោង ដែលក្រុមហាម៉ាសនិងកងទ័ពអ៊ីស្រាអែលបានព្រមព្រៀងគ្នាអនុវត្តនៅថ្ងៃព្រហស្បតិ៍នេះ បានផុតពេលកំណត់ហើយ។ ក្រោយពេលកំណត់នេះ នៅល្ងាចថ្ងៃព្រហស្បតិ៍ កងទ័ពអ៊ីស្រាអែលបានបន្តការវាយប្រហារលើក្រុមហាម៉ាសទៀត។ នៅក្រុងគែរ អេហ្ស៊ីបវិញ កិច្ចចរចារវាងភាគីប៉ាឡេស្ទីន និងអ៊ីស្រាអែល បានបន្តដំណើរការយ៉ាងផុសផុល ដើម្បីរកដំណោះស្រាយហិង្សាហ្កាហ្សា តែនៅគ្មានចេញលទ្ធផលអ្វីនៅឡើយ។ នាយករដ្ឋមន្ត្រីតួកគី បានចោទអ៊ីស្រាអែលថា ព្យាយាមសម្លាប់រង្គាលលើជនជាតិប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
នៅថ្ងៃព្រហស្បតិ៍នេះ អ្នកទទួលខុសត្រូវអ៊ីស្រាអែលមួយរូប មិនបញ្ចេញអត្តសញ្ញាណ បានខំប្រាប់សារព័ត៌មានបារាំង អា អេហ្វ ប៉េ ថាអ៊ីស្រាអែលបានចរចាសម្រេចចេញកិច្ចព្រមព្រៀងឈប់បាញ់ ជាមួយក្រុមហាម៉ាសប៉ាឡេស្ទីន។ យោងតាមអ្នកទទួលខុសត្រូវរូបនោះ បទឈប់បាញ់នេះ ត្រូវអនុវត្តនៅថ្ងៃសុក្រនេះតែម្តង។ ប៉ុន្តែ ក្រុមហាម៉ាសបានបដិសេធ ថាគ្មានបទឈប់បាញ់អ្វីទេ។ ដូចការប្រកាសរបស់ក្រុមហាម៉ាស អ៊ីស្រាអែលមិនបង្អង់យូរឡើយ នៅថ្ងៃព្រហស្បតិ៍នេះ ក្រោយបទឈប់បាញ់មនុស្សធម៌បានផុតពេលកំណត់។ កងទ័ពអ៊ីស្រាអែលបានបន្តការវាយប្រហារលើក្រុមហាម៉ាសដដែល។
បទឈប់បាញ់មនុស្សធម៌ ដំណើរការរយៈពេល៥ម៉ោង បានផុតកំណត់នៅ១២ម៉ោងសកល ថ្ងៃព្រហស្បតិ៍ម្សិលមិញ ជាកិច្ចព្រមព្រៀងរវាងក្រុមហាម៉ាសនិងកងទ័ពអ៊ីស្រាអែល ស្របតាមការទទូចសុំរបស់អង្គការសហប្រជាជាតិ។ បទឈប់បាញ់មនុស្សធម៌មានទិសដៅជួយអោយប្រជាជនប៉ាឡេស្ទីននៅតំបន់រងគ្រោះហ្កាហ្សា អាចទទួលបានជំនួយមនុស្សធម៌ និងទទួលការព្យាបាលរបួស។ នៅថ្ងៃពុធ មុនមានបទឈប់បាញ់មនុស្សធម៌ ការវាយប្រហារយោធាអ៊ីស្រាអែល បានបន្តសម្លាប់ជនជាតិប៉ាឡេស្ទីនច្រើននាក់ បន្ថែមទៀត ក្នុងនោះគេឃើញមានកុមារជាច្រើននាក់។ គិតតាំងពីថ្ងៃចាប់ផ្តើមការប្រយុទ្ធរវាងអ៊ីស្រាអែលនិងក្រុមហាម៉ាសជិត១០ថ្ងៃមកនេះ ការវាយប្រហាររ៉ុកកែតក្រុមហាម៉ាសបានសម្លាប់ជនជាតិអ៊ីស្រាអែលម្នាក់។
ដោយសារប្រជាជនប៉ាឡេស្ទីន មានទាំងកុមារតូចៗជាច្រើន បានស្លាប់សន្ធឹកសន្ធាប់នៅតំបន់ហ្កាហ្សា នាយករដ្ឋមន្ត្រីតួកគី តៃយីព អ៊ែរដូហ្កាន បានបរិហារថ្កោលទោស អ៊ីស្រាអែលថា មានបំណងមុតមាំសម្លាប់រង្គាលលើជនជាតិប៉ាឡេស្ទីន។ យោងតាមលោកអ៊ែរដូហ្កាន អ៊ីស្រាអែលមិនមែនទើបតែសម្លាប់រង្គាលជនជាតិប៉ាឡេស្ទីនជាលើកទី១ទេ អ៊ីស្រាអែលសម្លាប់ជនជាតិប៉ាឡេស្ទីនតាំងពីឆ្នាំ១៩៤៨ ពិសេសគឺក្នុងថ្ងៃបុណ្យសាសនារ៉ាម៉ាទនអ៊ីស្លាមតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ