អ៊ីស្រាអែលនិងប៉ាឡេស្ទីនកំណត់ពេល៩ខែដើម្បីចរចាឲ្យបានកិច្ចព្រមព្រៀង
ចុះផ្សាយនៅថ្ងៃ៖
ស្តាប់ - ០៥:១២
កាលពីល្ងាចថ្ងៃអង្គារម្សិលមិញ នៅក្នុងការចរចាជំហានបឋម ដែលបើកធ្វើនៅសហរដ្ឋអាមេរិក តំណាងប៉ាឡេស្ទីន និងអ៊ីស្រាអែលបានព្រមព្រៀងគ្នាថា នឹងចរចាឲ្យបានចេញជាកិច្ចព្រមព្រៀងចុងក្រោយមួយ នៅក្នុងរយៈពេល ៩ខែខាងមុខ។ ការចរចាផ្លូវការនឹងត្រូវបើកធ្វើ នៅក្នុងរយៈពេល ២សប្តាហ៍ខាងមុខ ក្រោមការសម្របសម្រួលរបស់សហរដ្ឋអាមេរិក។ ខាងក្រោមនេះ គឺជាចំណុចសំខាន់ៗ ដែលអាចជាបញ្ហាចម្រូងចម្រាសក្នុងការចរចានេះ។
ក្រុងយេរូសាឡឹម
ប៉ាឡេស្ទីនទាមទារឲ្យធ្វើការបែងចែកក្រុងយេរូសាឡឹមជាពីរ៖ ខាងលិចឲ្យទៅអ៊ីស្រាអែល ហើយក្រុងយេរូសាឡឹមខាងកើតត្រូវដាក់ជារដ្ឋធានីរបស់ប៉ាឡេស្ទីន។ ចំណែកអ៊ីស្រាអែលវិញប្រកាន់ជំហរថា ក្រុងយេរូសាឡឹមទាំងមូល គឺជារបស់អ៊ីស្រាអែល ដោយមិនអាចពុះចែកបាន។
តាមពិត ដែនដីយេរូសាឡឹមខាងកើតនេះ កាលពីមុនធ្លាប់ស្ថិតក្រោមការកាន់កាប់របស់ហ្សកដានី ក៏ប៉ុន្តែ ត្រូវអ៊ីស្រាអែលវាយដណ្តើមកាន់កាប់ ចាប់តាំងពីសង្រ្គាមឆ្នាំ១៩៦៧មក ហើយបច្ចុប្បន្ននេះ អ៊ីស្រាអែលចាត់ទុកក្រុងយេរូសាឡឹមថាជារដ្ឋធានីរបស់ខ្លួន ប៉ុន្តែ សហគមន៍អន្តរជាតិជាទូទៅមិនទទួលស្គាល់។ សូម្បីតែសហរដ្ឋអាមេរិក ដែលជាសម្ព័ន្ធមិត្តក៏មិនទទួលស្គាល់ដែរ ដោយបន្តរក្សាស្ថានទូត នៅក្នុងទីក្រុង Tel Aviv ដែលជារដ្ឋធានីទទួលស្គាល់ដោយសហគមន៍អន្តរជាតិ។
ខ្សែបន្ទាត់ព្រំដែន និងការតាំងទីលំនៅរបស់ជនជាតិជ្វីហ្វក្នុងទឹកដីប៉ាឡេស្ទីន
ប៉ាឡេស្ទីនទាមទារថា ព្រំដែនរវាងអ៊ីស្រាអែល និងប៉ាឡេស្ទីន ត្រូវតែយកតាមខ្សែបន្ទាត់ព្រំដែន មុនឆ្នាំ១៩៦៧ ហើយឲ្យអ៊ីស្រាអែលផ្អាករាល់ការសាងសង់លំនៅដ្ឋានជនជាតិជ្វីហ្វ ចូលទៅក្នុងទឹកដីប៉ាឡេស្ទីន ហួសពីខ្សែបន្ទាត់ព្រំដែននេះ។
ចំណែកខាងអ៊ីស្រាអែលវិញ អ្នកនយោបាយអ៊ីស្រាអែលមានជំហរមិនដូចគ្នាទេ ចំពោះបញ្ហានេះ។ ក៏ប៉ុន្តែ លោកនាយករដ្ឋមន្រ្តីអ៊ីស្រាអែលបច្ចុប្បន្ន គឺលោក បេនយ៉ាមីន នេតាន់យ៉ាហ៊ូ មានការព្រមព្រៀងជាគោលការណ៍ទៅលើការបង្កើតរដ្ឋឯករាជ្យ ដោយអ៊ីស្រាអែលត្រូវដកខ្លួនចេញពីទឹកដីប៉ាឡេស្ទីន ដែលអ៊ីស្រាអែលចូលកាន់កាប់ក្រោយឆ្នាំ១៩៦៧ ក៏ប៉ុន្តែ តំបន់ណាដែលមានការសាងសង់លំនៅដ្ឋានរបស់ជនជាតិជ្វីហ្វ ហើយមានជនជាតិជ្វីហ្វរស់នៅទីនោះរួចហើយ ត្រូវរក្សាទុកជាដែនដីអ៊ីស្រាអែល។
ដូច្នេះហើយបានជាប្រទេសអារ៉ាប់បានលើកជាសំណើមួយ ដើម្បីសម្របសម្រួលគ្នា គឺឲ្យអ៊ីស្រាអែលរក្សាទុកតំបន់ដែលមានលំនៅដ្ឋានជនជាតិជ្វីហ្វបាន ក៏ប៉ុន្តែ ត្រូវផ្តល់ដីនៅតំបន់ផ្សេងឲ្យទៅប៉ាឡេស្ទីន ដើម្បីជាការដោះដូរគ្នា។ អ៊ីស្រាអែលនៅមិនទាន់បានបង្ហាញជំហរច្បាស់លាស់នៅឡើយទេ ជុំវិញសំណើនេះ ក៏ប៉ុន្តែ អ្វីដែលគេសង្កេតឃើញ គឺអ៊ីស្រាអែល មិនព្រមផ្អាកការសាងសង់លំនៅដ្ឋានជនជាតិជ្វីហ្វ ចូលទៅក្នុងទឹកដីប៉ាឡេស្ទីនទេ។
ការវិលត្រឡប់របស់ជនភៀសខ្លួនប៉ាឡេស្ទីន
ជនភៀសខ្លួន ដែលជាចំណុចចម្រូងចម្រាស ក្នុងការចរចា រវាងអ៊ីស្រាអែល និងប៉ាឡេស្ទីន គឺសំដៅទៅលើជនជាតិប៉ាឡេស្ទីនទាំងអស់ ដែលបានរត់ភៀសខ្លួនចេញពីសង្រ្គាម រវាងអារ៉ាប់ និងអ៊ីស្រាអែល ចាប់តាំងពីឆ្នាំ១៩៤៨មក។
ប៉ាឡេស្ទីនទាមទារឲ្យអ៊ីស្រាអែលអនុញ្ញាតឲ្យជនភៀសខ្លួនប៉ាឡេស្ទីនទាំងអស់នេះអាចវិលត្រឡប់ទៅភូមិកំណើតរបស់ពួកគេវិញ ដោយរាប់បញ្ចូលទាំងជនជាតិប៉ាឡេស្ទីន ដែលរស់នៅក្នុងទឹកដីអ៊ីស្រាអែលផងដែរ។ មានន័យថា ជនជាតិប៉ាឡេស្ទីនណា ដែលធ្លាប់រស់នៅក្នុងទឹកដីអ៊ីស្រាអែលពីមុន ហើយបានរត់ភៀសខ្លួនចេញពីភូមិកំណើត ដើម្បីគេចពីសង្រ្គាម ត្រូវតែអាចវិលត្រឡប់ទៅអ៊ីស្រាអែលវិញ ហើយត្រូវទទួលបានសិទ្ធិជាពលរដ្ឋរបស់អ៊ីស្រាអែល។
ចំណែកខាងអ៊ីស្រាអែលវិញ ជំទាស់ដាច់ខាត មិនទទួលជនជាតិប៉ាឡេស្ទីនទាំងអស់នេះវិញទេ។ អ៊ីស្រាអែលតែងតែលើកឡើងថា ការទាមទារឲ្យជនភៀសខ្លួនប៉ាឡេស្ទីនវិលត្រឡប់ទៅរស់នៅស្របច្បាប់ ក្នុងទឹកដីអ៊ីស្រាអែលវិញ គឺជាយុទ្ធសាស្រ្តកម្ទេចរដ្ឋអ៊ីស្រាអែល តាមរយៈប្រជាសាស្រ្ត។ ដូច្នេះហើយបានជាលោកនេតាន់យ៉ាហ៊ូទាមទារថា នៅក្នុងកិច្ចព្រមព្រៀងសន្តិភាពជាមួយប៉ាឡេស្ទីន គេត្រូវតែទទួលស្គាល់ច្បាស់លាស់ថា រដ្ឋអ៊ីស្រាអែលត្រូវតែជា “រដ្ឋជ្វីហ្វ” (គឺរដ្ឋសម្រាប់តែជនជាតិជ្វីហ្វ)។
អាមេរិក ដែលជាអ្នកសម្របសម្រួលជម្លោះ បានស្នើឡើងនូវដំណោះស្រាយកណ្តាលមួយ គឺអ៊ីស្រាអែលមិនចាំបាច់ត្រូវទទួលជនភៀសខ្លួនប៉ាឡេស្ទីនទេ ក៏ប៉ុន្តែ ត្រូវបង់ជាសំណងសមរម្យទៅឲ្យជនភៀសខ្លូនទាំងអស់នេះ។
ខាងប៉ាឡេស្ទីននៅមិនទាន់បង្ហាញពីជំហរផ្លូវការ ចំពោះដំណោះស្រាយជាសំណងនេះទេ ក៏ប៉ុន្តែ មានការជជែកគ្នាជារឿយៗ នៅក្នុងចំណោមមេដឹកនាំប៉ាឡេស្ទីន ដែលពិចារណា ក្នុងការទទួលយកសំណងជាថ្នូរនឹងសិទ្ធិក្នុងការធ្វើមាតុភូមិនិវត្តន៍ជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ