អ៊ីស្រាលអែលបើកការប្រយុទ្ធទ័ពជើងគោក ទៅក្នុងតំបន់ហ្កាហ្សា
បន្ទាប់ពីបទឈប់បាញ់មនុស្សធម៌បរាជ័យ អ៊ីស្រាអែលបានសម្រេច កាលពីថ្ងៃព្រហស្បតិ៍ ប្រកាសប្រើទ័ពជើងគោកវាយលុកក្នុងតំបន់ហ្កាហ្សាដែលគ្រប់គ្រងដោយក្រុមហាម៉ាស ប៉ាឡេស្ទីន។ នៅក្នុងថ្ងៃសុក្រនេះ ប្រតិបត្តិការទ័ពជើងគោក របស់អ៊ីស្រាអែល នៅហ្កាហ្សា បានបង្កឲ្យមានមនុស្សប្រមាណ ១៩នាក់ ស្លាប់ ដែលនៅក្នុងនោះ ភាគច្រើនជាប្រជាជនស៊ីវិល និងមានទាហានអ៊ីស្រាអែលម្នាក់។
ចុះផ្សាយនៅថ្ងៃ៖
ស្តាប់ - ០២:១៩
លើកនេះ អ៊ីស្រាអែលបានប្រើធម៌ក្តៅ សំពងក្រុមហាម៉ាស ដោយបានបើកភ្លើងខៀវឲ្យមានអន្តរាគមន៍ទ័ពជើងគោកអ៊ីស្រាអែលទៅក្នុងដែនដីហ្កាហ្សា របស់ក្រុមហាម៉ាសប៉ាឡេស្ទីន។ ទិសដៅរបស់អ៊ីស្រាអែលគឺគាស់រំលើងទីតាំងរបស់ក្រុមហាម៉ាស និងបញ្ឈប់ការបាញ់គ្រាប់រ៉ុកកែត ដែលអ៊ីស្រាអែលចាត់ទុកជាមេគ្រោះថ្នាក់ គំរាមកំហែងដល់សន្តិសុខរបស់ប្រជាជនអ៊ីស្រាអែល។
យោងតាមកងទ័ពអ៊ីស្រាអែល ចាប់តាំងពីបើកការប្រយុទ្ធទ័ពជើងគោក កាលពីថ្ងៃព្រហស្បតិ៍ ទាហានអ៊ីស្រាអែលចាប់បានភេរវជន១៤នាក់ នៅក្នុងសមរភូមិប្រយុទ្ធ បាញ់បំផ្លាញគ្រាប់រ៉ុកកែត ២០ដើម និងបាញ់កម្ទេចរូងក្រោមដី ដែលក្រុមហាម៉ាសប្រើដើម្បី ជួញដូរទំនិញ និងដឹកជញ្ជូនអាវុធចូលក្នុងតំបន់ហ្កាហ្សា។
ប្រតិបត្តិការទ័ពជើងគោកហាក់សម្រេចទៅតាមការគ្រោងទុករបស់ក្រសួងការពារជាតិអ៊ីស្រាលអែល។ តាមខុទ្ធការល័យនាយករដ្ឋមន្រ្តីបិនចាមីន នេតានីញ៉ាហ៊ូ អ៊ីស្រាអែលបើកការប្រយុទ្ធតាមជើងគោក បន្ទាប់ពីក្រុមហាម៉ាសបានបដិសេធមិនធ្វើតាមកិច្ចព្រមព្រៀងស្តីពីបទឈប់បាញ់ ធ្វើនៅអេហ្សីប កាលពីថ្ងៃព្រហស្បតិ៍ និងបានផ្គើនបន្តបាញ់គ្រាប់រ៉ុកកែតចូលក្នុងទឹកដីអ៊ីស្រាអែល។
នេះជាលើកទីមួយ ចាប់តំាងពីឆ្នាំ ២០០៨ ដែលអ៊ីស្រាអែលប្រើទ័ពជើងគោកវាយលុកក្នុងតំបន់ហ្កាហ្សា។ នៅចន្លោះខែធ្នូ ឆ្នាំ ២០០៨ និងខែមករាឆ្នាំ ២០០៩ ទ័ពជើងគោកអ៊ីស្រាអែល បានសម្លាប់ប្រជាជនប៉ាឡេស្ទីន១៤០០នាក់។ ប៉ុន្តែ នៅទីបំផុត អ៊ីស្រាអែលនៅតែបរាជ័យ ដោយមិនអាចទប់ស្កាត់ ការបាញ់ផ្លោងគ្រាប់រ៉ុកកែតរបស់ក្រុមហាម៉ាស ពីក្នុងតំបន់ហ្កាហ្សា។ ក្រុមហាម៉ាសបានតាំងទី នៅតំបន់ហ្កាហ្សា បន្ទាប់ពីអ៊ីស្រាអែលបានដកខ្លួនជាឯកតោភាគី ពីហ្កាហ្សា នៅឆ្នាំ ២០០៥។ នៅថ្ងៃសុក្រ រដ្ឋមន្រ្តីអ៊ីស្រាអែល ទទួលបន្ទុកខាងទំនាក់ទំនងព័ត៌មានបានរុញច្រានចោលការសន្និដ្ឋានដែលថា អ៊ីស្រាអែលចង់វាយដណ្តើមយកហ្កាហ្សាមកគ្រប់គ្រងជាថ្មី។
កាលពីថ្ងៃព្រហស្បតិ៍ រដ្ឋមន្រ្តីការបរទេសអាមេរិកបាននិយាយទូរស័ព្ទ ទៅនាយករដ្ឋមន្រ្តីអ៊ីស្រាអែល ដើម្បីប្រាប់ឲ្យអ៊ីស្រាអែលជៀសវាង ការខូចខាត ឲ្យបានខ្ពស់បំផុត និងបាញ់សំដៅតែក្រុមភេរវជន។ ចំណែកលោកអគ្គលេខាធិការ បាន គីមូន បានអំពាវនាវឲ្យអ៊ីស្រាអែលធ្វើសកម្មភាពដើម្បីបញ្ចប់ការបាត់បង់ជីវិតរបស់ប្រជាជនស៊ីវិល។ ប្រតិបត្តិការវាយប្រហាររបស់អ៊ីស្រាអែល ដែលចាប់ផ្តើម កាលពីថ្ងៃទី ៨កក្កដា បានសម្លាប់ប្រជាជនប៉ាឡេស្ទីន ២៦០នាក់ ដែលក្នុងនោះភាគច្រើនជាប្រជាជនស៊ីវិល ស្ត្រី និងកុមារ។ ដូចលើកមុនៗ អ៊ីស្រាអែលបានចោទក្រុមហាម៉ាសថា បានយកប្រជាជនស៊ីវិលធ្វើជាខែលរបស់ខ្លួន សម្រាប់រងគ្រាប់ពីអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ