តើជប៉ុននឹងអាចក្លាយជាមហាអំណាចនុយក្លេអ៊ែរបានដែរឬទេ?
ចុះផ្សាយនៅថ្ងៃ៖
ស្តាប់ - ០៧:២៤
ថ្ងៃនេះ ហ្សង់-ហ្វ្រង់ស័រ តាន់សូមបន្តសិក្សាទៅលើភូមិសាស្រ្តនយោបាយនៃប្រទេសជប៉ុនតទៅទៀត។ តើតទៅថ្ងៃមុខ ជប៉ុននឹងអាចក្លាយទៅជាមហាអំណាចនុយក្លេអ៊ែរបានដែរឬទេ? សំណួរនេះបាននឹងកំពុងបន្តចោទឡើងយ៉ាងផុសផុលជាង១០ឆ្នាំកន្លងមកហើយ។
តើជប៉ុនគួរឬមិនគួរបង្កើតអាវុធនុយក្លេអ៊ែរ?
សំណួរនេះបាននិងកំពុងបន្តចោទឡើងយ៉ាងផុសផុលនៅក្នុងប្រទេសអាស៊ីមួយនេះ។ គឺជាការតស៊ូមតិមួយដែលកើតឡើង ជួនចំពេលដែលសន្តិសុខរបស់ជប៉ុនឋិតនៅក្រោមការគំរាមកំហែង។ ការគំរាមកំហែង ជាបឋម ពីសំណាក់កូរ៉េខាងជើងដែលកំពុងបន្តផលិត អាវុធនុយក្លេអ៊ែរ។ ការគំរាមកំហែង បន្ទាប់មកទៀត ពីសំណាក់ចិនដែលកំពុងបន្តពង្រឹងសមត្ថភាពយោធារបស់ខ្លួន និងដែលមានមហិច្ឆតាវាទទីយកដីកោះនៅក្នុងសមុទ្រចិនខាងកើត និងសមុទ្រចិនខាងត្បូង។
គឺនៅក្នុងបរិបទនេះហើយ ដែលពួកអ្នកនយោបាយអភិរក្សនិយមមួយក្រុម ក្នុងនោះរួមមានជាអាទិ៍ អតីតរដ្ឋមន្ត្រីក្រសួងហិរញ្ញវត្ថុ Shoichi Nagakawa បានផ្តើម អះអាងចាប់ពីឆ្នាំ២០០៩មកថា ជប៉ុនត្រូវតែគិតគូរពីលទ្ធភាពនៃការបង្កើតអាវុធនុយក្លេអ៊ែរ។ សំដីនិងជំហររបស់ពួកអភិរក្សនិយមទាំងនេះកំពុងធ្វើឱ្យការតស៊ូមតិជុំវិញសំណុំរឿងអាវុធនុយក្លេអ៊ែរមានសន្ទុះផុសផុលឡើងវិញ។
យ៉ាងណាក៏ដោយ ជប៉ុនមានគ្រប់មធ្យោបាយនិងអាចប្រើពេលយ៉ាងខ្លីបំផុត ដើម្បីបង្កើតអាវុធនុយក្លេអ៊ែរ។ ជាក់ស្តែងនៅខែកុម្ភៈឆ្នាំ២០០៥ Kenichi Ohmae យុទ្ធសាស្រ្តវិទូជប៉ុនម្នាក់ដ៏ល្បីល្បាញបានអះអាងថា ជប៉ុនមានស្តុកទុកនូវជាតិPlutonium យ៉ាងតិចណាស់៥០តោន ដែលបើកលទ្ធភាពឱ្យបង្កើតគ្រាប់បែកបរមាណូបានយ៉ាងតិច២០០០គ្រាប់។ ម្ល៉ោះហើយ បច្ចេកទេសមិនមែនជាបញ្ហាហើយក៏មិនមែនជាបញ្ហាថវិកាដែរ តែឧបសគ្គធំគឺនយោបាយទៅវិញទេ។
ដូចដែលធ្លាប់បានលើកឡើងរួចហើយថា អតីតកាលយោធានិយមរបស់ជប៉ុន និងអនុស្សាវរីយ៍ស្រស់ៗនៅឡើយនៃទីក្រុងoshimaHir និងNagasaki ខ្ទេចខ្ទីក្រោមគ្រាប់បែកបរមាណូ ធ្វើឱ្យពលរដ្ឋជប៉ុនរារែកនិងបារម្ភ។ បន្ថែមពីលើនេះ កុំថាឡើយអាវុធនុយក្លេអ៊ែរ សូម្បីតែថាមពលនុយក្លេអ៊ែរក៏ពលរដ្ឋជប៉ុនមិនចង់បានផង ជាពិសេសតាំងពីមានគ្រោះថ្នាក់នុយក្លេអ៊ែរ ដោយហេតុតែការរញ្ជួយដីនិងរលកយក្សស៊ូណាមីនៅFukushima ឆ្នាំ២០១១រួចមក។
ដោយហេតុតែខ្លាចប្រតិកម្មរបស់សាធារណមតិជប៉ុនជុំវិញសំណុំរឿងអាវុធនុយក្លេអ៊ែរនេះ រដ្ឋាភិបាលជប៉ុនជាបន្តបន្ទាប់អះអាងម្តងហើយម្តងទៀតថា ជប៉ុននៅតែបន្តគោរពគោលការណ៍គ្មានអាវុធនុយក្លេអ៊ែរ អនុម័តនៅក្នុងឆ្នាំ១៩៦៧ដដែល នោះគឺ«មិនបង្កើតអាវុធនុយក្លេអ៊ែរ មិនប្រដាប់ទៅដោយអាវុធនុយក្លេអ៊ែរ និងមិនឱ្យមានអាវុធនុយក្លេអ៊ែរនៅលើទឹកដីជប៉ុន»។ ប៉ុន្តែទន្ទឹមនេះ ទីក្រុងTokyo គូសបញ្ជាក់ម្តងហើយម្តងទៀតថា រដ្ឋធម្មនុញ្ញសន្តិនិយម មិនបានហាមជប៉ុនមិនឱ្យបង្កើតអាវុធនុយក្លេអ៊ែរឡើយ។
តាមពិតទៅ ការតស៊ូមតិនៅជប៉ុនជុំវិញអាវុធនុយក្លេអ៊ែរបានផ្តើមលេចឡើង តាំងពីឆ្នាំ២០០២មកម្ល៉េះ ពោលគឺមុនការសាកល្បងអាវុធនុយក្លេអ៊ែរលើកទីមួយបង្អស់របស់កូរ៉េខាងជើងទៅទៀត។
ជាក់ស្តែង នៅខែឧសភាឆ្នាំ២០០២ បច្ចុប្បន្ននាយករដ្ឋមន្រ្តីShinzo Abe ដែលកាលណោះជាលេខារងនៃរដ្ឋាភិបាលKoizumi បានថ្លែងថា មានអាវុធនុយក្លេអ៊ែរមិនពិតជាផ្ទុយនឹងស្មារតីនៃរដ្ឋធម្មនុញ្ញសន្តិនិយមទេ។ ប៉ុន្មានសប្តាហ៍ក្រោយមកទៀត លេខានៃរដ្ឋាភិបាលKoizumi ផ្ទាល់ គឺYasuo Fukuda បានប្រកាសច្បាស់ជាងShinzo Abe ទៅទៀតថា ជប៉ុនត្រូវតែរក្សាសិទ្ធិក្នុងការសើរើមើលឡើងវិញលទ្ធភាពនៃការបង្កើតអាវុធនុយក្លេអ៊ែរ។
ក្រោយមកទៀត នៅខែមីនាឆ្នាំ២០០៣ នៅពេលដែលកូរ៉េខាងជើងមានមហិច្ឆតាកាន់តែច្បាស់ក្នុងការក្លាយជាមហាអំណាចនុយក្លេអ៊ែរ អនុប្រធានាធិបតីអាមេរិកសម័យនោះ គឺDick Cheney បាននិយាយយ៉ាងចំហថា «បើកូរ៉េខាងជើងមានគ្រាប់បែកបរមាណូនៅទីបំផុត ជប៉ុនប្រហែលជាត្រូវសើរើមើលឡើងវិញជំហររបស់ខ្លួននៅចំពោះមុខអាវុធនុយក្លេអ៊ែរ»។
មិនតែប៉ុណ្ណោះ ក្នុងឆ្នាំ២០០៣ដដែលនោះ ព័ត៌មានក្រៅផ្លូវការថែមទាំងបានឱ្យដឹងថា អ្នកជំនាញជប៉ុនមួយក្រុមខាងបញ្ហាយុទ្ធសាស្រ្តបានទទួលបញ្ជាឱ្យពិនិត្យមើលលទ្ធភាពនៃការបង្កើតគ្រាប់បែកបរមាណូទៀតផង។
ក្រោយមកទៀត នៅឆ្នាំ២០០៦ អ្នកសង្កេតការណ៍អន្តរជាតិបានតាមដានមើលយ៉ាងផ្ជិតផ្ចង់ជាទីបំផុតទង្វើរបស់រដ្ឋាភិបាលជប៉ុន។ ពីព្រោះកាលណោះ Shinzo Abe បានក្លាយជានាយករដ្ឋមន្ត្រីជាលើកទីមួយបង្អស់ ប៉ុន្មានថ្ងៃប៉ុណ្ណោះក្រោយពីកូរ៉េខាងជើងបានសាកល្បងជាលើកទីមួយអាវុធនុយក្លេអ៊ែររបស់ខ្លួន។
ដូចការប៉ាន់ស្មានមែន Shinzo Abe បានសាកល្បងឱ្យអាទិភាពទៅលើការកែប្រែរដ្ឋធម្មនុញ្ញសន្តិនិយម។ កាលណោះ នាយករដ្ឋមន្ត្រីរូបនេះ បានថ្លែងជាអាទិ៍ថា «សម័យយើងនេះ មិនដូចសម័យមុន ម្ល៉ោះហើយយើងមិនច្បាស់ជាត្រូវតែគោរពសេចក្តីសម្រេចចិត្តដែលត្រូវបានអនុម័តកាលពីសម័យមុននោះឡើយ»។ មិនតែប៉ុណ្ណោះ នៅឆ្នាំ២០០៦ដដែលនោះ Shinzo Abe បានតែងតាំងឥស្សរជនជាតិនិយមមួយចំនួនឱ្យកាន់កាប់មុខតំណែងគន្លឹះៗនៅក្នុងរដ្ឋាភិបាល រួមមាន Sochi Nakagawa និងTaro Azo ជាដើម ដែលសុទ្ធសឹងជាអ្នកចង់កែប្រែរដ្ឋធម្មនុញ្ញ។ ប៉ុន្តែនៅទីបំផុត ដោយហេតុតែខ្លាចប្រតិកម្មរបស់សាធារណមតិ គ្មានសោះឡើយសេចក្តីសម្រេចចិត្តឬទង្វើអ្វីមួយដែលដៅទៅរកការផ្លាស់ប្តូរលក្ខន្តិកជាសារវន្តរបស់ប្រទេស។ ប៉ុន្តែ ដោយសារតែShinzo Abe បានវិលមកក្តាប់អំណាចវិញតាំងពីឆ្នាំ២០១២មក សំណុំរឿងអាវុធនុយក្លេអ៊ែររបស់ជប៉ុន នៅតែជាប្រធានរឿងនៃការតស៊ូមតិយ៉ាងផុសផុលដដែល។
យ៉ាងណាក៏ដោយ ក្នុងរយៈកាលខ្លី រដ្ឋាភិបាលជប៉ុននឹងប្រហែលជានៅតែមិនអាចសម្រេចធ្វើឱ្យប្រទេសខ្លួនក្លាយជាមហាអំណាចនុយក្លេអ៊ែរបានឡើយ ដោយហេតុតែការប្រឆាំងដាច់ខាតពីសំណាក់ប្រជាពលរដ្ឋ ដូចដែលបានលើកឡើងរួចហើយ។ ប៉ុន្តែ ក្នុងរយៈកាលមធ្យមឬក្នុងរយៈកាលវែង២០ឬ៣០ឆ្នាំខាងមុខនេះ អ្វីៗក៏នឹងអាចកើតឡើងដែរ រួមទាំងការបង្កើតអាវុធនុយក្លេអ៊ែរ។ ទាំងនេះ បើសិនជាសា្ថនភាពភូមិសាស្រ្តនយោបាយតំបន់ឡើងកំដៅខ្លាំង បើសិនជាកូរ៉េខាងជើងនិងចិនហ៊ានធ្វើជ្រុលរហូតដល់ប៉ះពាល់សន្តិសុខជាសារវន្តរបស់ជប៉ុន ហើយបើសិនជាជប៉ុនលែងទុកចិត្តឆត្រនុយក្លេអ៊ែរអាមេរិកដែលការពារប្រទេសអាស៊ីមួយនេះជាច្រើនទសវត្សរ៍កន្លងមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ