ប្រមុខការទូតអាមេរិកបដិសេធថាមិនបានចាត់ទុកអ៊ីស្រាអែលជារដ្ឋអាប៉ាថេត
នៅល្ងាចថ្ងៃចន្ទម្សិលមិញ ប្រមុខការទូតអាមេរិក ចន ឃែររី បានបដិសេធថា មិនដែលបានចាត់ទុកអ៊ីស្រាអែលទៅនឹងរដ្ឋអាប៉ាថេត ដែលប្រកាន់ពូជសាសន៍ពណ៌សំបុរនោះទេ។ ការបដិសេធនេះ ជាការឆ្លើយតបទៅនឹងសារព័ត៌មានអាមេរិកកាំងមួយ ដែលបានចុះផ្សាយថា លោកចន ឃែររី បានព្រមានថា អ៊ីស្រាអែលអាចប្រឈមនឹងការក្លាយខ្លួនជារដ្ឋអាប៉ាថេត ប្រសិនបើអ៊ីស្រាអែលមិនចង់មានសន្តិភាពជាមួយប៉ាឡេស្ទីន អោយបានឆាប់ៗទេនោះ។ រឿងរ៉ាវនេះ បានធ្វើអោយមានភាពថ្នាំងថ្នាក់ជាមួយអ្នកដឹកនាំអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
នៅព្រឹកថ្ងៃចន្ទម្សិលមិញ សារព័ត៌មានអាមេរិក ឈ្មោះថា The Daily Beast បានចុះផ្សាយថា ក្នុងកិច្ចប្រជុំបិទទ្វារមួយនៅក្រុងវ៉ាស៊ីនតោន កាលពីថ្ងៃសុក្រ សប្តាហ៍មុន ប្រមុខការទូតអាមេរិក ចន ឃែររី បានព្រមានអ៊ីស្រាអែល ថាប្រសិនបើអ៊ីស្រាអែលមិនចង់មានសន្តិភាពអោយបានឆាប់ៗជាមួយប៉ាឡេស្ទីន នោះអ៊ីស្រាអែលអាចប្រឈមនឹងការក្លាយខ្លួនទៅជារដ្ឋអាប៉ាថេត ពោលគឺជារដ្ឋដែលប្រកាន់ពូជសាសន៍ពណ៌សំបុរ។
ល្ងាចថ្ងៃចន្ទ លោកចន ឃែររី បានចេញមុខបដិសេធដាច់អហង្កាថា លោកមិនដែលបានចាត់ទុកអ៊ីស្រាអែលដូចជារដ្ឋអាប៉ាថេតនោះទេ។ ប៉ុន្តែ លោកឃែររី បានទទួលស្គាល់ថា លោកបានលើកឡើងពីពាក្យថា អាប៉ាថេតនេះ ដើម្បីនិយាយពីការបំបែកជាតិសាសន៍នៅអាហ្វ្រិកខាងត្បូង ចន្លោះពីឆ្នាំ១៩៤៨ ទៅដល់ឆ្នាំ១៩៩៤នោះ។ ប្រមុខការទូតអាមេរិកបន្ថែមថា បើលោកអាចបង្វិលសម្លេងថយក្រោយបាន លោកប្រហែលជាប្រើពាក្យផ្សេងទៀតក្រៅពីនេះ។ ពាក្យពេចន៍របស់លោកឃៃររីបានបង្កជាភាពថ្នាំងថ្នាក់ដល់អ្នកដឹកនាំអ៊ីស្រាអែលជាច្រើនរូប។ នៅអាមេរិកវិញ សមាជិកព្រឹទ្ធសភានៃបក្សសាធារណរដ្ឋ បានទាមទាររហូតអោយលោកឃែររីចុះពីតំណែងទៀតផង។
ថ្ងៃ២៩មេសានេះ ជាថ្ងៃដែលអ៊ីស្រាអែលនិងប៉ាឡេស្ទីន តាមធម្មតាត្រូវរកបានកិច្ចព្រមព្រៀងស្វែងរកដំណោះស្រាយសន្តិភាព។ កិច្ចចរចារវាងភាគីទាំង២ ដែលជ្រោមជ្រែងដោយលោក ឃែររី អស់៩ខែមកនេះ មិនបានផ្តល់លទ្ធផលអ្វីទេ តែត្រូវបានភាគីទាំង២កាត់ផ្តាច់ ឈប់ចរចាទៅវិញ។ មូលហេតុចុងក្រោយ និងជាមូលហេតុចំបងបំផុត គឺដោយសារតែប៉ាឡេស្ទីនបានចុះកិច្ចព្រមព្រៀងផ្សះផ្សាជាមួយក្រុមហាម៉ាស ដើម្បីបង្កើតរដ្ឋាភិបាលរួបរួមមួយ ក្នុងពេលខាងមុខ ធ្វើអោយអ៊ីស្រាអែលព្យួរចោលកិច្ចចរចា។
យោងតាមអង្គការក្រៅរដ្ឋាភិបាលមួយ ឈ្មោះថា “សន្តិភាពឥឡូវនេះ” ក្នុងរយៈពេល៩ខែមកនេះ អ៊ីស្រអែលបានគាំទ្រគម្រោងសាងសង់ ផ្ទះសម្បែងជិត១ម៉ឺន៤ពាន់ ក្នុងតំបន់អាណានិគមជនជាតិហ្ស៊ីហ្វ នៅស៊ីសហ្សកដានី និងហ្សេរុយសាឡិមខាងកើត។ អង្គការនេះលើកឡើងថា ទង្វើនេះ បង្ហាញថា រដ្ឋាភិបាលអ៊ីស្រាអែលគ្មានភាពហ្មត់ចត់ ក្នុងកិច្ចពិភាក្សាជាមួយប៉ាឡេស្ទីនក្នុង៩ខែមកនេះទេ អ៊ីស្រាអែលធ្វើគ្រប់បែបយ៉ាងដើម្បីមិនអោយសម្រេចចេញនូវដំណោះស្រាយបង្កើតរដ្ឋអ៊ីស្រាអែលនិងប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ