ឃាតកម្មអ្នកកាសែតរុស្ស៊ីដែលបស្ចិមលោកនិយម នៅចំកណ្តាលក្រុងគៀវ
អ្នកកាសែតរុស្ស៊ីដែលបស្ចិមលោកនិយម ដ៏ល្បីល្បាញ ស្រាប់តែធ្លាក់ខ្លួនស្លាប់ ថ្ងៃ ពុធ២០កក្កដា ក្នុងរថយន្តដែលមានរូបគាត់ជាអ្នកកាច់ចង្កូត បណ្តាលមកពីការផ្ទុះនៃគ្រាប់បែក ដែលមានលាក់ទុកនៅពីក្រោមកន្លែងដែលគាត់អង្គុយបើកបរ ផ្ទុះនោះនៅចំកណ្តាលក្រុងគៀវ រដ្ឋធានីអ៊ុយក្រែន - ប្រទេសដែលជាងពីរឆ្នាំមកហើយ បន្តឆ្លងកាត់ វិបត្តិនយោបាយលង់ជ្រៅ។ កាលនៅរស់ អ្នកកាសែតនេះមិនញញើតនឹងទិតៀន ទាំងប្រធានាធិបតីរុស្ស៊ី ទាំងប្រធានាធិបតីអ៊ុយក្រែន ទាំងប្រធានាធិបតីបេឡារុស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
អ្នកកាសែតរុស្ស៊ីនេះ គឺលោក Pavel Sheremet មានដើមកំណើតពីបេឡារុស ប៉ុន្តែ បានកាន់លិខិតឆ្លងដែនជាពលរដ្ឋសហព័ន្ធរុស្ស៊ី ហើយប៉ុន្មានឆ្នាំចុងក្រោយ រស់នៅក្នុងប្រទេស អ៊ុយក្រែន ដោយតាមរយៈបទអត្ថាធិប្បាយខ្លួន តែងទិតៀនក្រុងម៉ូស្គូ ចំពោះ ការភ្ជាប់យកទឹកដីគ្រីមេរបស់អ៊ុយក្រែន។ នៅអ៊ុយក្រែន គាត់បានធ្វើការឲ្យវែបសៃដែលមានឥទ្ធិពល ក្រោមឈ្មោះថាUkrainska Pravda និងដឹកនាំកម្មវិធីរបស់វិទ្យុជាតិអ៊ុយក្រែន Vesti។
ថ្ងៃ២០កក្កដា ពេលដែលរថយន្តបើកដោយអ្នកកាសែតឯករាជ្យនេះ សំដៅទៅកាន់ស្ថានីយវិទ្យុនោះ ឈប់នៅត្រង់ភ្លើងស្តុប វាស្រាប់តែផ្ទុះគ្ឌាំង ហើយឆេះតែម្តង ផ្តាច់ជីវិតគាត់នៅនឹងកន្លែង។ ពេលស្លាប់នោះ គាត់មានអាយុទើប៤៤ឆ្នាំ។ ចំណែករថយន្តដែលគាត់បើកនោះ ជារបស់សហការិនីជាតិអ៊ុយក្រែន ដែលក៏ជាប្រពន្ធគាត់រស់នៅជាមួយគ្នាដោយឥតរៀបការជាផ្លូវការទេ។
សមត្ថកិច្ចដែលបានពិនិត្យមើលកម្រិតឆេះខ្ទេចខ្ទាំនៃរថយន្តផ្ទាល់ បានធ្វើការប៉ាន់ស្មាន ត្រួសៗថា គ្រាប់បែកដែលមានលាក់ទុកនៅខាងក្រោមកន្លែងអ្នកបើកបរហើយបញ្ជាឲ្យវា ផ្ទុះពីចម្ងាយ មានកម្លាំងផ្ទុះស្មើនឹងធាតុTNT ពី ៤០០ទៅ៦០០ក្រាម។
កាលរស់នៅបេឡារុស អ្នកកាសែតSheremet បានក្លាយជាគូប្រឆាំងរបស់ប្រធានាធិបតី Lukashenko ដែលឡើងកាន់អំណាចតាំងពីឆ្នាំ១៩៩៤មក ដោយចាត់ទុកការគ្រប់គ្រងនៃ មេដឹកនាំរូបនេះថាផ្តាច់ការ។
លុះនៅឆ្នាំ២០០០ គាត់បានទទួលសញ្ជាតិជាពលរដ្ឋរុស្ស៊ី ហើយបានធ្វើការជាអ្នកឆ្លើយឆ្លង របស់កាណាល់ទូរទស្សន៍រដ្ឋ” ប៉ុស្តលេខ-១”។ ក្នុងឆ្នាំ២០១៤ គាត់បានដកខ្លួនឈប់ធ្វើការនៅ ទូរទស្សន៍រុស្ស៊ី។ គាត់ក្លាយជាមិត្តដ៏ជំនិតម្នាក់របស់មេប្រឆាំង គឺលោក Boris Niemtsov ដែលត្រូវបានគេលួចបាញ់សម្លាប់នៅក្បែរវិមានក្រេមឡាំងតែម្តង។
បន្ទាប់មក គាត់បានឆ្លងទៅរស់នៅអ៊ុយក្រែន ហើយទិតៀន រុស្ស៊ីចំពោះការភ្ជាប់យកទឹកដីគ្រីមេរបស់អ៊ុយក្រែន កាលពីខែមិនាឆ្នាំ២០១៤។
នៅអ៊ុយក្រែន អ្នកកាសែតរុស្ស៊ី ដែលបស្ចិមលោកនិយមនោះ បានទិតៀនលោកប្រធានាធិបតី ប៉េត្រូ ប៉ូរ៉ូឆេនកូ ចំពោះការបណ្តោយ ឲ្យអំពើពុករលួយរីកស្គុះស្គាយក្នុងប្រទេស។ ចំណែកលោក ប៉ូរ៉ូឆេនកូ ថែមទាំងបានសុំ FBI អាមេរិកាំង ឲ្យជួយធ្វើអង្កេត លុះវែកមុខរកឃាតករឲ្យទាល់តែឃើញ។
វិមានក្រេមឡាំងបានសំដែងនូវ “ ក្តីកង្វល់មែនទែន “ ចំពោះឃាតកម្មពលរដ្ឋរុស្ស៊ី ហើយរំពឹង ថា ការស៊ើបអង្កេតអំពីឃាតកម្មនេះ នឹងប្រព្រឹត្តទៅដោយសច្ចៈ មិនលំអៀងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ