អាមេរិកនិងរុស្ស៊ីបន្តចរចាគ្នារឿងស៊ីរី មិនទាន់មានកិច្ចព្រមព្រៀងអ្វីនៅឡើយ
ជំនួបពិភាក្សារវាងប្រមុខការទូតអាមេរិក និងប្រមុខការទូតរុស្ស៊ី នៅក្រុងហ្សឺណែវ ថ្ងៃសុក្រម្សិលមិញ មិនបានផ្តល់លទ្ធផល រឺកិច្ចព្រមព្រៀងអ្វីទេ ទាក់ទងនឹងកិច្ចសហប្រតិបត្តិការយោធា រឺក៏ការបញ្ចប់ជម្លោះស៊ីរី។ ភាគីទាំង២បន្តការចរចាគ្នាទៀត ដើម្បីដោះស្រាយភាពមិនចុះសម្រុងគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
ក្នុងជំនួបម្សិលមិញ ទាំងប្រមុខការទូតអាមេរិក ចន ឃែររី ទាំងប្រមុខការទូតរុស្ស៊ី ស៊ែរហ្កី ឡាវ្រូវ មិនបានលើកឡើងពីប្រធានបទទាក់ទងនឹងការកាន់អំណាចរបស់លោកអាសាដទេ ដើម្បីចៀសភាពតានតឹងនឹងគ្នា។ តែភាគីទាំង២ក៏នៅតែមិនអាចចុះសម្រុងគ្នា ហើយក៏មិនបានសម្រេចចេញកិច្ចព្រមព្រៀងអ្វីដែរ។
ការមិនចុះសម្រុងគ្នា ដោយសារតែអាមេរិកទាមទារអោយយន្តហោះកងទ័ពលោកអាសាដ ផ្អាកសកម្មភាព ដើម្បីចៀសវាងគ្រោះថ្នាក់ ដល់ក្រុមឧទ្ទាមនិន្នាការកណ្តាល ដែលអាមេរិក បារាំង និងអង់គ្លេសគាំទ្រ។ តែរុស្ស៊ីថា វិធានការនេះ មិនមែនជាទិសដៅនៃកិច្ចព្រមព្រៀងចំពោះស៊ីរីទេ។
ចំណុចមួយទៀត គឺថា កងទ័ពស៊ីរីបានវាយយកក្រុងដារ៉ាយ៉ា ភាគនិរតីក្រុងដាម៉ាស បានមកវិញ ហើយបានព្រមព្រៀងជាមួយក្រុមឧទ្ទាម ជម្លៀសជនស៊ីវិលនិងក្រុមឧទ្ទាមចេញពីក្រុងនេះ។ ក្រុមឧទ្ទាមកំពុងនាំគ្នាចាកចេញពីក្រុងដារ៉ាយ៉។ រុស្ស៊ីយល់ថា កិច្ចព្រមព្រៀងរវាងកងទ័ពនិងក្រុមឧទ្ទាមជាកិច្ចព្រមព្រៀងគំរូ។ តែអាមេរិកវិញយល់ថា កងទ័ពបានបង្ខំអោយក្រុមឧទ្ទាមចុះចាញ់ រំលោភលើបទឈប់បាញ់ ខែកុម្ភៈ។
អាមេរិកនិងរុស្ស៊ីចរចាគ្នាលើវិបត្តិស៊ីរី តាំងពីខែកក្កដា។ ការពិភាក្សាជួបភាពស្មុគស្មាញ ដោយសារតែកងទ័ពលោកអាសាដ បានវាយប្រហារជាថ្មីលើក្រុមប្រឆាំង ហើយនៅខាងត្បូងក្រុងអាឡិបឯណោះវិញ ក្រុមឧទ្ទាមដែលរួមដៃជាមួយក្រុមជីហាត ហ្វាតេ អាល់ ឆាំ បានបើកការវាយលុកខ្លាំងក្លា ទៅលើកងទ័ពវិញ។ ក្រុមជីហាតហ្វាតេ អាល់ ឆាំ ជាអតីតក្រុមអាល់ ណូស្រា ដែលបានផ្តាច់ខ្លួនចេញពីក្រុមអាល់កៃដា។
ប៉ុន្មានថ្ងៃខាងមុខនេះ ក្រុមបច្ចេកទេសរុស្ស៊ី និងអាមេរិក នឹងរកមធ្យោបាយដើម្បីបែងចែកអោយដាច់ស្រឡះ រវាងក្រុមជីហាត និងក្រុមឧទ្ទាមដែលអាមេរិក និងប្រទេសឈូងសមុទ្រពែរស៍គាំទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ