វេទិកាទឹកដីខ្មែរកម្ពុជាក្រោម៖ បរិហាររដ្ឋាភិបាលពីអន្តោប្រវេសន៍វៀតណាមខុសច្បាប់និងប្រកាសថ្ងៃធ្វើបាតុកម្មជាថ្មីនៅដើមខែតុលា
សហគមន៍ខ្មែរកម្ពុជាក្រោម របស់លោក ថាច់ សេដ្ឋា រួមនឹងអង្គការយុវជនមួយចំនួន បានរៀបចំវេទិកាជួបជុំ លើកដំបូង ស្តីពី ទឹកដីខ្មែរកម្ពុជាក្រោម។ វេទិកានោះ បានធ្វើឡើង នៅទីលានប្រជាធិបតេយ្យ ក្នុងទីក្រុងភ្នំពេញ ពេញមួយថ្ងៃសៅរ៍ ទី៦កញ្ញានេះ។ អង្គវេទិកា ចាប់ផ្តើមដោយការបរិហាររដ្ឋាភិបាលពីជនអន្តោប្រវេសន៍វៀតណាមខុសច្បាប់ នៅកម្ពុជា។ ក្នុងនោះ លោក ថាច់ សេដ្ឋា បានប្រកាសពីថ្ងៃធ្វើបាតុកម្មជាថ្មី នៅដើមខែតុលា។ អង្គវេទិកា នៅពេលរសៀល លើកឡើងពីប្រវត្តិទឹកដីខ្មែរកម្ពុជាក្រោម ដែលបានបាត់បង់ទៅប្រទេសវៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
វេទិកាសំដែងមតិ នៅថ្ងៃសៅរ៍ ទី៦កញ្ញានេះ ធ្វើឡើងក្រោមប្រធានបទ “ប្រវត្តិទឹកដីខ្មែរកម្ពុជាក្រោម និងការអនុវត្តច្បាប់អន្តោប្រវេសន៍នៅកម្ពុជា។ វេទិកានៅទីលានប្រជាធិបតេយ្យ បានបើកឱកាសឲ្យអ្នកចូលរួម ភាគច្រើនជាយុវជន ឡើងបញ្ចេញមតិ និងសួរសំណួរទៅកាន់វាគ្មិនអ្នកចូលរួម គឺលោកមេធាវី សុក សំអឿន លោក ថាច់ សេដ្ឋា និងលោក សឺន ស៊ូប៊ែរ។
អ្នកចូលរួមវេទិកាសំដែងមតិ បានវាយប្រហារលើរដ្ឋាភិបាលអំពីជនអន្តោប្រវេសន៍វៀតណាមខុសច្បាប់ រស់នៅកម្ពុជា។ ក្រុមជនជាតិវៀតណាម ដែលរស់នៅខុសច្បាប់ មិនត្រូវបានរដ្ឋាភិបាល តាមរយៈក្រសួងមហាផ្ទៃ អនុវត្តច្បាប់សញ្ជាតិ និងច្បាប់អន្តោប្រវេសន៍ ឲ្យបានត្រឹមត្រូវទេ។ ផ្ទុយទៅវិញ ជនជាតិវៀតណាមភាគច្រើន នៅកម្ពុជា ទទួលបានកាតជនជាតិខ្មែរ ឬអត្តសញ្ញាណប័ណ្ណ សញ្ជាតិខ្មែរ ដោយការសូកប៉ាន់ប៉ូលិសក្រសួងមហាផ្ទៃ។
ប៉ុន្តែតាមលោកមេធាវី សុក សំអឿន ជនជាតិវៀតណាម កាន់កាត អត្តសញ្ញាណប័ណ្ណ មិនទាន់ទទួលបានសញ្ជាតិខ្មែរនៅឡើយទេ បើសិនជាមិនមានព្រះរាជក្រឹត្យ ចេញដោយព្រះមហាក្សត្រ។ ផ្ទុយទៅវិញ ជនជាតិវៀតណាមនោះ ត្រូវមានទោសជាប់ពន្ធនាគារថែមទៀត ពីបទក្លែងឯកសាធារណៈ។
ក្នុងវេទិកា លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម ក៏បានកាន់ក្បាលមេក្រូ ប្រកាសពីថ្ងៃធ្វើបាតុកម្មជាថ្មីរយៈពេល ៥ ថ្ងៃ ចាប់ពីថ្ងៃទី១ ដល់ថ្ងៃទី៥ ខែតុលា។ ជាបាតុកម្ម ដើម្បីទាមទារអោយអ្នកនាំពាក្យស្ថានទូតវៀតណាម លោក ត្រឹង វ៉ាន់ថុង សុំទោស ចំពោះការលើកឡើងពីប្រវត្តិទឹកដីខ្មែរកម្ពុជាក្រោម។
លោកថាច់សេដ្ឋា បានគូសបញ្ជាក់ថា ចាប់ពីថ្ងៃនេះតទៅ បើសិនជាវៀតណាមបន្តសង្ងំស្ងៀម នោះបាតុកម្មនៅដើមខែតុលា នឹងដាក់ញត្តិទៅកាន់នាយករដ្ឋមន្ត្រី ឲ្យកាត់ផ្តាច់ទំនាក់ទំនងការទូតជាមួយប្រទេសវៀតណាម ជាបណ្តោះអាសន្ន។ មួយវិញទៀត ក៏នឹងមានការអំពាវនាវឲ្យពលរដ្ឋ ឈប់ប្រើប្រាស់ទំនិញវៀតណាមថែមទៀត។
វេទិកាសំដែងមតិ នៅទីលានប្រជាធិបតេយ្យ នៅពេលរសៀលថ្ងៃសៅរ៍នេះ បានលើកឡើងពីប្រវត្តិទឹកដីខ្មែរកម្ពុជាក្រោម ដែលបានបាត់បង់ ទៅប្រទេសវៀតណាម។ តាមសហគមន៍ខ្មែរកម្ពុជាក្រោម ទឹកដីខ្មែរកម្ពុជាក្រោម ត្រូវបានអាណានិគមបារាំង កាត់ចេញពីកម្ពុជា ប្រគល់ឲ្យវៀតណាមគ្រប់គ្រង នៅថ្ងៃទី៤ ខែមិថុនា ឆ្នាំ១៩៤៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ