ក្រសួងការបរទេសកម្ពុជាធ្វើកំណត់ទូតតវ៉ា ប្រឆាំងនឹងការបាញ់សម្លាប់ពលរដ្ឋខ្មែរ
ក្រសួងការបរទេសកម្ពុជា នៅថ្ងៃទី២៤តុលាម្សិលម៉ិញបានធ្វើកំណត់ទូតមួយ ផ្ញើទៅកាន់ស្ថានទូតថៃប្រចាំនៅទីក្រុងភ្នំពេញ ដើម្បីតវ៉ាប្រឆាំងទៅនឹងយោធាថៃ ដែលបានបាញ់សម្លាប់ពលរដ្ឋខ្មែរម្នាក់ អោយស្លាប់ នៅក្នុងទឹកដីថៃកាលពី២ថ្ងៃមុន។ កំណត់ទូតរបស់ក្រសួងការបរទេសកម្ពុជា បានហៅអំពើបាញ់ប្រហារនោះថា ឃោឃៅ និងមិនអាចទទួលយកបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
កំណត់ទូតរបស់ក្រសួងការបរទេសកម្ពុជា ត្រូវបានផ្ញើទៅកាន់ស្ថានទូតថៃប្រចាំនៅទីក្រុងភ្នំពេញកាលពីល្ងាចថ្ងៃទី២៤តុលា ដោយបានរៀបរាប់ថា កាលពីថ្ងៃទី២៣តុលាកន្លងទៅ យុវជនកម្ពុជាម្នាក់ឈ្មោះ សឿន វន អាយុ២១ឆ្នាំ មានស្រុកកំណើតមកពីខេត្តកំពង់ចាម ត្រូវបានយោធាថៃបាញ់សម្លាប់យ៉ាងសាហាវព្រៃផ្សៃ។ ការបាញ់សម្លាប់ ដោយគ្រាន់តែសង្ស័យថា យុវជនរូបនេះ បានលួចម៉ូតូមួយគ្រឿង ស្ថិតនៅភូមិដាន់ ឃុំដាន់ ស្រុកកាប់ជើង ខេត្តសូរិន្ទ ប្រទេសថៃ ឈមនឹងស្រុក អូរស្មាច់ ក្រុងសំរោង ខេត្តឧត្តរមានជ័យ។
លោក កុយ គួង អ្នកនាំពាក្យក្រសួងការបរទេសកម្ពុជា បានប្រាប់វិទ្យុបារាំងអន្តរជាតិ RFI ថា រាជរដ្ឋាភិបាលកម្ពុជា បានតវ៉ាប្រឆាំងយ៉ាងដាច់អហង្ការ ទៅនឹងអំពើដ៏សាហាវព្រៃផ្សៃនេះ ហើយនេះគឺជាការរំលោភបំពានដល់គោលការណ៍មនុស្សធម៌ជាមូលដ្ឋាន និងរំលោភបំពានទៅនឹងស្មារតីនៃភាពជាអ្នកជិតខាងល្អ ក៏ដូចជាមិត្តភាពរវាងប្រទេសទាំងពីរផងដែរ។ កំណត់ទូតរបស់ក្រសួងការបរទេសកម្ពុជា ក៍បានទទួចជាថ្មីម្តងទៀត អោយអាជ្ញាធរថៃគោរពសិទ្ធិមនុស្ស ដោយប្រើប្រាស់យន្តការផ្លូវច្បាប់ ជៀសជាងការប្រើប្រាស់អាវុធ បាញ់ប្រហាមកលើពលរដ្ឋខ្មែរតទៅទៀត។
នៅមិនទាន់មានការឆ្លើយតបរឺពន្យល់ពីមន្ត្រីស្ថានទូតថៃប្រចាំនៅទីក្រុងភ្នំពេញ ទៅនឹងកំណត់ទូតរបស់ក្រសួងការបរទេសកម្ពុជានេះនៅឡើយទេ។ នេះបើតាមការបញ្ជាក់ពីលោក កុយ គួង។
ដោយឡែក លោក នី ចរិយា ប្រធានផ្នែកសិទ្ធិមនុស្សនិងជំនួយផ្នែកច្បាប់នៃសមាគមសិទ្ធិមនុស្សអាដហុក បាននិយាយថា រដ្ឋាភិបាលកម្ពុជាគួរតែជ្រើសរើសវិធីផ្សេង ក្រៅពីការធ្វើកំណត់ទូតនេះ ព្រោះថា នេះមិនមែនជាលើកទី១នោះទេ ដែលកម្ពុជាបានធ្វើកំណត់ទូតទៅកាន់រដ្ឋាភិបាលថៃ តាមរយៈស្ថានទូតថៃប្រចាំនៅទីក្រុងភ្នំពេញ ក្នុងករណីដែលយោធាថៃបាញ់សម្លាប់ពលរដ្ឋខ្មែរនេះ។ បើតាម លោក នី ចរិយា ក្នុងរយៈពេល៤ខែដើមឆ្នាំ២០១៤ មានពលរដ្ឋខ្មែរចំនួន២២នាក់ ត្រូវបានយោធាថៃបាញ់សម្លាប់ ដោយមិនទាន់រាប់បញ្ចូលករណីថ្មីៗនេះនៅឡើយទេ។
គួរកត់សំគាល់ថា កំណត់ទូតនេះ បានធ្វើឡើង ខណៈដែលនាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayuth CHAN-O-CHA) គ្រោងនឹងមកបំពេញទស្សនកិច្ចជាផ្លូវការ រយៈពេលពីរថ្ងៃ នៅកម្ពុជាចាប់ពីថ្ងៃទី៣០ដល់ថ្ងៃទី៣១ខែតុលាឆ្នាំ២០១៤ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ