លោក គីម ជុងអ៊ុនបំពេញទស្សនកិច្ចនៅសារៈមន្ទីរនៃអំពើសាហាវយង់ឃ្នងរបស់ទាហានអាមេរិក
ប្រមុខដឹកនាំកូរ៉េខាងជើងលោក គីម ជុងអ៊ុន បានអញ្ជើញទៅទស្សនាសារៈមន្ទីរមួយនៅខេត្តស៊ីជាន់ ដែលមានរក្សាទុកនូវរាល់ភស្តុតាងនិងសាក្សីបញ្ជាក់ពី អំពើយង់ឃ្នងរបស់ទាហានអាមេរិក ទៅលើប្រជាជនស៊ីវិលកូរ៉េខាងជើង នាជំនាន់សង្គ្រាមនៅឧបទ្វីបកូរ៉េពីឆ្នាំ១៩៥០-១៩៥៣។ នេះបើតាមភ្នាក់ងារព័ត៌មានផ្លូវការកូរ៉េខាងជើង KCNA ចុះផ្សាយថ្ងៃអង្គារ២៥វិច្ឆិកា២០១៤។ដំណើរទស្សកិច្ចនៅសារៈមន្ទីរនេះ ត្រូវបានប្រព្រឹត្តទៅនៅខណៈពេលដែលអ.ស.ប. ទើបចេញសេចក្តីអនុម័តចោទរបបព្យុងយ៉ាង ពីបទ “រំលោភសិទ្ធមនុស្សនៅកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០១:៤៦
បើតាមទីភ្នាក់ងារព័ត៌មានផ្លូវការកូរ៉េខាងជើង KCNA ទស្សនកិច្ចរបស់ប្រមុខដឹកនាំកូរ៉េខាងជើងនៅសារៈមន្ទីរនេះ គឺដើម្បីលើកទឹកចិត្តប្រជាជនកូរ៉េ ខាងជើងទូទាំងប្រទេសឲ្យស្អប់ខ្ពើមប្រឆាំងនឹងអាមេរិក។
សារៈមន្ទីរនៅស៊ីជាន់នេះ មានរំលឹកអំពីសកម្មភាពយង់ឃ្នងរបស់ទាហានអាមេរិកជំនាន់សង្គ្រាមឧបទ្វីបកូរ៉េ មានជាអាទិ៍ ការធ្វើឃាដកម្មដ៏ព្រៃផ្សៃទៅលើប្រជាជនស៊ីវីលកូរ៉េចំនួន ៣ម៉ឺន៥០០០នាក់ ដែលទំនងត្រូវបានកងទ័ពអាមេរិកសម្លាប់នៅស៊ីជាន់នាចុងឆ្នាំ១៩៥០ ពេលសង្គ្រាមចាប់ផ្តើមភ្លាម។ នៅឱកាសនោះលោកគឹម ជុងអ៊ុន បានប្រើពាក្យយ៉ាងធ្ងន់ៗចោទ ថាក្រុមទាហានអាមេរិក សុទ្ធតែជាពួកឈ្លានពាននឹងសែ្រកឃ្លានអំពើកាប់សម្លាប់ជីវិតមនុស្សឥតត្រាប្រណី។
ដំណើរទស្សនកិច្ចរបស់លោកគីម ជុងអ៊ុននៅសារៈមន្ទីរនៅខេត្តស៊ីជាន់ ត្រូវបានប្រព្រឹត្តទៅមួយសប្តាហ៍បន្ទាប់ពីអសប បានអនុម័តសេចក្តីសម្រេចចិត្តមួយ ដែលស្នើសុំឲ្យក្រុមប្រឹក្សាសន្តិសុខ ប្តឹងទៅតុលាការព្រហ្មទណ្ឌអន្តរជាតិ CPI ប្រឆាំងនឹងអំពើឧក្រឹដ្ឋកម្មប្រឆាំងមនុស្សជាតិរបស់អ្នកដឹកនាំធំៗកូរ៉េខាងជើង។
ប៉ុន្តែ ប្រទេសចិននិងរុស្ស៊ី ដែលជាសម្ព័ន្ធមិត្តរបស់កូរ៉េខាងជើង និងជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ ច្បាស់ជាទប់ស្តាត់មិនឲ្យមានការប្តឹងប្តល់ទៅដល់តុលាការព្រហ្មទណ្ឌអន្តរជាតិនៅលើសំណុំរឿងខាងលើនេះទេ។
កូរ៉េខាងជើងបានបញ្ចេញប្រតិកម្មវិញ ដោយព្រមានដល់ក្រុមអ្នកការពារសេចក្តីសម្រេចចិត្តរបស់អសប ថាកូរ៉េខាងជើងលែងមានហេតុផលអ្វីក្នុងការព្យួរការសាកល្បងនុយក្លេអ៊ែររបស់ខ្លួនទៀតហើយនិងក៏មិនខ្វល់ពីផលវិបាកមហន្តរាយនានានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ