ព្រះមហាក្សត្រអំពាវនាវឲ្យអ្នកតំណាងរាស្ត្រជាប់ឆ្នោតចូលប្រជុំសភា
នៅក្នុងកិច្ចប្រជុំកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ នៅព្រឹកថ្ងៃសៅរ៍នេះ ព្រះមហាក្សត្រសម្តេចព្រះបរមនាថ នរោត្តម សីហមុនី បានអំពាវនាវឲ្យតំណាងរាស្ត្រជាប់ឆ្នោតទាំងអស់ចូលប្រជុំសភាដំបូង នៅថ្ងៃទី២៣កញ្ញា តាមការកោះអញ្ជើញរបស់ព្រះអង្គ។ ជំនួបកំពូលដ៏ខ្លីនេះក៏ត្រូវបានគណបក្សទាំងពីរចាត់ទុក ជាជំហានជាវិជ្ជមានមួយដែរ ប៉ុន្តែ គ្មានកិច្ចព្រមព្រៀងណាមួយត្រូវបានសម្រេចទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
នៅចំពោះមុខមេដឹកនាំកំពូលគណបក្សជាប់ឆ្នោតទាំងពីរ ព្រះមហាក្សត្រ សម្តេចព្រះបរមនាថ នរោត្តម សីហមុនី បានអំពាវនាវយ៉ាងទទូចឲ្យតំណាងរាស្ត្រជាប់ឆ្នោតនៃគណបក្សទាំងពីរចូលរួមប្រជុំសភាដំបូង ក្រោយការបោះឆ្នោត។ ទន្ទឹមនឹងការអំពាវនាវនោះ ព្រះអង្គក៏បានចែកលិខិតកោះអញ្ជើញអ្នកតំណាងរាស្ត្រទាំង ១២៣ រូប ក្នុងនោះមានតំណាងរាស្ត្រគណបក្សប្រជាជនកម្ពុជា ៦៨ រូប និងតំណាងរាស្ត្រគណបក្សសង្គ្រោះជាតិចំនួន ៥៥ រូប ។
លិខិតកោះប្រជុំត្រូវបានប្រគល់ជូនគណបក្សទាំងពីររួចហើយ នៅក្នុងជំនួបនោះតែម្តង។
សម្តេចព្រះបរមនាថ នរោត្តម សីហមុនី បានមានព្រះរាជបន្ទូលបញ្ជាក់ថា យោងតាមមាត្រា៨២ថ្មី នៃរដ្ឋធម្មនុញ្ញ ព្រះអង្គនឹងកោះប្រជុំសភាដំបូង នៅថ្ងៃទី ២៣ កញ្ញា។ នៅក្នុងព្រះរាជសុន្ទរកថា ថ្លែងទៅកាន់មេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ ព្រះមហាក្សត្របានសាទរគណបក្សទាំងពីរ ដែលត្រូវបានប្រជាពលរដ្ឋបោះឆ្នោតជូនប្រកបដោយ«ជោគជ័យត្រចះត្រចង់»កាលពីថ្ងៃទី ២៨ កក្កដា។
ព្រះអង្គក៏បានជំរុញឲ្យគណបក្សទាំងពីរសហការគ្នាដោះស្រាយបញ្ហា ដោយស្មារតីយោគយល់ដើម្បីថែរក្សាសន្តិភាព និងស្ថិរភាពប្រទេសដែលជាមូលដ្ឋានគ្រឹះនៃភាពរុងរឿងនិងថ្លៃថ្នូររបស់ជាតិ។
សូមបញ្ជាក់ថា ជំនួបកំពូលរវាងគណបក្សប្រជាជនកម្ពុជានិងគណបក្សសង្គ្រោះជាតិ នៅព្រឹកថ្ងៃសៅរ៍ទី ១៤ កញ្ញានេះបានធ្វើឡើងនៅក្នុងព្រះបរមរាជវាំង ក្រោមព្រះរាជាធិបតីភាពរបស់ព្រះមហាក្សត្រ សម្តេចព្រះបរមនាថ នរោត្តម សីហមុនី។ ភាគីគណបក្សប្រជាជនកម្ពុជាមានសមាសភាពបីរូប គឺ លោកនាយករដ្ឋមន្ត្រី ហ៊ុន សែន លោកឧបនាយករដ្ឋមន្ត្រី ស ខេង និងលោក សាយ ឈុំ មន្ត្រីជាន់ខ្ពស់គណបក្សកាន់អំណាច។
ចំណែកឯភាគីគណបក្សសង្គ្រោះជាតិវិញមាន លោក សម រង្ស៊ី និងលោកកឹម សុខា ប្រធាននិងអនុប្រធានគណបក្ស រួមទាំងលោក គួយ ប៊ុនរឿន មន្ត្រីជាន់ខ្ពស់បក្សប្រឆាំង។
កិច្ចប្រជុំបានប្រព្រឹត្តទៅមិនដល់កន្លះម៉ោងផង ក៏បានបិទបញ្ចប់ទៅវិញ។
យោងតាមព្រះរាជសំណើរបស់ព្រះមហាក្សត្រ គណបក្សទាំងពីរគ្រោងជួបគ្នាជាថ្មី នៅថ្ងៃចន្ទដើមសប្តាហ៍ក្រោយនេះ នៅឯមន្ទីររដ្ឋសភា។ លោក សម រង្ស៊ី បានហៅជំនួបកំពូលនេះ ថាជាជំហានថ្មីមួយក្នុងការបើកឆាកតែប៉ុណ្ណោះ។ ប៉ុន្តែ លោក ស ខេង មន្ត្រីជាន់ខ្ពស់គណបក្សប្រជាជនកម្ពុជាវិញ បានហៅជំនួបនេះថាជាជោគជ័យដ៏ធំធេងមួយ ដែលឈានទៅបញ្ចប់ជម្លោះនយោបាយ។
យ៉ាងណាក៏ដោយ មហាបាតុកម្មរបស់គណបក្សសង្គ្រោះជាតិនៅតែបន្តធ្វើ រីឯការចូលប្រជុំសភាដំបូងតាមការកោះអញ្ជើញរបស់ព្រះមហាក្សត្រ ក៏គណបក្សប្រឆាំងបានបដិសេធដោយប្រយោលរួចទៅហើយ។ ឆ្លើយនឹងសំណួរនេះ លោក កឹម សុខា បញ្ជាក់ថា គណបក្សរបស់លោកបានបញ្ជាក់ប្រាប់ព្រះមហាក្សត្ររួចហើយ ថាភាពមិនប្រក្រតីនៃការបោះឆ្នោតមិនអាចទទួលយកបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ