NGO Forum៖ ផែនការប្រែក្លាយប្រទេសពីចំណូលមធ្យមទៅកម្រិតខ្ពស់នៅឆ្នាំ២០៣០អាចជួបហានីភ័យ
វេទិកានៃអង្គការមិនមែនរដ្ឋាភិបាល ស្តីពីកម្ពុជាហៅថា NGOForum បានចេញផ្សាយរបាយការណ៍ជាង១០ទំព័រ នៅថ្ងៃទី៤ មីនា ម្សិលមិញ ទាក់ទងការប្រើប្រាស់ថវិកាជាតិ ដោះស្រាយការប្រែប្រួលអាកាសធាតុនៅកម្ពុជា។ មួយផ្នែកនៃរបាយការណ៍នោះ NGOForum ព្រមានថា បើការប្រែប្រួលអាកាសធាតុនាពេលបច្ចុប្បន្ននេះ ពុំបានដោះស្រាយឲ្យទាន់ពេល គឺផែនការរដ្ឋាភិបាល ក្នុងការប្រែក្លាយប្រទេសពីចំណូលមធ្យមទៅកម្រិតខ្ពស់នៅឆ្នាំ ២០៣០ អាចជួបហានីភ័យ។
ចុះផ្សាយនៅថ្ងៃ៖
ស្តាប់ - ០១:៣៦
ការព្រមានអំពីហានីភ័យនៃការប្រែប្រួលអាកាសធាតុ ដែលប៉ះពាល់ដល់ផែនការរដ្ឋាភិបាល ក្នុងការប្រែក្លាយប្រទេសដែលមានប្រាក់ចំណូលមធ្យមទៅកម្រិតខ្ពស់នៅឆ្នាំ២០៣០ ដោយសារកត្តាទឹកជំនន់ គ្រោះរាំងស្ងួត ខ្យល់ព្យុះ ភ្លៀងធ្លាក់មិនទៀងទាត់ជាដើម។ ទាំងនេះធ្វើឲ្យប៉ះពាលដល់ចំណូលរបស់ពលរដ្ឋ។ នេះបើតាមលោក ហុក ម៉េងហាន់ ប្រធានកម្មវិធីបរិស្ថាននិងកសិកម្មនៃ NGOForum។
ដើម្បីបញ្ចៀសហានីភ័យ គឺរដ្ឋត្រូវផ្ដល់គ្រាប់ពូជដែលមានលក្ខណៈធន់នឹងភាពរាំងស្ងួតដល់កសិករ ជួយប្រជាជនក្នុងការសង់លំនៅដ្ឋាននិងស្ដារស្ថានភាពគ្រួសារឡើងវិញបន្ទាប់ពីគ្រោះមហន្តរាយអាកាសធាតុ ពង្រឹកការព្យាករណ៍អាកាសធាតុ ព្រមទាំងផ្ដល់ព័ត៌មានស្ដីពីអាកាសធាតុឲ្យបានលឿនជាមុន។ បន្ថែមលើនេះ NGOForum បានផ្តល់ជាអនុសាសន៍ដល់រដ្ឋាភិបាលកម្ពុជា ក្នុងការបង្កើនចំណាយក្នុងតំបន់គោលដៅសំខាន់ៗសម្រាប់អត្ថប្រយោជន៍ដល់ការប្រែប្រួលអាកាសធាតុ ដោយមានតម្លាភាពលើការបែងចែកថវិកា និងការចំណាយ ព្រមទាំងបង្ហាញថវិកាអាកាសធាតុសម្រាប់ប្រជាពលរដ្ឋទូទៅអាចចូលមើលបាន។
វេទិកានៃអង្គការមិនមែនរដ្ឋាភិបាល ស្តីពីកម្ពុជាហៅ NGOForum បានឲ្យដឹងទៀតថា ក្នុងចន្លោះឆ្នាំ ២០០០ ដល់ ២០១៧ ផ្ទះប្រជាពលរដ្ឋប្រមាណ១លានខ្នងផ្ទះ បានប៉ះពាល់មកពីអាកាសធាតុធ្ងន់ធ្ងរ។ បន្ថែមលើនេះក្នុងឆ្នាំ២០១៧ ថវិកាសរុប២២៥លានដុល្លារ រកឃើញថា ៧០ភាគរយ ការចំណាយមិនបានឆ្លើយតបនឹងការប្រែប្រួលអាកាសធាតុ ខណៈ៣០ភាគរយ ការចំណាយមានប្រយោជន៍ក្នុងការដោះស្រាយការប្រែប្រួលអាកាសធាតុ។
លោក តឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាល ស្តីពីកម្ពុជា អះអាងថា របាយការណ៍របស់ខ្លួន នឹងចូលរួមចំណែកបន្ថែមដល់រដ្ឋាភិបាល និងសភា ធ្វើការអភិវឌ្ឍប្រទេស ដែលធន់នឹងការប្រែប្រួលអាកាសធាតុ និងដោះស្រាយបញ្ហាសំខាន់ៗមួយចំនួនទៀត ដូចជាសុខភាព ប្រាក់ចំណូល សន្តិសុខសង្គម និងជីវភាពរស់នៅរបស់ប្រជាជន។ ប្រជាជនដែលភាគច្រើនជាស្ត្រីពួកគេ ជាក្រុមងាយគ្រោះដោយសារការប្រែប្រួលអាកាសធាតុតាមរយៈបាត់បង់ប្រាក់ចំណូល បន្ទុកការងារ និងបញ្ហាសុខភាព ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ