ទូតអាមេរិកសម្តែងការមិនពេញចិត្តពេលតុលាការខ្មែរព្យាយាមភ្ជាប់អាមេរិកក្នុងសំណុំរឿងលោកកឹម សុខា
ថ្ងៃព្រហស្បតិ៍នេះ គឺជាថ្ងៃទីពីរក្នុងសប្តាហ៍នេះនៃសវនាការលើសំណុំរឿងលោកកឹម សុខា ប្រធានអតីតគណបក្សសង្រ្គោះជាតិ។ អ្វីជាកត់សម្គាល់ គឺនៅព្រឹកនេះ ឯកអគ្គរដ្ឋទូតអាមេរិក លោក W. Patrick Murphy បានទៅចូលរួមសង្កេតការដោយផ្ទាល់នៅសាលាដំបូងរាជធានីភ្នំពេញ។ លោក W. Patrick Murphy បានអះអាងថា អាមេរិកចង់ឃើញលោកកឹម សុខា មានធ្វើសិទ្ធិធ្វើនយោបាយឡើងវិញ តែក៏បានសម្តែងការមិនពេញចិត្តចំពោះតុលាការកម្ពុជាដែលព្យាយាមទាញអាមេរិកទៅភ្ជាប់នឹងសំណុំរឿងលោកកឹម សុខា។
ចុះផ្សាយនៅថ្ងៃ៖
ស្តាប់ - ០២:២៤
ថ្លែងទៅកាន់ក្រុមអ្នកកាសែតនៅពីមុខតុលាការក្រុងភ្នំពេញនៅព្រឹកថ្ងៃព្រហស្បិ៍នេះ លោក W. Patrick Murphy បានលើកឡើងថា អាមេរិកមានការរំខានចិត្តដោយខាងព្រះរាជអាជ្ញាអមតុលាការក្រុងភ្នំពេញបានលើកឡើងនូវរឿងមិនពិតដែលត្រូវបានប្រឌិតឡើងទាក់ទងនឹងសហរដ្ឋអាមេរិក។ សហរដ្ឋអាមេរិកដែលត្រូវបានតំណាងអយ្យការទាញភ្ជាប់ទៅនឹងលោកកឹម សុខា នៅក្នុងសវនាការសំណុំរឿងក្បត់ជាតិដែលមានបរទេសនៅពីក្រោយ។ នៅក្នុងសវនាការកន្លងមក លោកកឹម សុខា ត្រូវបានតំណាងអយ្យការ និងមេធាវីតំណាងរដ្ឋាភិបាលជជីកសួរពីកាជាប់ពាក់ព័ន្ធរបស់បរទេស និងភ្ញាក់ងារបរទេសក្នុងការរៀបចំផ្តួលរដ្ឋាភិបាលកម្ពុជា។
ប៉ុន្តែ លោកកឹម សុខា បានច្រានចោលការចោទប្រកាន់នេះ ដោយអះអាងថា លោកមិនបាននាំរដ្ឋបរទេសឬភ្នាក់ងារបរទេសណាមកប្រទូសរ៉ាយ ឬឈ្លានពាន កម្ពុជាឡើយ។ លោកថា សកម្មភាពទាំងអស់របស់លោក គឺផ្តោតលើសិទ្ធិមនុស្ស និងលទ្ធិប្រជាធិបតេយ្យ ដោយអហិង្សា និងសន្តិវិធីស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។ លោកសង្កត់ធ្ងន់ថា លោកមិនបានប្រព្រឹត្តនូវអំពើទាំងឡាយណាដែលនាំឲ្យប៉ះពាល់ដល់ផលប្រយោជន៍ប្រទេសជាតិឡើយ។
ជុំវិញបញ្ហានេះ លោក W. Patrick Murphy ក៏បានគូសបញ្ជាក់ឱ្យដឹងផងដែរពីការផ្តល់ជំនួយរបស់អាមេរិកប្រមាណ៣ពាន់លានដុល្លាដល់ប្រទេសកម្ពុជានាពេលកន្លងមក ដោយដោយរួមទាំងជំនួយប្រកបដោយតម្លាភាពដើម្បីពង្រឹងស្ថាប័ន និងគណបក្សនយោបាយស្របតាមរដ្ឋធម្មនុញ្ញរបស់ប្រទេសកម្ពុជា។ លោកអះអាងបន្ថែមថា ជំនួយរបស់អាមេរិក គឺសម្រាប់ស្ថាប័នផ្សេងៗរបស់រដ្ឋាភិបាល និង សម្រាប់គណបក្សនយោបាយទាំងអស់ដោយរួមទាំងគណបក្សប្រជាជនកម្ពុជា។ ជាមួយនឹងការគូសបញ្ហាក់យ៉ាងនេះ លោក W. Patrick Murphy ក៏បានបញ្ជាក់ជំហររបស់អាមេរិកថា អាមេរិកមិនដែលចង់ជ្រៀតជ្រែកក្នុងអភិបាលកិច្ចរបស់ប្រទេសកម្ពុជាទេ ពោល គឺអាមេរិកគោរពពេញលេញចំពោះឯករាជ្យភាព និងអធិបតេយ្យភាពរបស់ប្រទេសកម្ពុជា។
ក៏ប៉ុន្តែ លោកទូតអាមេរិកក៏បានអះអាងថា សហរដ្ឋអាមេរិកនឹងបតាមដានសវនាការកាត់ក្តីលោក កឹម សុខាយ៉ាងដិតដល់ ហើយថា ដំណើរការសវនាការនេះ អាចមានបច្ច័យទៅលើនិតិរដ្ឋ និងដំណើរការត្រឹមត្រូវតាមផ្លូវច្បាប់នៅកម្ពុជា និងសម្រាប់ទំនាក់ទំនងអន្តរជាតិ របស់ប្រទេសកម្ពុជា។ លោកឯកអគ្គរដ្ឋទូតអាមេរិក ក៏បានគូសបញ្ជាក់ផងដែរថា អាមេរិករីករាយនឹងឃើញថា សិទ្ធិនយោបាយរបស់លោកកឹម សុខា ត្រូវបានប្រគល់ឲ្យលោកវិញ ហើយសង្ឃឹមថា ប្រជាជនកម្ពុជាទាំងអស់អាចចូលរួមក្នុងដំណើរការនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ