កូវីដ១៩៖ ក្រសួងសេដ្ឋកិច្ចត្រៀមថវិកា៦០លានដុល្លារ អនុវត្តផែនការមេប្រយុទ្ធប្រឆាំងនឹងជំងឺនេះ
ក្រសួងសេដ្ឋកិច្ចកម្ពុជាគ្រោងចំណាយថវិកាប្រមាណ៦០លានដុល្លារអាមេរិក សម្រាប់ប្រយុទ្ធប្រឆាំងទៅនឹងជំងឺកូវីដ១៩ ក្នុងរយៈពេល១ឆ្នាំ។ នេះបើតាមការលើកឡើងរបស់មន្ត្រីជាន់ខ្ពស់ក្រសួងសេដ្ឋកិច្ច កាលពីថ្ងៃទី១១ ខែមីនា ក្នុងកិច្ចប្រជុំជាមួយដៃគូពាក់ព័ន្ធអំពីផែនការមេប្រយុទ្ធប្រឆាំងជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:៣០
ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១១ ខែមីនា ឆ្នាំ២០២០នេះ បានរៀបចំកិច្ចប្រជុំពិភាក្សា ជាមួយដៃគូពាក់ព័ន្ធអំពីផែនការមេប្រយុទ្ធប្រឆាំងជំងឺរលាកផ្លូវដង្ហើមធ្ងន់ធ្ងរ (COVID-19) ដែលបានរៀបចំដោយក្រសួងសុខាភិបាល សហការជាមួយអង្គការសុខភាពពិភពលោក (WHO) និងដើម្បីធ្វើការវាយតម្លៃលើភាពគ្រប់ជ្រុងជ្រោយ និងតម្រូវការហិរញ្ញប្បទាននៃផែនការនេះ។
លោកវង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានអះអាងថា ផែនការមេនេះ ត្រូវបានគ្រោងឡើងសម្រាប់អនុវត្តរយៈពេល ០១ ឆ្នាំ ក្នុងសេណារីយ៉ូចំនួន ០៣ ទៅតាមសភាពការណ៍នៃការផ្ទុះជំងឺ ដោយគ្រោងប្រើប្រាស់ថវិកាសរុបចំនួនប្រមាណ ៦០ លានដុល្លារអាមេរិក។
រដ្ឋលេខាធិការប្រចាំការនៃក្រសួងសេដ្ឋកិច្ចរូបនេះ បន្តថា វិធានការឆ្លើយតបត្រូវមានលក្ខណសមស្របតាមសភាពការណ៍នៃការផ្ទុះជំងឺ តែក៏មិនគួរជ្រុលហួសហេតុពេកនោះដែរ។ ក៏ប៉ុន្តែក៏មិនអាចមើលស្រាលស្ថានការណ៍បានដែរ ក្នុងខណៈដែលផលប៉ះពាល់នៃជំងឺនេះមិនត្រឹមតែប៉ះពាល់ដល់សុខភាពមនុស្សប៉ុណ្ណោះទេ តែថែមទាំងផ្តល់នូវបច្ច័យអវិជ្ជមានមកលើសេដ្ឋកិច្ច និងសង្គមទាំងមូលផងដែរ ជាពិសេសត្រូវត្រៀមខ្លួនឱ្យបានល្អ ក្នុងការទប់ស្កាត់ការឆ្លង និងការប្រយុទ្ធប្រឆាំងការរាតត្បាតជំងឺ COVID-19 ឱ្យបានទាន់ពេលវេលា ធ្វើយ៉ាងណាការពារកុំឱ្យប្រទេសកម្ពុជាកុំធ្លាក់ចូលទៅក្នុងសេណារីយ៉ូអាក្រក់នៃការឆ្លងរីករាលដាលនៃជំងឺនេះ។
សូមជម្រាបជូនថា កាលពីថ្ងៃទី១០ ខែមីនា លោកនាយករដ្ឋមន្រ្តីហ៊ុន សែន បានប្រកាសត្រៀមថវិកាប្រមាណពី៨រយ ដល់ទៅ២ពាន់លានដុល្លារអាមេរិក ដើម្បីសង្រ្គោះសេដ្ឋកិច្ចកម្ពុជា ដែលរងប៉ះពាល់ដោយសារតែការរីករាលដាលនៃកូវីដ១៩ នៅរយៈពេលខាងមុខ។ លោកនាយករដ្ឋមន្ត្រីហ៊ុន សែន ក៏ប្រកាសដែរថារដ្ឋាភិបាលត្រៀមប្រមាណ៣០លានដុល្លារអាមេរិកសម្រាប់វិស័យសុខាភិបាល ក្នុងការទប់ទល់ទៅនឹងការរីករាលដាលនៃមេរោគកូរ៉ូណាវីរុស។
គិតរហូតមកដល់ពេលនេះកម្ពុជារកឃើញករណីឆ្លងជំងឺ COVID-19 ៥ករណី ដែលករណីដំបូង កើតលើជនជាតិចិនអាយុ៦០ឆ្នាំនៅខេត្តព្រះសីហនុ ករណីទីពីរកើតលើបុរសជនជាតិខ្មែរអាយុ៣៨ឆ្នាំនៅខេត្តសៀមរាប ហើយ៣ករណីចុងក្រោយ បានកើតលើស្ត្រីអង់គ្លេសអាយុ៦៥ឆ្នាំ និងប្តី-ប្រពន្ធអង់គ្លេសពីរនាក់ នៅលើនាវា Viking Cruise Journey៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ