ប្រតិកម្មនានាបានធ្លាក់មកបន្តបន្ទាប់ ក្រោយពីទូតអាមេរិកសំដែងការមិនពេញចិត្តចំពោះការភ្ជាប់អាមេរិក ទៅលោក កឹម សុខា
ប្រតិកម្មរបស់គណបក្សមិនមានអាសនៈក្នុងសភា និងស្ថាប័នរដ្ឋមួយចំនួនបានធ្លាក់មកជាបន្តបន្ទាប់ ក្រោយពីឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានសំដែងការមិនពេញចិត្ត ពេលតុលាការខ្មែរព្យាយាមភ្ជាប់អាមេរិកក្នុងសំណុំរឿងលោកកឹម សុខា។ ប្រតិកម្មបែបនេះតែងតែកើតមានឡើងដូចពេលកន្លងមកដែរ ឲ្យតែមានការអត្ថាធិប្បាយណាមួយធ្វើឲ្យប៉ះពាល់ដល់រដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:៤២
ផ្តើមពីអ្នកនាំពាក្យអយ្យការអមសាលាដំបូងរាជធានីភ្នំពេញ តាមរយៈសេចក្តីប្រកាសព័ត៌មានរបស់ខ្លួនបានអះអាងថា ក្នុងដំណើរការនៃការជំនុំជម្រះក្តី លើសំណុំរឿងលោក កឹម សុខា ពីបទសន្ទិដ្ឋិភាព ជាមួយបរទេស គឺព្រះរាជអាជ្ញាពុំបានចោទប្រកាន់ប៉ះពាល់ទៅលើសហរដ្ឋអាមេរិក និងរដ្ឋបរទេស ឬភ្នាក់ងារបរទេសណាមួយនោះឡើយ។ ចំណែកនាំពាក្យក្រសួងយុត្តិធម៌បានដាក់ការសង្ស័យទៅលើអ្នកបកប្រែភាសាជាហេតុធ្វើឲ្យតំណាងទូតអាមេរិក យល់ច្រឡំចំពោះករណីលោក កឹម សុខា។
លើសពីនេះក្រសួងការបរទេសកម្ពុជា ដែលសេចក្តីថ្លែងការណ៍ធ្លាក់មកនៅថ្ងៃទី១៣មីនា បានសំដែងការសោកស្តាយចំពោះការថ្លែងរបស់ឯកអគ្គរដ្ឋទូតអាមេរិកនេះដែរ ហើយចាត់ទុកការលើកឡើងនេះថាធ្វើឲ្យប៉ះពាល់ធ្ងន់ដល់តុលាការកម្ពុជាដែលជាស្ថាប័នឯករាជ្យ។
ប្រតិកម្មភ្លាមៗនេះ គឺក្រោយ ឯកអគ្គរដ្ឋទូតអាមេរិក លោក W. Patrick Murphy បានថ្លែងទៅកាន់អ្នកសារព័ត៌មានពេលចេញពីតាមដានសវនាការ លោក កឹម សុខា នៅថ្ងៃទី១២មីនា។ ឯកអគ្គរដ្ឋទូតអាមេរិក រូបនេះដែលបានទៅចូលរួមសង្កេតការដោយផ្ទាល់នៅសាលាដំបូងរាជធានីភ្នំពេញ បានថ្លែងថា អាមេរិកចង់ឃើញលោកកឹម សុខា មានធ្វើសិទ្ធិធ្វើនយោបាយឡើងវិញ តែក៏បានសម្តែងការមិនពេញចិត្តចំពោះតុលាការកម្ពុជាដែលព្យាយាមទាញអាមេរិកទៅភ្ជាប់នឹងសំណុំរឿងលោកកឹម សុខា នោះដែរ។
តាមពីក្រោយអ្នកនាំពាក្យអយ្យការអមសាលាដំបូងរាជធានីភ្នំពេញ ក៏មានគណបក្សនយោបាយដែលមិនមានអាសនៈនៅក្នុងរដ្ឋសភាយ៉ាងតិចចំនួនពីរដែរបានចេញសេចក្តីថ្លែងការណ៍របស់ខ្លួនប្រតិកម្មនឹងការថ្លែងរបស់ លោក W. Patrick Murphy។
គណបក្សសញ្ជាតិកម្ពុជាដែលអះអាងថាខ្លួនបានចូលរួមតាមដានសវនាការលោក កឹម សុខា ពុំដែលអវត្តមានម្ដងណាឡើយ បានអំពាវនាវកុំឲ្យមានការភ័ន្តច្រឡំ ចំពោះការលើកឡើងរបស់លោក W. Patrick Murphy ដែលគណបក្សនេះចាត់ទុកថា ខុសពីការពិត។ គណបក្សនេះ អះអាងថា រាល់ការលើកឡើងរបស់គ្រប់ភាគីក្នុងសវនកា គឺមិនបានធ្វើឱ្យមានការប៉ះពាល់ដល់សហរដ្ឋអាមេរិក ឬប្រទេសណាមួយឡើយ។
ដូចគ្នានេះដែរ គណបក្សយុវជនកម្ពុជា របស់លោក ពេជ្រ ស្រស់ ក៏អះអាងថា ទិដ្ឋភាពជាក់ស្ដែងអំពីដំណើរការជំនុំជម្រះករណី លោក កឹម សុខា គឺមិនមានភាពប៉ះពាល់ដល់ប្រទេសដទៃឡើយ ប៉ុន្តែអង្គជំនុំជម្រះនិងតំណាងអយ្យការគឺសួរដេញដោលទៅលើលោក កឹម សុខា លើអង្គហេតុដែលលោក កឹម សុខាបានថ្លែងនៅក្នុងវីដេអូឃ្លីបនៅឯប្រទេសអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ