កម្ពុជាកែប្រែលើវិធានការបិទផ្លូវទឹក ដើម្បីទប់ស្កាត់ការឆ្លងនៃជំងឺកូវីដ១៩
ក្រសួងសាធារណការនិងដឹកជញ្ជូន នៅថ្ងៃទី ១៣ មីនានេះ បានធ្វើសេចក្តីកែប្រែភ្លាមៗ លើវិធានការបិទផ្លូវទឹករបស់ខ្លួន ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩។ ដើមឡើយ ក្រសួងនេះ បានសម្រេចបិទការដឹកជញ្ជូនផ្លូវទឹកទាំងអស់។ ប៉ុន្តែភ្លាមៗនេះ ក្រសួងបានធ្វើការកែប្រែថា បំរាមនេះ គឺអនុវត្តចំពោះតែច្រកអន្តរជាតិក្អមសំណរ ក្នុងស្រុកកោះធំ ខេត្តកណ្តាល តែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៥៩
ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ កម្ពុជាបានសម្រេចផ្អាកជាបណ្តោះអាសន្ន នូវការចូលនៃនាវាដឹកអ្នកដំណើរនិងនាវាទេសចរណ៍តាមច្រកអន្តរជាតិក្អមសំណ ក្នុងស្រុកកោះធំ ខេត្តកណ្តាល។ ការសម្រេចនេះ ត្រូវបានគេមើលឃើញថា គឺបន្ទាប់ពីមាននាវា Viking Cruise Journey មួយគ្រឿង ផ្ទុកអ្នកដំណើរនិងបុគ្គលិកសរុប៦៤នាក់ បានចូលចតនៅក្នុងខេត្ដកំពង់ចាម និងបានរកឃើញថា មានបុរសនិងស្ត្រីជនជាតិអង់គ្លេសចំនួន៣នាក់ មានផ្ទុកជំងឺកូវីដ១៩។ នាវា Viking Cruise Journey នេះ បានធ្វើដំណើរមកពីទីក្រុងហូជីមិញប្រទេសវៀតណាមមកកម្ពុជា កាលពីថ្ងៃទី ០៧ មីនា។
គួរជំរាបជូនថា វិធានការបិទផ្លូវទឹកមួយផ្នែករបស់កម្ពុជានេះ គឺជាវិធានការបិទអ្នកដំណើរទីមួយ ដើម្បីទប់ស្កាត់ការឆ្លងរីករាលដាលនៃការជំងឺកូវីដ១៩ ខណៈដែលប្រទេសនេះ នៅតែបន្តបើកចំហរជើងមេឃ ឲ្យមានការហោះហើរពីប្រទេសនានានៅឡើយ។
សូមបញ្ជាក់ដែរថា បច្ចុប្បន្ននេះ កម្ពុជាបានរកឃើញករណីនៃការឆ្លងជំងឺកូវីដ១៩ចំនួន៥ករណីហើយ គិតចាប់តាំងពីមានការរីករាលដាលដំបូងនៅក្នុងប្រទេសចិន នៅខែ មករា ឆ្នាំ ២០២០មក។ ក្នុងនោះ ករណីទីមួយ បានកើតឡើងទៅលើបុរសជនជាតិចិនម្នាក់នៅខេត្តព្រះសីហនុ ដែលធ្វើដំណើរមកពីទីក្រុងវូហាន ប្រទេសចិន ប៉ុន្តែបានព្យាបាលឲ្យជាសះស្បើយវិញ។ ទី២.បានកើតទៅលើបុរសជនជាតិខ្មែរវ័យ៣៨ឆ្នាំនៅខេត្តសៀមរាប ដែលកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តសៀមរាប ទី៣.បានកើតទៅលើស្រ្តីជនជាតិអង់គ្លេសវ័យ៦៥ឆ្នាំ ជាអ្នកដំណើរលើនាវា Viking Cruise Journey នៅខេត្តកំពង់ចាម និងករណីទី៤ និងទី៥ បានកើតឡើងទៅលើបុរសជនជាតិអង់គ្លេសវ័យ៧៣ឆ្នាំជាស្វាមី និងស្រ្តីជនជាតិអង់គ្លេសវ័យ៦៩ឆ្នាំ ដែលជាអ្នកដំណើរលើនាវា Viking Cruise Journey ដែលកំពុងចតនៅក្នុងខេត្តកំពង់ចាម។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជាបានថ្លែងថា ករណីនៃការរកឃើញជំងឺកូវីដ១៩នៅក្នុងប្រទេសកម្ពុជានេះ ភាគច្រើន គឺជាករណីនាំចូលមកពីខាងក្រៅ។ បើតាមលោករដ្ឋមន្ត្រី កម្ពុជានៅមិនទាន់មានការឆ្លងរីករាលដាលនៅក្នុងសហគមន៍ ភូមិ ឃុំ នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ