កូវីដ១៩៖ កម្ពុជា-វៀតណាម សម្រេចបិទព្រំដែនមួយរយៈ តែពាណិជ្ជកម្មនៅដំណើរការធម្មតា
ក្រសួងការបរទេសកម្ពុជា នៅថ្ងៃទី ១៩ មីនានេះ បានជូនដំណឹងជាផ្លូវការទៅកាន់អាជ្ញាធរវៀតណាម ស្តី អំពីការផ្អាកការធ្វើដំណើរចេញចូលនៃពលរដ្ឋប្រទេសទាំងពីរ ក្នុងពេលដែលស្ថានការណ៍ជំងឺឆ្លងកូវីដ-១៩ កំពុងរីករាលដាល។ សេចក្តីសម្រេចនេះ គឺជាការឆ្លើយតបទៅនឹងសេចក្តីសម្រេចជាឯកតោភាគីរបស់ភាគីវៀតណាម ដែលបានបិទការធ្វើដំណើរនៃជនបរទេសទាំងអស់ចូលទៅវៀតណាម ចាប់ពីថ្ងៃទី ១៨ មីនា ក្នុងនោះក៏មានប្រជាជនកម្ពុជាផងដែរ។ តើអ្វីទៅជាផលវិបាកនៃការបិទព្រំដែនជាឯកតោភាគីរបស់វៀតណាម?
ចុះផ្សាយនៅថ្ងៃ៖
ស្តាប់ - ០២:៥៣
អ្នកវិភាគសេដ្ឋកិច្ចនិងជានាយកមជ្ឈមណ្ឌលសិក្សាគោលនយោបាយកម្ពុជា លោក ចាន់ សុផល បានលើកឡើងថា នៅខណៈដែលវៀតណាមបិទព្រំដែនជាមួយកម្ពុជា ទំនិញកម្ពុជាដែលត្រូវចេញទៅវៀតណាមនឹងកកស្ទះ ហើយនឹងចុះថ្លៃ។ ផ្ទុយទៅវិញ ទំនិញដែលត្រូវមកពីវៀតណាម ដូចជា បន្លែ ត្រី សាច់ នឹងឡើងថ្លៃ។ បើតាមអ្នកវិភាគសេដ្ឋកិច្ចរូបនេះ លោកបានផ្តល់ជាយោបល់ថា ឆ្លៀតក្នុងឱកាសនេះ កម្ពុជាគួរវិនិយោគបន្ថែម លើផលិតកម្មស្បៀង ដើម្បីដោះស្រាយបញ្ហារយ:ពេលខ្លីផង និងរយ:ពេលវែងផង។
ការលើកឡើងរបស់អ្នកវិភាគសេដ្ឋកិច្ចរូបនេះ បានធ្វើឡើងក្រោយពីភាគីវៀតណាម បានប្រកាសបិទព្រំដែនជាឯកតោភាគីជាមួយកម្ពុជា គិតចាប់តាំងពីថ្ងៃទី ១៨ មីនា មក។ ក៏ប៉ុន្តែភ្លាមៗនេះ ភាគីកម្ពុជាតាមរយៈក្រសួងការបរទេសកម្ពុជា នៅថ្ងៃទី ១៩ មីនានេះ ក៏បានប្រកាសបិទជាបណ្តោះអាសន្ននូវព្រំដែនទាំងផ្លូវគោក ផ្លូវទឹក និងផ្លូវអាកាស ដោយហាមប្រជាពលរដ្ឋវៀតណាមធ្វើដំណើរមកកាន់ប្រទេសកម្ពុជា គិតចាប់ពីវេលាម៉ោង ២៣និង៥៩នាទីយប់ ថ្ងៃទី ២០ មីនានេះតទៅ។ នេះបើយោងតាមលិខិតរបស់ក្រសួងការបរទេសកម្ពុជា ផ្ញើទៅកាន់អាជ្ញាធរវៀតណាម តាមរយៈស្ថានទូតវៀតណាមប្រចាំនៅទីក្រុងភ្នំពេញ នៅថ្ងៃទី ១៩ មីនានេះ ដោយបានលើកឡើងថា វិធានការនេះ គឺមានគោលបំណងបញ្ជៀសនូវការលំបាកចំពោះពលរដ្ឋវៀតណាម ក៏ដូចជាពលរដ្ឋកម្ពុជា ដែលតម្រូវឲ្យបង្ខាំងខ្លួននៅដាច់ពីគេ ក្រោយពីបានធ្វើដំណើរពីប្រទេសកម្ពុជា ចូលទៅកាន់ប្រទេសវៀតណាម។ ប៉ុន្តែ វិធានការខាងលើនេះ មិនត្រូវបានអនុវត្តចំពោះពលរដ្ឋវៀតណាមនិងពលរដ្ឋកម្ពុជា ដែលកាន់លិខិតឆ្លងដែនការទូត និងផ្លូវការទេ។
គួរជំរាបជូនថា ទំហំពាណិជ្ជកម្ម កម្ពុជា-វៀតណាម នៅឆ្នាំ ២០១៩ កន្លងទៅ សម្រេចបាន៥ពាន់លានដុល្លារអាមេរិក ហើយភាគីទាំងពីរសង្ឃឹមថា នៅឆ្នាំ២០២០នេះ ទំហំពាណិជ្ជកម្មរវាងប្រទេសទាំងពីរ នឹងលើសពីទំហំ៥ពាន់លានដុល្លារអាមេរិកនេះ។
យ៉ាងណាក៏ដោយ នៅក្នុងលិខិតរបស់ក្រសួងការបរទេសកម្ពុជាផ្ញើទៅកាន់អាជ្ញាធររដ្ឋាភិបាលវៀតណាមនៅថ្ងៃទី១៩មីនានេះ ភាគីកម្ពុជាបានស្នើឲ្យអាជ្ញាធរមូលដ្ឋាននៃប្រទេសទាំងពីរ បន្តធ្វើការរួមគ្នា ដើម្បីសម្របសម្រួលនិងធានាថា ការដឹកជញ្ជូនទំនិញឆ្លងកាត់ព្រំដែនរួមរវាងប្រទេសទាំងពីរ អាចអនុវត្តដោយគ្មានការរាំងស្ទះ។ បន្ថែមលើនេះ ភាគីកម្ពុជា ក៏បានស្នើសុំឲ្យអាជ្ញាធរមូលដ្ឋាននៃប្រទេសវៀតណាម ជួយសម្រួលការធ្វើមាតុភូមិនិវត្តន៍នូវពលរដ្ឋកម្ពុជាទាំងអស់ដែលកំពុងត្រូវបានដាក់ឲ្យនៅដាច់ពីគេ ក្នុងប្រទេសវៀតណាម មកកម្ពុជាវិញ ប្រសិនបើមាន។ នេះបើយោងតាមលិខិតរបស់ក្រសួងការបរទេសកម្ពុជា។
ចំណែកប្រមុខរដ្ឋាភិបាលកម្ពុជា លោក ហ៊ុន សែន នៅថ្ងៃទី ១៩ មីនានេះ ក៏បានអំពាវនាវឲ្យប្រជាពលរដ្ឋកម្ពុជាផ្អាកជាបណ្តោះអាសន្ន ក្នុងការធ្វើដំណើរទៅកាន់ប្រទេសវៀតណាមផងដែរ។ បើតាមលោកនាយករដ្ឋមន្ត្រី ក្នុងនាមលោកជានាយករដ្ឋមន្រ្តីកម្ពុជា កាលពីយប់មិញ ថ្ងៃទី ១៨ មីនា លោកបានសម្រេចឲ្យមានការបិទព្រំដែនកម្ពុជា-វៀតណាមជាបណ្តោះអាសន្នមួយរយៈ។ ការបិទព្រំដែននេះ នឹងធ្វើឡើងរហូតដល់ប្រទេសវៀតណាមលើកបម្រាម និងពេលវេលានៃកាលកំណត់បិទព្រំដែនរវាងប្រទេសទាំងពីរសារជាថ្មីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ