ទូតកម្ពុជាប្រចាំកូរ៉េ៖ មានជនជាតិខ្មែរ ៣នាក់បានឆ្លងកូវីដ១៩ នៅកូរ៉េខាងត្បូង
នៅសៅរ៍ ទី២១ ខែមីនា ឆ្នាំ២០២០នេះ មានជនជាតិខ្មែរចំនួន៣នាក់ នៅទីក្រុងប៊ូឆុន ប្រទេសកូរ៉េខាងត្បូង បានឆ្លង COVID-19។ នេះបើតាមស្ថានទូតកម្ពុជាប្រចាំប្រទេសកូរ៉េខាងត្បូងប្រកាសនៅថ្ងៃអាទិត្យនេះ។ ឯកអគ្គរាជទូតខ្មែរប្រចាំនៅប្រទេសកូរ៉េខាងត្បូងបញ្ជាក់ថាស្ថានភាពសុខភាពរបស់អ្នកទាំង៣គឺល្អប្រសើរ។
ចុះផ្សាយនៅថ្ងៃ៖
តាមរយៈទំព័រហ្វេសប៊ុករបស់ខ្លួនស្ថានទូតកម្ពុជាប្រចាំប្រទេសកូរ៉េបានជូនដំណឹងជាបឋមថាថ្ងៃសៅរ៍ ទី២១ ខែមីនា ឆ្នាំ២០២០នេះ មានជនជាតិខ្មែរចំនួន៣នាក់ ដែលជានារីខ្មែររៀបការស្វាមីកូរ៉េ ០១នាក់ អាយុ២៣ឆ្នាំ ម្តាយអាយុ ៤៦ឆ្នាំ រួមជាមួយនឹងកូនប្រុសអាយុទើប៣ខែ នៅទីក្រុងប៊ូឆុន ដែលស្ថិតនៅចម្ងាយប្រមាណ២០គីឡូម៉ែត្រពីទីក្រុងសេអ៊ូល បានឆ្លងវីរ៉ុស COVID-19 ពីប្តីរបស់គាត់។
បើតាមស្ថានទូតខ្មែរ នៅយប់ថ្ងៃទី២១ មីនា ២០២០ ក្រុមគ្រូពេទ្យកូរ៉េ បានបញ្ជូនពួកគាត់ទៅមន្ទីពេទ្យម៉្យុងជី នៅអ៊ីលសាន ដើម្បីពិនិត្យ និងព្យាបាល។ លោក ឡុង ឌីម៉ង់ ឯកអគ្គរាជទូតខ្មែរប្រចាំនៅប្រទេសកូរ៉េខាងត្បូង បានប្រាប់វិទ្យុបារាំងអន្តរជាតិនៅរសៀលនេះថា អ្នកទាំង៣នាក់គឺស្ថិតនៅក្នុងស្ថានភាពសុខភាពល្អប្រសើរ។
ស្ថានទូតខ្មែរក៏បានឲ្យដឹងដែរថា ប្តីរបស់នារីខ្មែររូបនេះ ត្រូវបានគេពិនិត្យឃើញមាន COVID-19 នៅថ្ងៃទី០៧ ខែមីនា ឆ្នាំ២០២០និងត្រូវបានដាក់ឲ្យនៅដាច់ដោយឡែក និងព្យាបាលជិតជាសះស្បើយរួចទៅហើយ។
បច្ចប្បន្ន ស្ថានទូតបាន និងកំពុងតែប្រមូលព័ត៌មានច្បាស់ការបន្ថែមទៀត និងធ្វើការសម្របសម្រួលជាមួយក្រសួងការបរទេសកូរ៉េ អាជ្ញាធរសុខាភិបាល មន្ទីរពេទ្យអ៊ីលសានម៉្យុងជី និងអាជ្ញាធរពាក់ព័ន្ធផ្សេងទៀត បន្ថែមពីនោះកំពុងបញ្ជូនមន្ត្រីចុះទៅមន្ទីរពេទ្យដោយផ្ទាល់ ដើម្បីតាមដានពីស្ថានភាពសុខភាពរបស់ពួកគាត់នាព្រឹកថ្ងៃទី២២ ខែមីនានេះ។ នេះបើតាមការអះអាងរបស់ស្ថានទូតខ្មែរ។
នៅថ្ងៃសៅរ៍ ទី២១ ខែមីនា ម្សិលមិញ កូរ៉េខាងត្បូងបានរកឃើញអ្នកឆ្លងកូវី១៩ ចំនួន៩៨ករណីបន្ថែមទៀត ដែលធ្វើឲ្យចំនួនអ្នកឆ្លងនៅក្នុងប្រទេសនេះកើនឡើងដល់៨,៨៩៧ករណី។ នេះបើតាមមជ្ឈមណ្ឌលគ្រប់គ្រង និងការពារជំងឺរបស់កូរ៉េ KCDC។ ចំណែកអ្នកឆ្លងកូវី១៩ ហើយបានស្លាប់មានចំនួន១០៤នាក់ ដែលភាគច្រើនគឺជាមនុស្សចាស់ និងអ្នកដែលមានជំងឺស្រាប់។ អត្រាមរណៈដោយកូវីដ១៩ គិតនៅថ្ងៃសៅរ៍ ទី២១ ខែមីនា គឺមានត្រឹមតែ១.១៧ភាគរយប៉ុណ្ណោះ ចំណែកមនុស្ស ដែលមានអាយុលើសពី៨០ឆ្នាំមានអត្រាស្លាប់ខ្ពស់ជាង ពោលគឺ១០.៤៦ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ