លោក ស ខេង៖ មានពលរខ្មែរប្រមាណ១,៥ម៉ឺននាក់បានវិលចូលកម្ពុជាវិញក្រោយការបិទព្រំដែន
មានពលរដ្ឋខ្មែរប្រមាណជាង១ម៉ឺន៥ពាន់នាក់ បានវិលចូលមកក្នុងប្រទេសកម្ពុជាវិញ ក្រោយពីមានវិធានការបិទព្រំដែនរវាង កម្ពុជានិងថៃ កាលពីថ្ងៃទី២៣ ខែមីនា។ នេះបើតាមការលើកឡើងរបស់លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នៅថ្ងៃទី២៤ ខែមីនានេះ។ ខណៈពេលនេះកម្ពុជារកឃើញអ្នកឆ្លងកូវីដ១៩ ចំនួន៨៧ករណី។
ចុះផ្សាយនៅថ្ងៃ៖
ស្តាប់ - ០២:១៧
ប្រសិនបើមានពលរខ្មែរ ដែលមកពីថៃ ទៅដល់មូលដ្ឋានតាមភូមិស្រុក អាជ្ញាធរមូលដ្ឋានត្រូវទៅជួបពួកគាត់ដើម្បីធ្វើការណែនាំពួកគាត់ឲ្យនៅមួយកន្លែង ហើយបើមានករណី ឬបញ្ហាណាមួយនោះត្រូវបិទភូមិតែម្តង ប៉ុន្តែបើនៅតាមជនបទ ដែលមានផ្ទះឆ្ងាយៗពីគ្នា គឺបិទតែផ្ទះប៉ុណ្ណោះ តែបើផ្ទះជាប់ៗគ្នា នោះនឹងត្រូវបិទទាំងអស់។ នេះជាការលើកឡើងរបស់លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នៅក្នុងពិធីជួបសំណេះសំណាលជាមួយមន្ត្រីនគរបាលអន្តោប្រវេសន៍ នៅអាកាសយានដ្ឋានអន្តរជាតិភ្នំពេញ នាថ្ងៃទី២៤ ខែមីនា ឆ្នាំ២០២០ ។
បើតាមលោក ស ខេង កម្ពុជាមិនទាន់មានវិធានការចាប់បង្ខាំងមនុស្សទុក ដូចនៅតាមបណ្តាប្រទេសផ្សេងនោះទេ ប៉ុន្តែកម្ពុជានៅប្រើវិធានការអំពាវនាវជាមុនសិន ដោយយកវិធានការដូចគ្នាក្នុងពេលឃោសនាបោះឆ្នោត ដើម្បីផ្សព្វផ្សាយប្រាប់ប្រជាពលរដ្ឋ។
មន្ត្រីអាដហុកប្រចាំនៅខេត្តបន្ទាយមានជ័យ លោកស្រីប៊ិន សុភ័ណ បានលើកឡើងថា ពលរដ្ឋខ្មែរ ដែលចាកចេញពីប្រទេសថៃ ក្រោយមានការបិទព្រំដែន បានសម្រុកទៅស្រុកកំណើតរបស់ពួកគាត់វិញ ហើយលោកស្រីមានការព្រួយបារម្ភថា នៅពេលទៅដល់ស្រុកកំណើត តើពួកគាត់នឹងនៅ ដាច់ដោយឡែកពីគេតាមការណែនាំ ឬយ៉ាងណា។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានអះអាងប្រាបវិទ្យុបារាំងអន្តរជាតិនៅថ្ងៃទី២៤ ខែមីនា ថាមានពលរដ្ឋកម្ពុជា ដែលមកពីថៃបានចូលទៅដល់ភូមិឃុំ ដែលជាស្រុកកំណើតរបស់ពួកគាត់ខ្លះៗហើយ ប៉ុន្តែមិនមានតួលេខពិតប្រាកដទេ។
អ្នកនាំពាក្យក្រសួងមហាផ្ទៃរូបនេះអះអាងទៀតថា ក្រសួងមហាផ្ទៃបានណែនាំទៅអភិបាលរាជធានីខេត្តទាំងអស់ ដើម្បីឲ្យស្រុកនិងឃុំ ត្រៀមរថយន្ត ឬម៉ូតូ ក្នុងគោលដៅឃោសនាផ្សព្វផ្សាយពីការរាលដាលនៃជំងឺកូវីដ១៩។ គិតរហូមកដល់ពេលនេះ តាមស្រុក ឃុំមួយចំនួនបានចេញឃោសនា និងធ្វើសកម្មភាពនេះបន្តទៀត។
គិតត្រឹមថ្ងៃទី២៣ ខែមីនា នេះកម្ពុជារកឃើញអ្នកឆ្លងកូវីដ១៩ ចំនួន៨៧ករណី ដែលមានទាំងបរទេស និងខ្មែរ ហើយបានឆ្លងទៅកាន់១៣ខេត្តក្រុង ក្នុងប្រទេសកម្ពុជា។ ដោយឡែងក្នុងចំណោម៨៧ករណី មានជាសះស្បើយ២នាក់ គឺស្ត្រីជនជាតិអង់គ្លេសវ័យ៦៥ឆ្នាំ និងបុរសជនជាតិចិនវ័យ៦០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ