បក្សប្រជាធិបតេយ្យមូលដ្ឋានស្នើរដ្ឋសភាអនុម័តកញ្ចប់ថវិកាពិសេសសម្រាប់ដោះស្រាយវិបត្តិសេដ្ឋកិច្ច
គណបក្សប្រជាធិបតេយ្យមូលដ្ឋាននៅព្រឹកថ្ងៃពុធនេះ បានចេញសេចក្តីថ្លែងការណ៍ស្នើឱ្យរដ្ឋសភាជាតិអនុម័តច្បាប់បញ្ចេញថវិកាពិសេសបន្ថែមសម្រាប់ឱ្យរដ្ឋាភិបាលកម្ពុជាយកទៅប្រើប្រាស់ ដើម្បីទប់ស្កាត់ជំងឺកូវីដ-១៩ និងដោះស្រាយវិបត្តិសេដ្ឋកិច្ច ហិរញ្ញវត្ថុ និងសន្តិសុខស្បៀង។ ប៉ុន្តែ អ្នកនាំពាក្យរដ្ឋសភាជាតិអះអាងថា រដ្ឋសភានឹងធ្វើតាមនីតិវិធីលើបញ្ហាកញ្ចប់ថវិកាពិសេសនេះ បើមានសំណើពីរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០២:៤៨
បក្សប្រជាធិបតេយ្យមូលដ្ឋានបានកត់សម្គាល់ថា វិបត្តិកូវីដ១៩ កំពុងនាំមកនូវផលវិបាកធ្ងន់ធ្ងរដល់ប្រជាពលរដ្ឋ និងសង្គមជាតិទាំងមូល ហើយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២០ មិនមានខ្ទង់ចំណាយសម្រាប់ដោះស្រាយផលវិបាកធ្ងន់ធ្ងរដល់ប្រជាពលរដ្ឋ និងសង្គមជាតិដែលបណ្តាលមកពីវិបត្តិកូវីដ-១៩នេះទេ។ ហេតុដូច្នេះហើយ គណបក្សនេះស្នើឱ្យអង្គនីតិប្បញ្ញតិ្តអនុម័តច្បាប់បញ្ចេញកញ្ចប់ថវិកាពិសេសបន្ថែម សម្រាប់ឱ្យរាជរដ្ឋាភិបាលអាចមានធនធានហិរញ្ញវត្ថុសមស្របគ្រប់គ្រាន់ ដើម្បីធ្វើការងារទប់សា្កត់កុំឱ្យមានការផ្ទុះរីករាលដាលជំងឺកូវីដ-១៩ កាន់តែធ្ងន់ធ្ងរនៅទូទាំងប្រទេស និងដោះស្រាយវិបត្តិសេដ្ឋកិច្ច ហិរញ្ញវត្ថុ និង សន្តិសុខស្បៀងនៅកម្ពុជាទាន់ពេលវេលា និង ប្រកបដោយប្រសិទ្ធភាព។
អ្នកនាំពាក្យរដ្ឋសភាជាតិកម្ពុជា លោកឡេង ប៉េងឡុង បានអះអាងថា រដ្ឋសភាមិនទាន់ទទួលបានសំណើនេះនៅឡើយទេ។ ប៉ុន្តែ លោកថា រដ្ឋសភានឹងធ្វើតាមនីតីវិធីរបស់ខ្លួនចំពោះបញ្ហាកញ្ចប់ថវិកាពិសេសបន្ថែមនេះ បើសិនមានការស្នើសុំពីរដ្ឋាភិបាលកម្ពុជា។ តាមលោកឡេង ប៉េងឡុង មកដល់ពេលនេះ រដ្ឋសភាជាតិមិនទាន់ ទទួលសំណើណាមួយពីរដ្ឋាភិបាលកម្ពុជានោះទេ ដូច្នេះហើយ គឺបន្តប្រើប្រាស់កញ្ចប់ថវិកាចាស់ដែលរដ្ឋសភាបានអនុម័តកន្លងមក។
សម្រាប់គណបក្សប្រជាធិបតេយ្យមូលដ្ឋានវិញ កញ្ចប់ថវិកាពិសេសនេះ គឺមានសារៈសំខាន់ក្នុងការដោះស្រាយបញ្ហារបស់ប្រជាពលរដ្ឋ។ បើតាមគណបក្សនេះ កញ្ចប់ថវិកានេះ អាចយកទៅដោះស្រាយបញ្ហាសំខាន់ៗដូចជា ធ្វើជាទុនបន្ថែមដែលមានការអត្រាការប្រាក់ទាបបំផុតជួយដល់ធនាគារឯកជន និង ស្ថាប័នមីក្រូហិរញ្ញវត្ថុ ដើម្បីសម្រួលដល់ការផ្អាកបង់រំលស់ប្រចាំខែរបស់ពលរដ្ឋក្នុងរយៈពេលខ្លី។ កញ្ចប់ថវិកានេះ ក៏សម្រាប់ជួយឧបត្ថម្ភដល់កម្មករ និង បុគ្គលិកក្នុង និងក្រៅប្រព័ន្ធដោយម្នាក់ៗទទួលបាន៥០ម៉ឺនរៀលក្នុងមួយខែ និង សម្រាប់គាំទ្រដល់កសិករ បង្កើនការផលិតទូទាំងប្រទេស និងបែងចែកស្បៀងភ្ជាប់ជាមួយការបញ្ជូនគ្រូកសិកម្ម៥០០នាក់ជួយដល់កសិករផលិត។ ម្យ៉ាងវិញទៀត វាក៏សម្រាប់គាំទ្រដល់រោងម៉ាស៊ីនកិនស្រូវទាំងអស់ និងសម្រាប់គាំទ្រដល់ក្រុមហ៊ុន សហគ្រាសដែលរងផលប៉ះពាល់ផងដែរ។
សូមបញ្ជាក់ថា ដើម្បីទប់ស្កាត់ការរីករាលដាលនៃជំងឺកូវីដ-១៩ រដ្ឋាភិបាលកម្ពុជាបានចាត់វិធានការចាំបាច់មួយចំនួនដូចជា ការបិទសាលា បិទហាងផឹកស៊ី ក្លិបកម្សាន្ត មិនអនុញ្ញាតឱ្យមានការប្រារព្ធពិធីបុណ្យចូលឆ្នាំថ្មី និង ការបិទការធ្វើដំណើរជាដើម។ ចំពោះកម្មករ កម្មការិនីដែលអស់ការងារធ្វើព្រោះតែរោងចក្រព្យួរការងារដោយសារតែជំងឺកូវីដ-១៩ រដ្ឋាភិបាលសម្រេចផ្តល់ប្រាក់ឧបត្ថម្ភ៧០ដុល្លារក្នុងមួយខែ គឺរដ្ឋចេញ៤០ដុល្លារ និង ចៅកែរោងចក្រចេញ៣០ដុល្លារ។ រដ្ឋាភិបាលកម្ពុជាក៏បានត្រៀមបម្រុងថវិកាពី៨០០ទៅ២ពាន់លានដុល្លារអាមេរិក ដើម្បីសង្រ្គោះសេដ្ឋកិច្ចកម្ពុជាពីការរងផលប៉ះពាល់ដោយសារតែជំងឺកូវីដ-១៩ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ