១៧មេសាថ្ងៃឡើងកាន់អំណាចរបស់ខ្មែរក្រហម៖ អ្នកនយោបាយខ្មែររំឭកពីភាពឈឺចាប់នៃរបបអាវខ្មៅនេះ
អ្នកនយោបាយខ្មែរលេចធ្លោចំនួន២រូបបានរំឭកពីព្រឹត្តិការណ៍នៃការឡើងកាន់អំណាចរបស់ពួកខ្មែរក្រហមកាលពី ថ្ងៃទី១៧មេសាឆ្នាំ១៩៧៥ ដែលជាខួប៤៥ឆ្នាំនៅថ្ងៃនេះ។ ប៉ុន្តែការឡើងកាន់អំណាចរបស់របបអាវខ្មៅមួយនេះ គឺបានធ្វើឲ្យប្រជាជនស្លាប់អស់ប្រមាណជាង២លាននាក់ តែក្នុងរយៈពេល៣ឆ្នាំ ៨ខែ និង២០ថ្ងៃដោយសារតែការកាប់សម្លាប់ ការបង្ខំឲ្យធ្វើការលើសកម្លាំង ការអត់អាហារ និងជំងឺផ្សេងៗ។
ចុះផ្សាយនៅថ្ងៃ៖
ស្តាប់ - ០២:១១
«ចងចាំថ្ងៃ១៧ មេសា នៃរបបប្រល័យពូជសាសន៍ប៉ុលពត»។នេះគឺជាចំណងជើងនៃអត្ថបទរបស់ ប្រមុខរដ្ឋាភិបាលកម្ពុជាសព្វថ្ងៃ លោក ហ៊ុន សែន។ លោក ហ៊ុន សែន បានចាត់ទុកការឡើងកាន់អំណាចនៃរបប «កម្ពុជាប្រជាធិបតេយ្យ»របស់ខ្មែរក្រហមថាជារបប«ក្លែងក្លាយ» ដែលបន្ទាប់មកបានក្លាយទៅជារបប «ប្រល័យពូជសាសន៍ប៉ុលពត» ឬហៅថា «របបខ្មែរក្រហម»។
លោកប្រមុខរដ្ឋាភិបាលបានរំឭកថា ថ្ងៃនេះ កាលពី៤៥ឆ្នាំមុន គឺថ្ងៃដែលរបបអាវខ្មៅ បានបង្ខំប្រជាពលរដ្ឋនៅទីក្រុងភ្នំពេញទាំងមូលឲ្យចាកចេញទៅតាមបណ្តាខេត្ត ហើយបន្ទាប់មកពួកខ្មែរក្រហមបានជម្លៀសប្រជាពលរដ្ឋពីតាមបណ្តាខេត្តទៅកាន់ជនបទ ដោយបានបង្ខំឲ្យធ្វើការដូចគោក្របីទាំងយប់ទាំងថ្ងៃគ្មានថ្ងៃសម្រាក និងជួបជុំក្រុមគ្រួសារឡើយ។
បើតាមលោក ហ៊ុន សែន ក្រោមការគ្រប់គ្រងរបស់របបប៉ុល ពត រយៈពេល ៣ឆ្នាំ ៨ ខែ ២០ ថ្ងៃ គឺបានធ្វើអោយប្រជាពលរដ្ឋស្លាប់បាត់បង់ជីវិតអស់ជាង៣លាននាក់ ហើយនៅពេលនោះក៏គ្មានវត្តមានអង្គការសិទ្ធមនុស្សណាមកជួយប្រទេសកម្ពុជាឡើយ។
ចំណែក លោក សម រង្ស៊ី វិញក៏រំឭកផងដែរពីថ្ងៃឡើងកាន់អំណាចរបស់ខ្មែរក្រហម១៧មេសា១៩៧៥។ មេដឹកនាំបក្សប្រឆាំងរូបនេះបានអះអាងថា របប ប៉ុល ពត បានធ្វើឲ្យប្រជារាស្រ្តខ្មែរ វេទនាយ៉ាងខ្លាំង ហើយបណ្តាលឲ្យពលរដ្ឋ បាត់បង់ជីវិត ប្រមាណ២លាននាក់។ លោក សម រង្ស៊ី អះអាងថា របបនេះ ខ្មែរក្រហមនេះបានប្រព្រឹត្តអំពើឧក្រិដ្ឋរបស់ខ្លួន ដោយសារតែទទួលបានការគាំទ្រពីចិនកុម្មុយនីស្ត។
សូមជម្រាបថា សិទ្ធិសេរីភាពពលរដ្ឋ រួមទាំងសិទ្ធិរស់រាន នៅក្នុងរបបយង់ឃ្នងនោះគឺគ្មានទេ។ សូម្បីតែស្លៀកពាក់ខោអាវក៏ពួកគេតម្រូវអោយស្លៀកពាក់តែខោអាវពណ៌ខ្មៅមួយពណ៌មួយកំប៉្លេគត់។ ក្រៅពីបង្ខំអោយធ្វើការគ្មានថ្ងៃសម្រាក របបខ្មែរក្រហមបានធ្វើទារុណកម្ម និងវាយសម្លាប់ប្រជាពលរដ្ឋតាមអំពើចិត្តដោយចោទថាជាខ្មាំង។ នៅក្នុងសម័យនោះ គ្រប់យ៉ាងត្រូវបានបោះបង់ចោលរួមទាំង គេហដ្ឋាន សាលារៀន វត្តអារាម មន្ទីរពេទ្យ និងធនាគារជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ