លោក សម រង្ស៊ី ជំរុញឱ្យរដ្ឋាភិបាលកម្ពុជាយកលុយជំនួយអឺរ៉ុប៦០លានដុល្លារទៅផ្តល់បន្ថែមដល់កម្មករ
អតីតប្រធានអតីតគណបក្សប្រឆាំងលោកសម រង្ស៊ី តាមរយៈទំព័រហ្វេសប៊ុកកាលពីថ្ងៃពុធ បានជំរុញឱ្យរដ្ឋាភិបាលកម្ពុជាយកទឹកប្រាក់ជំនួយរបស់អឺរ៉ុបប្រមាណជា៦០លានដុល្លារអាមេរិកទៅផ្តល់បន្ថែមដល់កម្មករ កម្មការិនីខ្មែរដែលអត់មានការងារធ្វើ។ ប៉ុន្តែ អ្នកនាំពាក្យរដ្ឋាភិបាលកម្ពុជា បានលើកឡើងថា នេះ គឺគ្រាន់តែជាវោហារសាស្ត្រនយោបាយ ហើយរដ្ឋាភិបាលមិនធ្វើតាមការលើកឡើងណាមួយរបស់លោក សម រង្ស៊ី ឡើយ។
ចុះផ្សាយនៅថ្ងៃ៖
ស្តាប់ - ០២:១៨
តាមរយៈទំព័រហ្វេសប៊ុក លោកសម រង្ស៊ី បានលើកឡើងថា ថវិកាជំនួយរបស់សហភាពអឺរ៉ុប គឺអាចយកទៅផ្តល់ឱ្យកម្មករ កម្មការិនីក្នុងម្នាក់ៗ ៥០ដុល្លារក្នុងរយៈពេល៦ខែបាន។ បើតាមលោកសម រង្ស៊ី បើបន្ថែមថវិកា៥០ដុល្លារថែមទៀតនោះ គឺប្រាក់ឧបត្ថម្ភសម្រាប់កម្មករម្នាក់ៗដែលមាន៧០ដុល្លារក្នុងមួយខែ នឹងឡើងដល់ ១២០ដុល្លារក្នុង១ខែ ពោល គឺស្មើទៅនឹងអ្វីដែលលោកនាយករដ្ឋមន្រ្តីហ៊ុន សែន ធ្លាប់ប្រកាសផ្តល់ឱ្យកម្មករ កម្មការិនីដែលអស់ការងារធ្វើដោយសារតែរោងចក្រផ្អាកសកម្មភាពព្រោះតែជំងឺកូវីដ-១៩។
លោកផៃ ស៊ីផាន អ្នកនាំពាក្យរដ្ឋាភិបាលកម្ពុជាបានចាត់ទុកការលើកឡើងរបស់លោកសម រង្ស៊ីនេះថា ជាវោហារសាស្ត្រនយោបាយ ដើម្បីចង់ទទួលបានការឆ្លើយតបពីសំណាក់ប្រមុខរដ្ឋាភិបាលកម្ពុជាតែប៉ុណ្ណោះ។ បន្ថែមលើនេះ លោកអះអាងថា ការលើកឡើងនេះ គឺមិនមានតម្លៃដែលអាចឱ្យរដ្ឋាភិបាលកម្ពុជាធ្វើការឆ្លើយតបទៅវិញនោះឡើយ។ បើតាមលោកផៃ ស៊ីផាន រដ្ឋាភិបាលកម្ពុជាមានភាពឯករាជ្យ និង ម្ចាស់ការក្នុងការអនុវត្តវិធានការនានា ដើម្បីដោះស្រាយបញ្ហាប្រឈមទាំងឡាយដែលកើតចេញពជំងឺកូវីដ-១៩ ហើយរដ្ឋាភិបាលគ្មានភាពចាំបាច់ត្រូវធ្វើតាមអ្នកណានោះទេ។
សូមបញ្ជាក់ថា សហភាពអឺរ៉ុបទើបតែបានអនុម័តឱ្យបង្វែរហិរញ្ញប្បទានឥតសំណងសរុបចំនួន៥៦លានអឺរ៉ូ ឬស្មើនឹងប្រមាណ៦០លានដុល្លារអាមេរិកពីកម្មវិធីកំពុងដំណើរការមួយចំនួនសម្រាប់ជួយដល់កម្ពុជាលើវិស័យគាំពារសង្គមក្នុងការស្ដារសេដ្ឋកិច្ចពីវិបត្តិនៃជំងឺកូវីដ-១៩។ ក្រៅពីសហភាពអឺរ៉ុបនេះ កម្ពុជាក៏បានទទួលថវិកាជំនួយពីប្រទេសផ្សេងទៀតផងដែរ រួមមាន អាមេរិកផ្តល់២លានដុល្លារ អាល្លឺម៉ង់ផ្តល់១លាន៦សែនដុល្លារ វៀតណាមផ្តល់ក្នុងកញ្ចប់ថវិការួមជាមួយឡាវ២០ម៉ឺនដុល្លារ ខណៈជប៉ុន និង ចិនបានផ្តល់ជំនួយជាសម្ភារពេទ្យ និងអ្នកជំនាញសុខាភិបាលជួយដល់កម្ពុជា ដើម្បីប្រយុទ្ធប្រឆាំងនឹងជំងឺកូវីដ-១៩។
ចំណែក រដ្ឋាភិបាលកម្ពុជាវិញ បានគ្រោងថវិកាចំនួន១០០លានដុល្លារសម្រាប់អនុវត្តផែនការមេក្នុងការប្រយុទ្ធប្រឆាំងនឹងជំងឺកូវីដ-១៩នេះ។ ក្នុងនោះ ថវិកាជាតិមាន៦០លានដុល្លារ និងរកជំនួយពីដៃគូអភិវឌ្ឍន៍៤០លានដុល្លារ។ កម្ពុជាក៏បានត្រៀមថវិកាបម្រុងពី៨រយទៅ២ពាន់ដុល្លារអាមេរិកផងដែរ ដើម្បីសង្រ្គោះផ្នែកសេដ្ឋកិច្ចដែលរងផលប៉ះពាល់ដោយសារតែការរីករាលដាលនៃជំងឺកូវីដ-១៩នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ