កូវីដ១៩៖ រដ្ឋមន្ត្រីការបរទេសកម្ពុជា ស្នើអាមេរិកគាំទ្រដំណើរការរយៈពេលវែងនៃរោងចក្រនៅកម្ពុជា
រដ្ឋមន្ត្រីការបរទេសកម្ពុជា ស្នើឲ្យអាមេរិកគាំទ្រដំណើរការរោងចក្រនៅកម្ពុជា ក្នុងពេលមានវិបត្តិនៃជំងឺកូវីដ១៩។ ការស្នើសុំនេះ គឺធ្វើឡើងនៅក្នុងកិច្ចប្រជុំរដ្ឋមន្ត្រីការបរទេសអាស៊ាន-អាមេរិក កាលពីថ្ងៃទី ២៣ មេសា។
ចុះផ្សាយនៅថ្ងៃ៖
ស្តាប់ - ០២:៥០
«កម្ពុជាបានព្យាយាមកាត់បន្ថយនូវផលប៉ះពាល់ជាអវិជ្ជមាននៃជំងឺកូវីដ១៩លើសេដ្ឋកិច្ចជាតិ ព្រមទាំងត្រៀមខ្លួនសម្រាប់ដំណាក់កាលជាសះស្បើយឡើងវិញ ដោយរក្សាឲ្យរោងចក្រនៅបន្តដំណើរការដដែល។ ការណ៍នេះ បានការពារកម្មករកម្ពុជា មិនឲ្យបាត់បង់ការងារឡើយ។ ក៏ប៉ុន្តែ ដើម្បីទ្រទ្រង់ដំណើរការនេះ បានរយៈពេលវែង ការគាំទ្រពីសហរដ្ឋអាមេរិកដែលជាដៃគូពាណិជ្ជកម្មដ៏ធំមួយរបស់កម្ពុជា គឺមានសារៈសំខាន់បំផុត»។ នេះ គឺជាការលើកឡើងរបស់លោក ប្រាក់ សុខុន រដ្ឋមន្ត្រីការបរទេសកម្ពុជា ទៅកាន់លោក Mike Pompeo រដ្ឋមន្ត្រីការបរទេសអាមេរិក នៅក្នុងកិច្ចប្រជុំពិសេសរដ្ឋមន្ត្រីការបរទេសអាស៊ាន-អាមេរិក ដែលធ្វើឡើងតាមរយៈ Video Conference កាលពីថ្ងៃទី ២៣ មេសា។
តាមរយៈកិច្ចប្រជុំស្តីពីកិច្ចសហប្រតិបត្តិការប្រយុទ្ធប្រឆាំងនឹងជំងឺកូវីដ១៩ នៃរដ្ឋមន្ត្រីការបរទេសអាស៊ាន-អាមេរិកនេះ លោកឧបនាយករដ្ឋមន្ត្រី ប្រាក់ សុខុន បានលើកឡើងថា អាស៊ាននិងអាមេរិក គួរតែរិះរកនូវមធ្យោបាយទាំងឡាយណា ដើម្បីធ្វើយ៉ាងណា ធានាឲ្យមានលក្ខណៈជាយុទ្ធសាស្ត្រនូវការបើកចំហរសង្វាក់ផ្គត់ផ្គង់តំបន់និងសកលលោក ព្រមទាំងលំហូរទំនិញសំខាន់ៗនានា ជាពិសេសការផ្គត់ផ្គង់ថ្នាំពេទ្យ និងស្បៀងអាហារជាដើម។
គួរជំរាបជូនថា ក្នុងពេលដែលមានវិបត្តិនៃជំងឺកូវីដ១៩ ប្រទេសនីមួយៗនៅលើពិភពលោករួមទាំងប្រទេសអាស៊ាននិងសហរដ្ឋអាមេរិកផង បានចាប់យកវិធានការតែរៀងៗខ្លួន ដើម្បីទប់ស្កាត់ការរីករាលដាលនៃជំងឺកូវីដ១៩ ក្នុងនោះរួមមានការបិទព្រំដែនឬរឹតបន្តឹងការធ្វើដំណើររបស់ប្រជាពលរដ្ឋផងដែរ។ ការណ៍នេះ បាននិងកំពុងធ្វើឲ្យប៉ះពាល់ដល់វិស័យសេដ្ឋកិច្ច ពាណិជ្ជកម្ម នៃប្រទេសរៀងៗខ្លួន។ ដោយឡែកសម្រាប់កម្ពុជាវិញ ក្នុងពេលមានវិបត្តិនៃជំងឺកូវីដ១៩នេះ យ៉ាងហោចណាស់ មានរោងចក្រប្រមាណជា៦០% ត្រូវបានក្រុមហ៊ុនអ្នកបញ្ជាទិញលុបចោលកិច្ចសន្យា ដែលបាននិងកំពុងធ្វើឲ្យប៉ះពាល់ការងាររបស់កម្មករនិយោជិតកម្ពុជាជាងកន្លះលាននាក់។ ប៉ុន្តែទោះជាបែបនេះក្តី ដោយសារកម្ពុជានៅមានវត្ថុធាតុដើមនៅឡើយ រោងចក្រភាគច្រើននៅតែមានដំណើរការ ហើយក្នុងនោះមានរោងចក្រចំនួន៧៧ទៀត ទើបតែបានស្នើបង្កើតថ្មីផងដែរ។
យោងតាមសេចក្តីប្រកាសព័ត៌មាន ស្តីពី លទ្ធផលនៃកិច្ចប្រជុំពិសេសរដ្ឋមន្ត្រីការបរទេសអាស៊ាន-អាមេរិក កាលពីថ្ងៃទី ២៣ មេសា សហរដ្ឋអាមេរិកបានសន្យាបន្តគាំទ្រការរឹតចំណង និងតភ្ជាប់រវាងប្រជាជន និងប្រជាជន ក្នុងផ្នែកថែទាំសុខភាពសាធារណៈ។ បន្ថែមលើនេះ សហរដ្ឋអាមេរិកបានផ្តល់ជំនួយជាទឹកប្រាក់ប្រមាណជាង៣៥លានដុល្លារដល់ប្រទេសជាសមាជិកអាស៊ាន ដើម្បីប្រយុទ្ធប្រឆាំងនឹងជំងឺកូវីដ១៩។ ក្នុងនោះ កម្ពុជាទទួលបានទឹកប្រាក់ ១.៥ លានដុល្លារអាមេរិកបន្ថែមទៀត តាមរយៈទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ USAID ដែលធ្វើឲ្យជំនួយរបស់សហរដ្ឋអាមេរិកដើម្បីប្រយុទ្ធប្រឆាំងនឹងជំងឺកូវីដ១៩នៅកម្ពុជាកើនឡើងដល់ ៣.៥ លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ