ធនាគារជាតិស្នើធនាគារឯកជននិងមីក្រូហិរញ្ញវត្ថុ យោគយល់អតិថិជនដល់ដំណាច់ឆ្នាំ
ធនាគារជាតិនៃកម្ពុជាកាលពីថ្ងៃទី២០ខែមេសា កន្លងទៅនេះ បានស្នើដល់គ្រប់បណ្តាញគ្រឹះស្ថានធនាគារ និងមីក្រូហិរញ្ញវត្ថុទាំងអស់ ផ្តល់ការបន្ធូរបន្ថយកម្រៃសេវាផ្សេងៗពាក់ព័ន្ធនឹងឥណទាន និង/ឬលើកលែងការផាកពិន័យផ្សេងៗចំពោះអតិថិជន ចាប់ពីចេញកាលបរិច្ឆេទនេះ រហូតដល់ដំណាច់ខែធ្នូ ឆ្នាំ២០២០។ ការអំពាវនាវរបស់ធនាគារជាតិដូច្នេះធ្វើឡើងបន្ទាប់ពី វីរុសកូវីដ១៩ បានបង្កជាវិបត្តិធ្ងន់ធ្ងរទៅដល់ប្រជាពលរដ្ឋ ដែលបានខ្ចីប្រាក់ពីធនាគារ និងមីក្រូហិរញ្ញវត្ថុ ហើយមិនមានប្រាក់ចំណូលនៅអំឡុងពេលនេះ។
ចុះផ្សាយនៅថ្ងៃ៖
ស្តាប់ - ០២:០៥
យោងតាមលិខិតរបស់ខ្លួន ដែលបានប្រាប់មកអ្នកគ្រប់គ្រងគ្រឹះស្ថានធនាគារឯកជន និងហិរញ្ញវត្ថុ កាលពីដើមសប្តាហ៍នេះ ធនាគារជាតិនៃកម្ពុជា បានសរសេរថា ក្នុងស្ថានភាពដែលពិភពលោក ក៏ដូចជាប្រទេសកម្ពុជា កំពុងប្រឈមនឹងការរីករាលដាលនៃវីរុសកូវីដ-១៩ ធនាគារកណ្តាលមួយនេះ បានស្នើសុំឲ្យមានការយោគយល់ពីគ្រប់គ្រឹះស្ថានធនាគារ និងហិរញ្ញវត្ថុ ផ្តល់ការអនុគ្រោះបន្ថែមដល់អតិថិជន ដើម្បីជួយសម្រាលបន្ទុករបស់ពួកគាត់មួយកម្រិតទៀត ក្នុងគ្រាលំបាកនេះ។
ការបន្ធូរបន្ថយនេះគឺសំដៅទៅលើកម្រៃសេវាផ្សេងៗពាក់ព័ន្ធនឹងឥណទាន និង/ឬ លើកលែងការផាកពិន័យផ្សេងៗ ចំពោះអតិថិជនរបស់ខ្លួន ចាប់ពីពេលនេះ រហូតដល់ដំណាច់ខែធ្នូ ឆ្នាំនេះ។
សមាគមធនាគារ និងសមាគមមីក្រូហិរញ្ញវត្ថុកម្ពុជា នៅមិនទាន់មានការធ្វើអត្ថាធិប្បាយយ៉ាងណានៅឡើយទេ ទាក់ទងទៅនឹងការអំពាវនាវរបស់ធនាគារជាតិកម្ពុជាឲ្យមានការបន្ធូរបន្ថយភាពតានតឹងបន្ថែមទៀតដល់អតិថិជន។ ក៏ប៉ុន្តែមួយលើកជាពីរលើក សមាគមធនាគារ និងគ្រឹះស្ថានហិរញ្ញវត្ថុ តែងបានប្រកាសដល់សមាជិករបស់ខ្លួនឲ្យបន្តផ្តល់កំចីអាទិភាព និងរក្សាភាពទន់ភ្លន់ចំពោះអតិថិជនរបស់ពួកគេ។
យ៉ាងណាក៏ដោយ ពលរដ្ឋខ្មែរមួយចំនួន ដែលជាប់បំណុលធនាគារ និងមីក្រូហិរញ្ញវត្ថុ មិនត្រូវបានឆ្លើយតបវិញជាវិជ្ជមានទេ នូវសំណូមពររបស់ពួកគេ ជាពិសេសការស្នើសុំពន្យារពេលសងប្រាក់កំចីទាំងការទាំងដើម រយៈពេល៣ខែក្នុងពេលមានវិបត្តិកូវីដ១៩។
សូមរំលឹកថា កាលពីពេលថ្មីៗអំឡុងពេលប្រឈមនឹងវិបត្តិកូវីដ១៩នេះដែរ ធនាគារជាតិនៃកម្ពុជា បានដាក់ចេញវិធានការមួយចំនួនណែនាំឱ្យស្ថាប័នធនាគារ និងគ្រឹះស្ថានមីក្រូហិរញ្ញវត្ថុ អនុវត្តឥណទានរៀបចំឡើងវិញ ឬពន្យារពេលសងបណ្ដោះអាសន្ន ដើម្បីសម្រាលការលំបាកដល់ពលរដ្ឋ ដែលធ្លាក់ចុះប្រភពចំណូល។ តាមធនាគារជាតិ គឺដើម្បីរក្សាស្ថិរភាពហិរញ្ញវត្ថុ និងគាំទ្រសកម្មភាពសេដ្ឋកិច្ច ក្នុងអំឡុងពលរដ្ឋជួបវិបត្តិជំងឺរលាកផ្លូវដង្ហើមកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ