របាយការណ៍ស្រាវជ្រាវរបស់លីកាដូ៖ ផលប្រយោជន៍បានពីគ្រឹះស្ថានមីក្រូហិរញ្ញវត្ថុមានតិច តែភ័យខ្លាចខ្លាំង
អង្គការសិទ្ធិមនុស្សលីកាដូ បានចេញផ្សាយរបាយការណ៍ស្រាវជ្រាវរបស់ខ្លួនមួយនៅដើមខែឧសភានេះ ដោយបង្ហាញពីទំនាក់ទំនងរវាងបំណុលមីក្រូហិរញ្ញវត្ថុ និងការចំណាកស្រុកនៅតំបន់ព្រំដែនក្នុងប្រទេសកម្ពុជា។ បើតាមអង្គការក្នុងស្រុកមួយនេះ ផលប្រយោជន៍បានពីគ្រឹះស្ថានមីក្រូហិរញ្ញវត្ថុមានតិច តែភ័យខ្លាចមានច្រើន។ ជាដំណោះស្រាយអង្គការដដែល ស្នើជាថ្មីដល់រដ្ឋាភិបាល និងគ្រឹះស្ថានមីក្រូហិរញ្ញវត្ថុ ផ្អាកការសងបំណុល និងប្រគល់ប័ណ្ណកម្មសិទ្ធិដីធ្លីជូនម្ចាស់ទ្រព្យវិញ នៅក្នុងគ្រាដែលកម្ពុជាកំពុងជួបវិបត្តិកូវីដ១៩នេះ។
ចុះផ្សាយនៅថ្ងៃ៖
ស្តាប់ - ០២:០៦
នៅក្នុងរបាយការណ៍សង្ខេបស្តីពី “ការនាំឱ្យមានចំណាកស្រុក៖ បទពិសោធន៍នៃភូមិមួយអំពីបំណុលគ្រឹះស្ថានមីក្រូហិរញ្ញវត្ថុ និងការចំណាកស្រុកឆ្លងដែន” អង្គការលីកាដូផ្ដោតសំខាន់ទៅលើភូមិមួយនៅក្នុងខេត្តបន្ទាយមានជ័យ ដើម្បីស្វែងយល់ឱ្យបានស៊ីជម្រៅអំពីទំនាក់ទំនងរវាងបំណុលមីក្រូហិរញ្ញវត្ថុ និងការចំណាកស្រុកនៅតំបន់ព្រំដែនក្នុងប្រទេសកម្ពុជា។
តាមរយៈការធ្វើបទសម្ភាសន៍ជាមួយសមាជិកគ្រួសារដែលស្នាក់នៅផ្ទះចំនួន៣០គ្រួសារ អ្នកស្រាវជ្រាវរបស់អង្គការលីកាដូ បានរកឃើញថា ការជាប់បំណុលគ្រឹះស្ថានមីក្រូហិរញ្ញវត្ថុច្រើនលើសលុប គឺជាកត្តាចម្បងនាំឱ្យពលរដ្ឋធ្វើចំណាកស្រុកចេញពីភូមិ។
លោកស្រី ណាលី ពីឡូក នាយិកាអង្គការលីកាដូ និយាយក្នុងរបាយការណ៍នេះថា៖ គ្រួសារជាច្រើនបានចាកចេញពីផ្ទះ និងប្រទេសកំណើតរបស់ពួកគាត់ ដើម្បីរកប្រាក់សងបំណុលគ្រឹះស្ថានមីក្រូហិរញ្ញវត្ថុ។ ប៉ុន្តែពេលនេះ អតីតពលករចំណាកស្រុករាប់សែននាក់ មិនអាចធ្វើការនៅក្នុងប្រទេសថៃទៀតបានទេ ដោយសារបញ្ហាវីរុសកូវីដ១៩។ ដូច្នេះអង្គការលីកាដូសង្ឃឹមថា «រាជរដ្ឋាភិបាល និងគ្រឹះស្ថានមីក្រូហិរញ្ញវត្ថុ អាចជួយអ្នកខ្ចីប្រាក់ទាំងនេះដោយផ្អាកការសងបំណុល និងប្រគល់ប័ណ្ណកម្មសិទ្ធិដីធ្លីជូនម្ចាស់ទ្រព្យវិញ»។
បើតាមលីកាដូ ចាប់តាំងពីការសិក្សាត្រូវបានធ្វើឡើងក្នុងខែកញ្ញា ឆ្នាំ២០១៩ អ្នកចំណាកស្រុកជាង៨ម៉ឺននាក់បានចាកចេញពីប្រទេសថៃ ត្រឡប់មកកម្ពុជាវិញ ដោយសារការរីករាលដាលជាសកលនៃវីរុសកូវីដ១៩។ បញ្ហានេះបានធ្វើឲ្យពួកគេបាត់បង់ប្រាក់ចំណូលភ្លាមៗ ហើយប្រឈមនឹងហានិភ័យនៃការរំលោភសិទ្ធិមនុស្សបន្ថែមទៀត ដោយសារបំណុលមីក្រូហិរញ្ញវត្ថុ ក្នុងនោះមានការបង្ខំឲ្យលក់ដីសងបំណុលជាដើម។
យ៉ាងណាក៏ដោយ កាលពីថ្ងៃទី២៨ខែមេសា សមាគមមីក្រូហិរញ្ញវត្ថុកម្ពុជាចេញសេចក្តីថ្លែងការណ៍មួយបកស្រាយថា អ្វីដែលអង្គការសង្គមស៊ីវិលលើកឡើងនេះគឺមិនឆ្លុះបញ្ចាំងពីការពិតទេ។ សមាគមនេះបានអះអាងថាខ្លួនបានអនុវត្តតាមគោលការណ៍ណែនាំរបស់រដ្ឋាភិបាល ដោយផ្តល់ដំណោះស្រាយសមស្របតាមភាពជាក់ស្តែងរបស់អតិថិជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ