លោក កឹម សុខា ផ្តើមជួបទូតបរទេសជាថ្មី ក្រោយពីជួបជជែកគ្នាជាមួយលោកហ៊ុន សែន ជិត១ម៉ោង
នៅក្នុងសប្តាហ៍នេះ លោកកឹម សុខា ប្រធានអតីតបក្សប្រឆាំងនឹងជួបជាមួយបណ្តាទូតបរទេសនានាប្រចាំនៅប្រទេសកម្ពុជា។ នៅរសៀលថ្ងៃអង្គារនេះ លោកក៏គ្រោងជួបជាមួយនឹងឯកអគ្គរដ្ឋទូតបារាំងប្រចាំនៅកម្ពុជាផងដែរ។ កាលពីថ្ងៃចន្ទ លោកកឹម សុខា បានជួបជាមួយឯកអគ្គរដ្ឋទូតអាល្លឺម៉ង់ និង សហភាពអឺរ៉ុប ដោយជជែកគ្នាពីបញ្ហាជីវភាពពលរដ្ឋខ្មែរ និង ជំនួបរវាងរូបលោកជាមួយលោកនាយករដ្ឋមន្រ្តីហ៊ុន សែន កាលពីពេលថ្មីៗកន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:២១
កាលពីថ្ងៃចន្ទ ដើមសប្តាហ៍នេះ លោកកឹម សុខា បានជួបដាច់ដោយឡែកជាមួយឯកអគ្គរដ្ឋទូតអាល្លឺម៉ង់ និង ឯកអគ្គរដ្ឋទូតនៃគណៈប្រតិភូសហភាពអឺរ៉ុបប្រចាំកម្ពុជានៅក្នុងគេហដ្ឋានរបស់លោក។ បើតាមលោកមុត ចន្ថា ដែលជានាយកខុន្ធកាល័យ គឺលោកកឹម សុខា និង ឯកអគ្គរដ្ឋទូតទាំងពីររូបនេះ បានជជែកពិភាក្សាគ្នាអំពីសុខទុក្ខ និងជីវភាពរបស់ប្រជាពលរដ្ឋខ្មែរក្នុងស្ថានភាពជំងឺកូវីដ-១៩ និងអំពីស្ថានភាពនាអនាគត។ មិនតែប៉ុណ្ណោះ អ្នកកាទូតទាំងពីរក៏បានសម្តែងការសាទរ និងគាំទ្រចំពោះជំនួបដ៏កម្ររវាងលោកកឹម សុខា និង លោកនាយករដ្ឋមន្រ្តីហ៊ុន សែន ដោយចាត់ទុកថា ជាវិជ្ជមាននៃជំហានដំបូង។
លោកនាយករដ្ឋមន្ត្រី ហ៊ុន សែន និងលោក កឹម សុខា បានជួបគ្នាជាលើកដំបូងនៅថ្ងៃទី៥ខែឧសភា រាប់ចាប់តាំងពីឆ្នាំ២០១៦ មកដល់ឆ្នាំ២០២០នេះ។ ជំនួបលើកដំបូងនេះ ធ្វើឡើងនៅគេហដ្ឋានលោកហ៊ុន សែន នាឱកាសដែលលោក កឹម សុខា ចូលរួមគោរពវិញ្ញាណក្ខន្ធម្ដាយក្មេកលោកនាយករដ្ឋមន្ត្រី។ ខ្លឹមសារនៃជំនួបជិត១ម៉ោងរវាងអ្នកនយោបាយទាំងពីរគឺផ្ដោតលើបញ្ហា«សុខទុក្ខប្រជាពលរដ្ឋខ្មែរ និងផលប្រយោជន៍ជាតិ» ។ នេះបើតាមលោក មុត ចន្ថា ដែលបានបង្ហាញឱ្យដឹងពីខ្លឹមសារនៅលើបណ្ដាញសង្គមហ្វេសបុកនៅថ្ងៃទី៦ខែឧសភា។ ជំនួបដ៏កម្ររវាងអ្នកទាំងពីរនេះ ធ្វើឱ្យមានភ្ញាក់ផ្អើល និង សាទរយ៉ាងខ្លាំងពីសំណាក់អ្នកកាទូត អ្នកឃ្លាំមើលបញ្ហានយោបាយ និង ប្រជាពលរដ្ឋទូទៅ។
ក្រោយជំនួបនេះប្រមាណមួយសប្តាហ៍ លោកកឹម សុខា ក៏បានប្រកាសឱ្យដឹងពីគម្រោងជួបជាមួយបណ្តាអង្គទូតនានាប្រចាំនៅកម្ពុជា។ តាមរយៈទំព័រហ្វេសប៊ុកកាលពីថ្ងៃចន្ទ លោកកឹម សុខា បានគូសបញ្ជាក់ថា ក្នុងសប្តាហ៍នេះ លោកនឹងទទួលជួបជាមួយនឹងឯកអគ្គរដ្ឋទូត-ឯកអគ្គរាជទូតនៃប្រទេសកាន់លទ្ធិប្រជាធិបតេយ្យសំខាន់ៗមួយចំនួនដែលមានស្ថានទូតនៅភ្នំពេញ។
សូមបញ្ជាក់ថា លោកកឹម សុខា កំពុងមានរឿងក្តីក្តាំនៅតុលាការនៅឡើយ។ តុលាការក្រុងភ្នំពេញបានចោទប្រកាន់លោកកឹម សុខា ពីបទសន្ទិដ្ឋិភាពជាមួយបរទេសចង់ផ្តួលរំលំរដ្ឋាភិបាលកម្ពុជា។ សវនាការរបស់លោកបានដំណើរការហើយ ប៉ុន្តែត្រូវផ្អាកសិនកាលពីថ្ងៃទី២៥ ខែមីនា ដោយសារតែការព្រួយបារម្ភពីការឆ្លងរីករាលដាលនៃជំងឺកូវីដ-១៩នៅក្នុងប្រទេសកម្ពុជា។ ក៏ប៉ុន្តែ ស្របពេលដែលការរីករាលដាលនៃជំងឺកូវីដ-១៩កំពុងមានភាពស្ងប់ស្ងាត់នៅកម្ពុជា ក្រុមមេធាវីលោកកឹម សុខា ចង់ឱ្យតុលាការបើកបន្តសវនាការលោកកឹម សុខា នៅឡើងវិញនៅចុងខែនេះ ឬ ដើមខែក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ