កូវីដ១៩៖ រដ្ឋមន្ត្រីមហាផ្ទៃប្រាប់ឲ្យទប់ស្កាត់ការឆ្លងដែនខុសច្បាប់ទៅប្រទេសជិតខាង និងចាប់ខ្លួនមេខ្យល់
រដ្ឋមន្ត្រីក្រសួងមហាផ្ទៃ កាលពីថ្ងៃទី១៣ ខែឧសភា បានណែនាំឲ្យអភិបាលខេត្តជាប់ព្រំដែនជាមួយប្រទេសជិតខាង ត្រូវធ្វើការទប់ស្កាត់ប្រជាពលរដ្ឋខ្មែរ កុំឲ្យឆ្លងដែនខុសច្បាប់ចូលទៅប្រទេសជិតខាងតាមច្រករបៀង។ បើតាមរដ្ឋក្រសួងមហាផ្ទៃវិធានការនេះធ្វើ ឡើងដើម្បីបង្ការការរីករាលនៃជំងឺកូវីដ១៩ និងពង្រឹងសន្តិសុខសណ្តាប់ធ្នាប់សាធារណៈ ខណៈប្រទេសជិតខាងកំពុងដាក់ប្រទេសក្នុងភាពអាសន្នដោយសារជំងឺនេះ។
ចុះផ្សាយនៅថ្ងៃ៖
នាពេលថ្មីៗនេះ មានប្រជាពលរដ្ឋខ្មែរមួយចំនួន ត្រូវបានមេខ្យល់នាំឆ្លងដែនខុសច្បាប់ចូលទៅក្នុងប្រទេសជិតខាង ខណៈពេលដែលប្រទេសជិតខាងទាំងនោះកំពុងដាក់ប្រទេសក្នុងគ្រាអាសន្ន ដើម្បីបង្ការ ទប់ស្កាត់ការរីករាលដាលនៃជំងឺកូវីដ១៩។ នេះបើតាមលិខិតរបស់រដ្ឋមន្ត្រីក្រសួងមហាផ្ទៃកាលពីថ្ងៃទី១៣ ខែឧសភា។
ដើម្បីទប់ស្កាត់បញ្ហានេះ លោកឧបនាយករដ្ឋមន្ត្រី ស ខេង តាមរយៈលិខិតទៅកាន់អភិបាលខេត្តជាប់ព្រំដែនប្រទេសជិតខាង បានណែនាំឲ្យចាត់វិធានការមួយចំនួន ដែលរួមមានការស្រាវជា្រវ ស្វែងរក និងតាមចាប់ខ្លួនមេខ្យល់ដែលធ្វើចលនាអូសទាញប្រជាពលរដ្ឋខ្មែរឲ្យឆ្លងដែនដោយខុសច្បាប់ចូលទៅក្នុងប្រទេសជិតខាងតាមច្រករបៀងនានា, បើមានការចាប់ខ្លួនពលរដ្ឋ ដែលឆ្លងដែនខុសច្បាប់ដោយសមត្ថកិច្ចរបស់ប្រទេសជិតខាង ត្រូវសម្របសម្រួលបញ្ជូនពលរដ្ឋខ្មែរត្រលប់មកវិញ ហើយត្រូវពិនិត្យសុខភាព និងវិធានការដាក់ឲ្យនៅដាច់ដោយឡែកពីគេ។
ក្នុងលិខិតដដែល រដ្ឋមន្ត្រីក្រសួងមហាផ្ទៃក៏បានបញ្ជាក់ថា បច្ចុប្បន្នប្រទេសជិតខាងនៅបន្តដាក់ប្រទេសនៅក្នុងភាពអាសន្ន ដើម្បីទប់ស្កាត់ការរីករាលដាលនៃជំងឺកូវីដ១៩។ ហេតុដូច្នេះ រដ្ឋបាលខេត្តត្រូវអប់រំណែនាំ និងផ្សព្វផ្សាយដល់ប្រជាពលរដ្ឋ កុំឲ្យធ្វើដំណើរទៅកាន់ប្រទេសជិតខាងក្នុងរយៈពេលនេះជាដាច់ខាត។
លោក អាត់ ធន់ ប្រធានសហភាពការងារកម្ពុជា(CLC) បានអះអាងប្រាប់វិទ្យុបារាំងអន្តរជាតិនៅថ្ងៃទី១៤ ខែឧសភា ថាពលរដ្ឋខ្មែរចូលទៅក្នុងប្រទេសថៃ ដោយសារតែនៅក្នុងប្រទេសមិនមានការងារធ្វើច្រើន និងភាពក្រីក្រ។ ចំណែកប្រទេសថៃមានការងារច្រើន ហើយប្រទេសថៃមានកន្លែងស្នាក់នៅ និងប្រជុំជនច្រើន។ លោកបន្តថាទោះបីជាមានការហាមឃាត់ក៏ដោយ ប៉ុន្តែពលករខ្មែរនៅតែឆ្លៀតឳកាសតាមតែអាចធ្វើទៅបានដើម្បីបានការងារនៅក្នុងប្រទេសថៃ។
លោកបញ្ជាក់ថាវិធានការរបស់រដ្ឋាភិបាលនាពេលនេះ ជួយបានមួយផ្នែកក្នុងការទប់ស្កាត់មិនឲ្យពលរដ្ឋឆ្លងដែនតាមច្រករបៀង ប៉ុន្តែកម្ពុជានិងថៃមានច្រករបៀងច្រើន ដោយសារតែព្រំដែនរវាងប្រទេសទាំងពីរមានចម្ងាយវែង៕
កាលពីថ្ងៃទី១៣ ខែឧសភា ប្រទេសថៃ មិនមានរកឃើញករណីជំងឺកូវីដ១៩នោះទេ ហើយនេះគឺជាលើកទី១មួយចាប់តាំងពីជំងឺរាតត្បាតនេះបានផ្ទុះឡើងនៅក្នុងប្រទេសថៃ។ អាជ្ញាធរសុខាភិបាលថៃបញ្ជាក់ថាពេលនេះប្រទេសថៃមានករណីជំងឺកូវីដ១៩សរុបចំនួន៣ ០១៧ករណី និងមានមនុស្សស្លាប់ដោយកូវីដ១៩ចំនួន៥៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ