ស៊ីហ្គេម២០២៣៖ កម្ពុជាគ្រោងបញ្ជូនអត្តពលិក១១០នាក់ ទៅហាត់នៅចិននាខែវិច្ឆិកាឆ្នាំនេះ
កម្ពុជាគ្រោងបញ្ជូនអត្តពលិក១១០នាក់ ទៅហ្វឹកហាត់នៅក្នុងប្រទេសចិននាខែវិច្ឆិកា សម្រាប់កីឡាចំនួន១២ប្រភេទ ដើម្បីត្រៀមស៊ីហ្គេមឆ្នាំ២០២៣ ដែលធ្វើឡើងនៅក្នុងប្រទេសកម្ពុជា។ នេះបើតាមការបញ្ជាក់របស់អគ្គលេខាធិការគណៈកម្មាធិការជាតិអូឡាំពិកកម្ពុជា។ គោលការណ៍បញ្ជូនអត្តពលិកកម្ពុជា ទៅចិន នៅក្នុងខែវិច្ឆិកាខាងមុខនេះ គឺបន្ទាប់ពីការលុបចោលផែនការនេះ កាលពីដើមឆ្នាំដោយសារជំងឺកូវីដ១៩។
ចុះផ្សាយនៅថ្ងៃ៖
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានប្រាប់វិទ្យុបារាំងអន្តរជាតិនៅថ្ងៃទី១៧ ខែឧសភា នេះថា ប្រទសចិនកំពុងតែរៀបចំផែនការថ្មី ប្រសិនបើស្ថានភាពអំណោយផល នោះកម្ពុជានឹងបញ្ជូនអត្តពលិករបស់ខ្លួនចំនួន១១០នាក់ ទៅធ្វើការហ្វឹកហាត់នៅក្នុងប្រទេសចិន នាខែវិច្ឆិកាឆ្នាំ២០២០ខាងមុខនេះ។ ប៉ុន្តែបើស្ថានភាពជំងឺកូវីដ១៩ មិនមានភាពធូរស្រាលទេ នោះការបញ្ជូនអត្តពលិកទាំង១១០នាក់ នឹងត្រូវលើកទៅខែមីនា ឆ្នាំ២០២១ខាងមុខវិញ ហើយការហ្វឹកហាត់នឹងធ្វើឡើងចាប់ពីខែមីនាឆ្នាំ២០២១ រហូតដល់ស៊ីហ្គេមនៅកម្ពុជា នាខែឧសភា ឆ្នាំ២០២៣។
បើតាមលោក វ៉ាត់ ចំរើន សម្រាប់ផែនការបញ្ជូនអត្តពលិកទៅចិន ក្នុងខែវិច្ឆិកាខាងមុខនេះ គឺធ្វើឡើងក្នុងលក្ខខណ្ឌ ដែលស្ថានភាពនៃជំងឺកូវីដ១៩ មានសភាពធូរស្រាល ប៉ុន្តែក៏មាននីតិវិធីនៅក្នុងការគ្រប់គ្រងដូចជាមុនពេលចូលទៅហាត់ ត្រូវពិនិត្យសុខភាព ហើយទៅដល់ប្រទេសចិនត្រូវដាក់នៅដោយឡែកពីគេចំនួន២សប្តាហ៍ នោះទើបអាចចូលមណ្ឌលហ្វឹកហាត់ និងមិនអនុញ្ញាតឲ្យចេញក្រៅឡើយ។
គួរបញ្ជាក់ថា ការបញ្ជូនអត្តពលិកកម្ពុជាទៅធ្វើការហ្វឹកហាត់កីឡានៅប្រទេសចិន ក៏ធ្វើឡើងសម្រាប់ស៊ីហ្គេម នៅឆ្នាំ២០២១ក្នុងប្រទេសវៀតណាមផងដែរ។ អត្តពលិកកម្ពុជាទាំង១១០នាក់នឹងធ្វើការហ្វឹកហាត់លើប្រភេទកីឡាចំនួន១២ប្រភេទ។ ដោយឡែកកីឡាប្រភេទផ្សេងទៀត ដូចជាតេក្វាន់ដូ នឹងត្រូវបញ្ជូនទៅកាន់ប្រទេសមួយចំនួនទៀតដូចជាប្រទេសកូរ៉េខាងត្បូង និងគុយបាជាដើម។
សូមជម្រាបជូនថា កាលពីដើមឆ្នាំ២០២០ កម្ពុជាមានផែនការបញ្ជូនអត្តពលិករបស់ខ្លួនចំនួន១១០នាក់ ដើម្បីទៅហ្វឹកហាត់នៅក្នុងប្រទេសចិន ប៉ុន្តែដោយសារតែមានការផ្ទុះរាលដាលនៃជំងឺកូវីដ១៩ តាំងពីដើមឆ្នាំនៅក្នុងប្រទេសចិន កម្ពុជាក៏ផ្អាកការបញ្ជូនអត្តពលិករបស់ខ្លួន ទៅហាត់នៅក្នុងប្រទេសនេះ។ ប្រទេសចិន ដែលពេលនេះមានករណីថ្មីនៃជំងឺកូវីដ១៩ តិចតួច បើធៀបនឹងពេលផ្ទុះឡើងនៅក្នុងក្រុងវូហានកាលពីចុងឆ្នាំ២០១៩។ គិតរហូតមកដល់ពេលនេះប្រទេសចិនមានករណីជំងឺកូវីដ១៩សរុបជាង៨ម៉ឺន៣ពាន់ករណី និងមានអ្នកស្លាប់ដោយជំងឺនេះ ចំនួនជាង៤ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ