លោក កឹម សុខា អំពាវនាវឱ្យប្រទេសជាមិត្តកម្ពុជាជួយលើជីវភាពរស់នៅរបស់ពលរដ្ឋខ្មែរក្នុងសម័យកូវីដ១៩
បន្ទាប់ពីបានជួបជាមួយបណ្តាឯកអគ្គរាជទូត-ឯកអគ្គរដ្ឋទូតបរទេសជាបន្តបន្ទាប់រួចមក លោក កឹម សុខា ប្រធានអតីតគណបក្សសង្រ្គោះជាតិបានចេញអំពាវនាវដល់បណ្តាប្រទេសទាំងអស់នោះឱ្យបន្តជួយដល់ប្រទេសកម្ពុជា។ អ្វីដែលលោក កឹម សុខា ចង់ឱ្យប្រទេសជាមិត្តកម្ពុជាជួយខ្លាំងនោះ គឺបញ្ហាជីវភាពរស់នៅរបស់ប្រជាពលរដ្ឋខ្មែរដែលរងការប៉ះពាល់ដោយសារតែជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០១:៥៧
គឺនៅលើទំព័រហ្វេសប៊ុករបស់ខ្លួនកាលពីល្ងាចថ្ងៃចន្ទ ទី២៥ ខែឧសភា លោកកឹម សុខា បានអំពាវនាវយ៉ាងដូច្នេះថា សូមឱ្យប្រទេសជាមិត្តរបស់កម្ពុជាបន្តជួយដល់កម្ពុជាលើវិស័យនានា ជាពិសេស បញ្ហាដែលប៉ះពាល់ដល់ជីវភាពរស់នៅរបស់ប្រជាពលរដ្ឋខ្មែរក្នុងពេលដែលជំងឺកូវីដ-១៩ កំពុងរាលដាលក្នុងពិភពលោក និងពីផលវិបាកលើវិស័យសេដ្ឋកិច្ច និងសង្គមនៅពេលអនាគតដែលចាំបាច់តម្រូវឱ្យមានការរួបរួមគ្នាដោះស្រាយបញ្ហាប្រឈមទាំងនោះ។
ការអំពាវនាវរបស់លោកកឹម សុខានេះ ធ្វើឡើងបន្ទាប់ពីរូបលោកបានជួបជាមួយបណ្តាឯកអគ្គរាជទូត ឯកអគ្គរដ្ឋទូតបរទេសនានាជាបន្តបន្ទាប់។ ទូតបរទេសទាំងនេះ រួម អូស្ត្រាលី អាល្លឺម៉ង់ បារាំង សហភាពអឺរ៉ុប ស៊ុយអ៊ែត អាមេរិក និង ប្រទេសជប៉ុន។ ជំនួបជាមួយអង្គទូតបរទេសនេះ គឺកើតឡើងក្រោយពីលោកកឹម សុខា បានជួបជជែកគ្នាជាមួយលោកនាយករដ្ឋមន្រ្តីហ៊ុន សែន ជិត១ម៉ោងកាលពីថ្ងៃទី ០៥ ឧសភា កន្លងទៅ។ អង្គទូតដែលបានជួបជាមួយលោកកឹម សុខា សុទ្ធតែបានសម្តែងនូវការស្វាគមន៍ជំនួបនេះ និង ចាត់ទុកថា មានសារសំខាន់ និងអាចនាំមកនូវលទ្ធផលជាវិជ្ជមានសម្រាប់ប្រជាពលរដ្ឋខ្មែរ។
សម្រាប់លោកកឹម សុខា វិញ លោកបានសម្តែងនូវការអរគុណចំពោះអង្គទូតតំណាងប្រទេសប្រជាធិបតេយ្យជឿនលឿនទាំងអស់នេះដែលបានទទួលស្គាល់នូវ«គុណតម្លៃ»របស់លោក។ ការទទួលស្គាល់នូវ«គុណតម្លៃ» គឺតាមរយៈការផ្តល់ឱកាសឱ្យរូបលោកបានទទួលស្វាគមន៍ ជួបសួរសុខទុក្ខ និងជួបសន្ទនាគ្នា បើទោះបីលោកកឹម សុខា កំពុងស្ថិតនៅក្នុងស្ថានភាពណាក៏ដោយ។
សូមបញ្ជាក់ថា លោកកឹម សុខា កំពុងមានរឿងក្តីក្តាំនៅតុលាការនៅឡើយ។ តុលាការក្រុងភ្នំពេញបានចោទប្រកាន់លោកកឹម សុខា ពីបទសន្ទិដ្ឋិភាពជាមួយបរទេសចង់ផ្តួលរំលំរដ្ឋាភិបាលកម្ពុជា។ សវនាការរបស់លោកបានដំណើរការហើយ ប៉ុន្តែត្រូវផ្អាកសិនកាលពីថ្ងៃទី២៥ ខែមីនា ដោយសារតែការព្រួយបារម្ភពីការឆ្លងរីករាលដាលនៃជំងឺកូវីដ-១៩នៅក្នុងប្រទេសកម្ពុជា។ គិតមកដល់ពេលនេះ មិនទាន់មានដំណឹងនៃការបើកសវនាការលោកកឹម សុខា ឡើងវិញនៅពេលណាមួយនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ