ខួប៧១ឆ្នាំនៃការបាត់បង់ទឹកដីកម្ពុជាក្រោម៖ អង្គការខ្មែរក្រោម អំពាវនាវឲ្យពលរដ្ឋកាន់ទុក្ខជាតិខ្មែរថ្ងៃទី ០៤ មិថុនា
ថ្ងៃទី ០៤ មិថុនា ឆ្នាំ ២០២០នេះ គឺជាខួប៧១ឆ្នាំនៃការបាត់បង់ទឹកដីកម្ពុជាក្រោមទៅឲ្យវៀតណាមគ្រប់គ្រងបន្ត ពីអាណានិគមនិយមបារាំង។ ដោយសារតែបារម្ភពីការឆ្លងជំងឺកូវីដ១៩ ពិធីរំលឹកថ្ងៃដ៏ឈឺចាប់នៅឆ្នាំនេះ មិនបានធ្វើឡើងឲ្យទូលំទូលាយនោះទេ។ ប៉ុន្តែទោះជាយ៉ាងនេះក្តី អង្គការខ្មែរកម្ពុជាក្រោម បានអំពាវនាវឲ្យប្រជាពលរដ្ឋខ្មែរទាំងអស់ កាន់ទុក្ខជាតិ នៅថ្ងៃទី ០៤ មិថុនា នៅតាមផ្ទះនិងតាមវត្តអារាមនានា ដើម្បីបង្ហាញពីការឈឺចាប់និងចងចាំថ្ងៃជាប្រវត្តិសាស្ត្រមួយនេះ។
ចុះផ្សាយនៅថ្ងៃ៖
ស្តាប់ - ០២:៤៤
អង្គការសមាគមខ្មែរកម្ពុជាក្រោម និងសម្ព័ន្ធយុវជនដើម្បីប្រជាធិបតេយ្យ បានអំពាវនាវឲ្យប្រជាពលរដ្ឋកម្ពុជាទាំងក្នុងនិងក្រៅប្រទេស រួមទាំងព្រះសង្ឃផង ចូលរួមកាន់ទុក្ខជាតិខ្មែរ ថ្ងៃទី ០៤ មិថុនា ថ្ងៃដែលអាណានិគមនិយមបារាំងបានកាត់ទឹកដីកម្ពុជាក្រោមទៅឲ្យប្រទេសវៀតណាមគ្រប់គ្រងបន្ត។ បើយោងតាមសេចក្តីអំពាវនាវរបស់អង្គការសមាគមខ្មែរកម្ពុជាក្រោម និងសម្ព័ន្ធយុវជនដើម្បីប្រជាធិបតេយ្យ ការចូលរួមកាន់ទុក្ខថ្ងៃទី ០៤ មិថុនា នៅតាមគេហដ្ឋាន និងវត្តអារាមនានា គឺមានសារៈសំខាន់ដើម្បីបង្ហាញការឈឺចាប់និងចងចាំចំពោះអាណានិគមនិយមបារាំង ដែលបានកាត់ទឹកដីកម្ពុជាក្រោមឲ្យទៅប្រទេសវៀតណាមត្រួតត្រាបន្ត កាលពីថ្ងៃទី ០៤ មិថុនា ឆ្នាំ១៩៤៩។
បើតាមសេចក្តីអំពាវនាវកម្រាស់ពីរទំព័រនេះ ក៏បានចាត់ទុកដែរថា ការចូលរួមកាន់ទុក្ខជាតិខ្មែរ ថ្ងៃទី ០៤ មិថុនា នេះ ក៏ដើម្បីបង្ហាញពីការគោរពនិងដឹងគុណយ៉ាងជ្រាលជ្រៅចំពោះវីរភាពអង់អាចក្លាហានរបស់វីរបុរសនិងវិរសមណៈដែលបានពលីជីវិតក្នុងបុព្វហេតុជាតិ សាសនា និងមាតុភូមិខ្មែរ។ មិនតែប៉ុណ្ណោះ វាជាសារមួយប្រាប់ទៅអាជ្ញាធរវៀតណាមថា ប្រជាពលរដ្ឋខ្មែរទាំងនៅលើទឹកដីខ្មែរកម្ពុជាក្រោម ទាំងនៅជុំវិញពិភពលោក គឺមិនបោះបង់សិទ្ធិរបស់ខ្លួននៅលើទឹកដីកម្ពុជាក្រោមជាដាច់ខាត ហើយបានចាត់ទុកការត្រួតត្រារបស់អាជ្ញាធរវៀតណាមសព្វថ្ងៃនេះថា ជាការខុសច្បាប់ និងតាមបែបអាណានិគមប៉ុណ្ណោះ។ នេះបើតាមសេចក្តីអំពាវនាវរបស់អង្គការសមាគមខ្មែរកម្ពុជាក្រោម និងសម្ព័ន្ធយុវជនដើម្បីប្រជាធិបតេយ្យ នៅថ្ងៃទី ០៤ មិថុនានេះ។
គួរជំរាបជូនថា ពិធីរំលឹកខួប៧១ឆ្នាំនៃការបាត់បង់ទឹកដីកម្ពុជាក្រោមនៅថ្ងៃទី ០៤ មិថុនានេះ ត្រូវបានរៀបចំធ្វើនៅឯទីស្នាក់ការសមាគមខ្មែរកម្ពុជាក្រោម ស្ថិតនៅក្នុងភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ ដោយមានការចូលរួមពីព្រះរាជតំណាងព្រះមហាក្សត្រកម្ពុជាផងដែរ។ ប៉ុន្តែដោយសារតែបារម្ភពីការឆ្លងនៃជំងឺកូវីដ១៩ ពិធីរំលឹកថ្ងៃដ៏ឈឺចាប់នៃការបាត់បង់ទឹកដីខ្មែរកម្ពុជាក្រោមឆ្នាំនេះ មិនបានធ្វើឡើងឲ្យទូលំទូលាយនោះទេ។
គួជំរាបជូនថា ថ្ងៃទី ០៤ មិថុនា ឆ្នាំ ២០២០នេះ គឺជាខួប៧១ឆ្នាំ ដែលប្រទេសអាណានិគមនិយមបារាំង បានកាត់ទឹកដីកម្ពុជាក្រោមទៅឲ្យប្រទេសវៀតណាមគ្រប់គ្រងបន្ត នៅថ្ងៃទី ០៤ មិថុនា ឆ្នាំ ១៩៤៩។ ក្រៅពីធ្វើពិធីប្រារព្ធខួបនៅឯទីស្នាក់ការរបស់អង្គការសមាគមខ្មែរកម្ពុជាក្រោមនេះហើយ ការរំលឹកខួប៧១ឆ្នាំនៃការបាត់បង់ទឹកដីខ្មែរកម្ពុជាក្រោមនៅឆ្នាំនេះ ក៏មានកម្មវិធីពិភាក្សាតុមូលទាក់ទងនឹងខួប៧១ឆ្នាំក្រោមប្រធានបទ «ស្ថានភាពសិទ្ធិមនុស្សខ្មែរក្រោម» រួមទាំងមានការរាប់បាត្រព្រះសង្ឃជានិមិន្តរូបតំណាង ១៩៤៩អង្គផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ